烤焗黃金椰汁年糕

2012年1月6日下午3:38


尋日用咗大半日時間, 整咗呢個【烤焗黃金椰汁年糕】.
金黃色, 好靚呀!

其實我係想整黃金糕架!
跟住食譜整, 第一次發酵時都發得好好,
發到連個電飯煲蓋都發起埋!
我心諗出年龍年發喇!!
到裝入糕盤進行第二次發酵,
D粉漿升到連一個糕盤都裝唔晒....

可能尋日太凍, 第二次發酵响室溫進行得唔太順利吧!
到入得爐嘅時候D粉漿反而縮咗水而唔係發得更勁,
就係呢個步驟唔成功, 所以個黃金糕焗出來無乜窿窿,
好似年糕咁....
既然整黃金糕失敗咗,
咁呢個成品我就叫佢做【烤焗黃金椰汁年糕】吧!!

呢個糕有兩個食法,
一係焗起就襯熱切厚件食,

一係灘凍佢放雪櫃食時切薄薄地煎香佢來食.

兩種食法我都試過,
煎香佢食比較好食, 同埋一焗出來好"痴刀",
好難切得靚, 雪凍先切就無呢個問題.

*****************************************


兔寶寶: 兩日無見, 我係咪又精靈咗呀???

再嚟黃金 -- 烤焗黃金蕃薯

2012年1月8日下午2:30

尋日整咗烤焗黃金蕃薯.

而家兩三日左右我就會蒸一次蕃薯,
有時煲唔切粥, 兔寶寶都可以食蕃薯來補充澱粉質.
出街果陣餵蕃薯比餵粥仔更方便添!
我同街市入面賣蕃薯果個呀姐熟晒架喇!!

果個呀姐檔口有不同種類嘅蕃薯賣,
講甜就緊係日本黃心蕃薯甜啦!
街市賣得十蚊八蚊磅嘅當然唔係真正來自日本嘅蕃薯啦,
得個名姐!
不過日本蕃薯對BB來講就太硬, 同埋粉得劑,
兔寶寶唔太鍾意囉!
經我左試右試, 一隻叫"雞蛋黃"嘅蕃薯就最適合BB食喇!!
雖然唔係好甜(BB仔都唔好食咁甜啦!),
但佢比較淋身, BB仔容易吞.
兔寶寶一次可以食大半個架!!


反正都係蒸,
我無理由一次蒸一個咁嘥爐火架!
逄係兔寶寶食蕃薯果餐, 我都跟埋一齊食.
食得多, 兔寶寶未識講個悶字,
我都覺得悶啦!
於是摷吓網上有無其他蕃薯食譜.

呢個烤焗黃金蕃薯係參考 jEss Cafe嘅食譜:


材料:

蕃薯---４００g
牛油---３０g
砂糖---６０g
牛奶---4湯匙(我落咗6湯匙)
鹽---少許
蛋黄---１隻
Ｒｕｍ酒---1湯匙(我無落)

塗面用:
蛋黄---１隻
水---少許

做法  :
蕃薯蒸熟、去皮放入小鍋、用叉壓爛後微火順序加上調味料.
水分蒸発後、等１５分鐘。分8分、湿手做型。
塗上蛋黄+水(溝稀）
放在180度預熱焗爐焗約20-25分鐘、再塗上蛋黄+水(溝稀）一次、
再焗約5分鐘。
(如無Rum酒、可改用雲呢拿油３至４滴, 另添風味）

到我寫呢篇網誌執相時,
先發現呢個【烤焗黃金蕃薯】好切合【黃金】呢個主題....
嘻嘻...怪不得以前我讀ART攞咁低分啦!!

兔寶寶: 媽咪, 唔知真係以為你整小雲篤住果舊"黃金"呀!!

甜品大翻兜

2011年9月20日下午9:41

尋日大少放假, 都無邊度地方去,
晏晝飲茶又唔係食好多野,
買完野返屋企整甜品食.

原來大少未食過梳乎厘架!
咁就要整俾佢食吓~

同前日一樣, 用咗兩個蛋白一個蛋黃,
今次兩個都升得好高呢!

不過影呢兩張相時已經塌塌地....

雪櫃仲有一個心太軟,
襯個爐仲熱, 焗完梳乎厘後焗埋佢,
咁咪唔洗預熱多一次個爐囉!

今次焗耐少少, 不過由個杯度取出時都係整穿咗...

我"隔硬"砌返埋佢...

************************************************************
今日焗埋最後兩塊和牛漢堡,
仲有四塊薯餅做我嘅午餐 + 大少嘅早餐...

呢一盤係"環保燉蛋"...

 "環保燉蛋"係响我整緊盤午餐時,
唔好side爐火同時放响下格焗嘅...
外面個兜裝咗D水, 咁就變成座水焗...

