雜記

10月12日  星期日  晴天

上兩個星期, 

同舅父出咗去一次九龍城.

由北角碼頭搭船出去, 又見到上次隻貓.

 

十。一假期

2014年10月3日  星期五  晴天

十月一日紅日, 

大少都响呢日放假.

因為晚上BOOK了枱在中環吃放題,

所以下午我地去咗上環行吓,

行完行過去就得.

其實我唔係襯熱鬧專登揀呢日去中環, 

而係人地未話"去飲"前, 就已經BOOK定枱.

點知去到餐廳先發現職員寫錯日子, 

BOOK咗星期五!

唔知算好彩定唔好彩, 咁啱因為佔中, 

平時爆到七彩嘅餐廳, 

竟然得幾枱客, 我地先可以有位坐咋~

食扭扭批

9月30日  星期三 晴天

今個星期對上班族嚟講就好爽,

有兩日紅日喎~

不過我估好多人都會唔得閒, 

好似我公司咁, D同事就組隊去中環金鐘坐通宵!

對我呢D師奶仔, 

邊個做特首都係一樣, 

最緊要國泰民安, 

大人有工做, 細路有學返!

所以...我係唔支持佔中的...

持乜野意見都好, 

和而不同, 求同存異, 

作為香港人, 作為一個母親, 

我只希望和和平平, 社會有返D秩序咁姐~

**************

唔理出面點亂, 

我都想繼續歌舞昇平.

逢星期三兔寶寶都要著體育衫返學.

之前以為學校係梅花間竹咁一日著裙一日著體育衫, 

每套校服買咗一套就算.

得知要連續著校裙, 

要專程出去長沙灣買校服.

學校仲要求要有多一條校裙長放書包做後備, 

所以佢宜家一共有三條校裙, 

連冷衫都要買多件...

只要諗起一個K1學生要買兩對白鞋、一對黑鞋仲有咁多校服, 

份工有幾辛苦, 都要繼續頂落去!

週未閒談

9月27日  星期六  晴天

好久無寫blog了, 

平日為咗返工更有精神, 

都早早上床休息, 

慶幸係雖然一晚醒扎醒幾次, 

但做咗夜鬼咁耐, 可以十一點幾瞓得著已算係咁...

星期六返長短週, 

學校雖然都係開朝八午一, 

但我一點才放工, 

趕不切接兔寶寶, 早上又要先送佢返學, 

時間上太不化算了..

於是每個長週, 我都留低俾大少同奶奶照顧.

奶奶咁啱呢兩個星期六都在中午十二時左右離家, 

就係咁, 响我放工趕回家前, 

有個幾兩個鐘頭, 要拜託大少"照顧"兔寶寶..

而大少照顧兔寶寶嘅方式呢, 

就係邊瞓邊照顧, 

有乜事大聲嘈到佢就擘大眼睇下;

又或者佢要乜就俾乜佢玩..

今日放工返屋企睇下呢...真係嚇傻咗, 

成間房亂七八糟, 慘過俾賊仔入過屋, 

大少仲要笑笑口問我, 發唔發現兔寶寶D頭髮少緊忽?!

好得戚地說幸好佢及時收起把較剪....

我心入面真係講晒粗口架,

但都無辦法, 雖然我有諗過, 

要搵份只返五日嘅工...

但諗...係咁容易咩?!

上個長週, 

大少whatsapp我, 

個女玩到無野好玩, 著我條褲嚟玩..

工作。感受

9月22日  星期一  晴天

正式上班了還未夠兩星期, 

和大少輪流接送兔寶寶, 

也真是夠疲累的.

兔寶寶在學校睡了長達兩小時的午覺, 

放學回來比平時更加精力充沛, 

有時到晚上十時還不願睡覺呢~

說回我的工作.

對我來說, 就是一個"悶"字..

並不是做果行厭果行, 

而是我本身就很討厭programming,

厭惡的程度是...會考前就drop了電腦這一科.