唔止咁呀!
環保燉蛋係用咗呢兩日整梳乎厘多餘出來嘅蛋黃嚟整嘅...
嘻嘻, 善用資源唔浪費食物又慳家...


而且仲好滑添呀!!

Practice makes perfect,
雖然D甜品未去到perfect,
不過都叫做有進步吖!

打緊呢篇網誌果時, 兔寶寶係咁"搣"我呀...

夜半的梳乎厘

2011年9月19日下午3:43

宜家係1:47AM
我係零晨時份整呢個甜品的!
只因今日(尋日?!)巡blog時,
見到人整,
加上果位(即係邊位? 唔記得咗!!)blogger 話好快就整好,
所以今晚摷食譜整!!

今次用為食貓嘅食譜,
做一半份量.
材料:
蛋黃     1 隻
蛋白     2 隻
砂糖     1.5 湯匙
牛奶     50 毫升
麵粉     1 湯匙

1.  預熱焗爐200 C。    
2.   蛋黃加入半湯匙糖打 至奶白色，加入已篩好的麵粉攪勻成糊狀。牛奶入微波爐丁30秒或煮熱(不要滾)，加入麵糊中快手攪勻.
3.  蛋白打至起泡，加入餘下的1湯匙糖打至企身，加入麵糊中混合。    
4.  將麵糊放入焗杯中，約八成滿，入焗爐焗12分鐘取出, 即可享用 。

*我未到12分鐘, 見佢升到咁上下, 面頭個色又差不多OK, 再焗會燶, 故大約十分鐘已取出.

未入爐前嘅梳乎厘,
快快手手影張相....

一出爐, 未攞出嚟, 又即刻影一張,
雖然兩個都升得好高,
星星形個模相對地升得高D.
可能佢容量細D嘅關係吧!

呢個橙色兜兜係响十蚊店買,
返到屋企先發覺佢容量都唔細,
下次可以再買多一個...

影下入面組織先,
同响出面食無咩分別,
今次係原味簡單D,
但响出面食梳乎厘算係高級野,
就算係甜品鋪頭仔食, 幾廿蚊都走唔甩;
其實有電動打蛋器的話呢個甜品係超易做,
我覺得仲易過整燉蛋!
甜品鋪真係搛錢搛到笑呀!

星星形呢個矽兜,
可能個模太軟支撐唔倒,
一出爐幾乎係即時倒塌咁滯...
所以用焗兜係合適D嘅!

整呢個甜品時,
兔寶寶已經瞓著咗,
唔知佢睡夢中聞到梳乎厘嘅味道,
發夢會唔會特別甜呢??

朱古力心太軟

2011年9月15日下午7:27

9月15日  星期四  晴天



尋日响報紙見到心太軟食譜,
可以前一晚做定放响雪櫃第二日焗喎!
咁就啱晒我喇,
晚上兔寶寶瞓咗覺就係我全日最得閒嘅時候,
可以响廚房整吓甜品,
最麻煩最side時間果part晚上做咗,
第二日一焗就食得, fit 晒我!!

未焗的心太軟

今次係我第二次溶朱古力,
一路溶一路聞住朱古力嘅香味,
見到溶朱古力果隻碗沾滿晒朱古力,
耳邊即刻出現魔鬼嘅聲音: "咁多朱古力, 就咁洗咗佢好side喎~"
另一邊天使出現, 同我講: "咁夜仲食朱古力, 肥死你!!"

"食我啦, 食我啦..." 魔鬼不斷向我揮手...
我唔理喇! 先舔去附在調羹上的朱古力;
之後起勢咁刮埋碗邊果D;
意猶未盡, 食開有癮,
最後仲伸埋條脷出來把碗舔得乾乾淨淨!
朱古力真係魔鬼嚟嫁!!

出爐喇~

材料(二人份量)
1. 朱古力：75g
2. 牛油：20g
3. 糖：15g
4. 蛋：1只
5. 麵粉：15g
6 .鹽：1/8 tsp

做法
1. 將焗爐預熱至220度。
2. 將(1)用熱水坐溶備用。
3. 將(2)放入容器，加入(3)打軟，再加入(4)和(6)輕輕打篩入(5)，用膠刮拌勻。
4. 然後拌入(1)，拌勻即可倒入模具，入爐焗6至7分鐘即可。

Tips
1. 鹽和朱古力是好朋友，除可調味之外，還可增加口感。
2. 控制時間是關鍵所在，要焗到外脆內軟才好味，記得如混合物曾放過入雪櫃，焗的時間便要重新調校，大約焗7至8分鐘。

因為我心急, 加上怕焗得太耐變成朱古力蛋糕,
所以早咗小小就拎個心太軟出來.
從杯仔"櫈"個心太軟出來時, 就已經穿咗喇!
無咗一cut個蛋糕D朱古力湧出來果一幕,
好似爭緊D咁.
唔緊要喎~ 我只係焗咗一個,
同大少兩份食,
仲有一個keep响雪櫃聽日焗多一次!