現在雖然不是負責寫program(我也無這樣的能力), 

但工作上就常常要涉及這方面範疇.

放低工作了差不多四年, 

很多知識要由頭學起.

老細是舊的, 

公司也有人事變動, 

由小規模變成更加小的規模,

人小了, 老細要求高了, 

雖然她沒忘記我離開了好一段時間, 

但明顯佢要求比之前更嚴峻.

嚴峻得來呢, 

她又不是很清晰的作出指引, 

很多時工作了一天, 

第二天才發現她期望的是另一樣東西.

另一方面要短時間內pick up起前員工的工作,

(上班後才知道我的崗位已空出好幾個月時間了, 

也由之前三個人...變成一個人)

有時...真令我有點喘不過氣來.

有時候我會懷疑自己的能力, 

是不是應該轉行呢?

但過往工作經驗, 

圍繞, 又真的不知轉那一行...

每晚放工都很疲累呀, 

但工作壓力又令我睡不著..

愈睡不著呢, 又擔心第二天會更無精神應付自己的工作.

有些時候我會安慰自己, 

有誰喜歡工作呢? 

有誰工作得十分愉快呢?

都是為生活吧!

很盼望快些適應工作生活, 

快些上手, 做出好成績來.

游水水 + 開學

9月5日  星期五  晴天

九月二日, 兔寶寶開學前一天, 

我們走入屯門良景村的泳池游泳去, 

順便在娘家做節.

泳池範圍不准拍攝.

今次兔寶寶一點也不畏水, 

玩到唔願走, 很開心.

游完水, 個個都很肚餓, 

拍下了一幅餓鬼投胎照.

 

九月一日

9月4日  星期四  晴天

今年九月一日, 大部份學生都開學了吧!

但兔寶寶是例外, 

佢間學校是九月三日才開學的.

而我也好感激老細體諒我,

俾我等到學校的適應期完結才上班.

之但係我份工有點跟project性質, 

所以未正式上班的日子, 

有客見的話, 要跟埋老細一齊見, 

當返part time咁...

九月一日呀B未開學, 我就要返幾個鐘頭工了~

 

大少亦珍惜同兔寶寶相處的機會, 

特地調了假, 在我上班時湊下呀B.

呢日大少帶咗佢去食KFC.

第一次歌唱表演

9月3日  星期三  晴天

上星期六, 兔寶寶作了人生的第一次公開表演.

週日雜記

8月31日  星期日  晴天

上星期忙著攪老爺出殯事宜, 

晚上都沒有精神寫blog了.

大人忙著正經事, 

對小孩來說, 卻是多了些新鮮事情去探索.

上星期一約了朋友玩塔羅占卜, 

占卜前先到了灣仔一間台式小店去吃晚飯.

長洲半天濕身遊

8月24日  星期日  晴天

剛剛過去的星期三, 

我們去長洲玩了半天.

約了婆婆和舅父下午兩點在五号港外線碼頭會合,

早上無野做, 先去波波池玩.

積分

8月21日  星期四  晴天

近期兔寶寶的主要活動, 

離不開到波波池玩..

赤柱泳灘玩水水 + 越盞晚飯

8月15日  星期五  晴天

上週未待兔寶寶上完最後一堂芭蕾舞課, 

我們約了婆婆和舅父, 

趕往沙灘去.

同呀媽傾多兩傾, 

才發現兔寶寶在車上睡著了.

於是齊齊扮瞓覺..

薑是愈老的愈辣, 

真係瞓著果個, 都無我地扮得咁逼真.

樂與學

8月14日  星期四  晴天

兔寶寶正式上幼稚園之前的幾個月, 

為免她整天在家無所事事, 

也讓本人在一日中有點點清閒時間, 

每天均安排了一節活動給她.

到搬了去北角, 

唔熟地頭, 早午間都不知去那兒好, 

(我相信, 同老人家住, 愈少見面愈少磨擦)

於是在冒險樂園買了張月票,

逢星期一至五, 一有時間就帶她去.

One Piece海賊王展覽@時代廣場

8月12日  星期二  陰天

有日呀B返完Playgroup, 

去了附近的商場睇海賊王展覽.

以前有個男友很喜歡看海賊王, 

投其所好, 我也看過不少它的漫畫..

場有有很多喬巴公仔(我稱佢為鹿仔), 

要排隊入場啊!

一次放十個人入去, 

下午時人不多, 但都要排十五分鐘左右.

週日雜記

8月10日  星期日  晴天

無寫blog一段日子, 

因為近期連接網絡有些問題.

自老爺過身後, 

大少的一對仔女就很多時過來住, 

人多了, 連寬頻也要爭.

我要留待兔寶寶睡著了的晚上才能連連線, 

實在不夠由朝上到晚(仲要係上線睇movie!)的一對大孩子.

就算好彩俾我上到了, 

到上傳照片時網絡就中斷了.

我算是比較不進取的人吧!

無得用電腦寫blog, 就日日去圖書館借書睇.

直至有天害怕兔寶寶這網誌會發霉,

才想到用條LAN線, 去解決wifi的問題.

幸好modem裝了在我房, 

週六叫了呀哥幫我買條LAN線, 

上網問題得以解決.

雜記

8月3日  星期日  晴天

爺爺過世了四天, 

奶奶的心情逐漸平伏. 

我們都搵多D時間陪佢.

幸好佢要照顧一家伙食, 

有D野做好過成日呆在家想埋一邊...

希望人人都開開心心, 

呢篇寫番D開心野.

好耐之前大少同我一齊去接兔寶寶放學,

呢一日兔寶寶俾老師畫咗兩個心响面額.

回家途中兔寶寶話要去VV, 

於是就行咗去附近的酒店解決, 

順便坐在LOBBY休息一會.

沉痛哀悼

2014年7月31日  星期四  晴天

昨早上老爺經香港的醫生診察過後, 

由救護車從中山送回香港.

我留在家中默默等候大少和奶奶辦妥入院手續後歸來, 

心裡也充滿著期望, 老爺的情況會在歸來後有所好轉...

昏迷了十二天, 

老爺確是很累了, 

好像是知道自己已回到香港, 自己的家, 

見到兒孫安樂了, 

病情急轉, 在今天零晨三時多離我們而去.

爺爺, 但願你在天國, 

也常掛著那樂天的笑容.

生活

7月26日  星期六  晴天

近期無乜心機寫blog,

老爺仍然未醒.

他的身體狀況不宜作第二次手術,

只能靠刺流和打針去治療.

醫生曾說老人家腦細胞復修能力慢,

要家人要有心理預備. 

大少和奶奶仍留在中山, 整天愁雲慘霧...

很想老爺快些康復出院, 

回復以前有生氣的家....

上星期呀婆舅父來探我們.

意外發生後, 更加珍惜與家人相處.

凡人永遠都不會知道..明天會發生什麼.

學生相

7月23日  星期三  晴天

老爺已昏迷了三天, 

雖然醫生說手術成功, 又話情況樂觀...

但還是未知他幾時會醒過來...

ICU病房每天只限兩位家屬作五分鐘離遠探望, 

怕有細菌感染病人.

奶奶不能長留在醫院, 真怕她會胡思亂想..

留在香港的我們, 除了擔心, 

依然要按往常生活...

上週六出席了兔寶寶幼稚園的新生家長會, 

拿了校服書包被褥等等;

週日為她在家拍了學生相~

老爺現況

7月22日  星期二  陰天

謝謝各blog友的祝福和關心.

老爺昨天做了第一次開腦手術, 

成功地把左腦血塊抽了出來, 

現階段醫生嘗試打D藥進去看可否把右腦的血塊抽出來..

老爺已昏迷了三天了,

預計即使日後醒返, 都幾長手尾.

但我們都希望他能盡快醒來先, 

身體的其他情況再慢慢康復...

以免奶奶每天傷心到晚晚失眠...

待過了危險期, 才能把老爺送回香港醫治.