黑米雙層芝士蛋糕

6月28日  星期六  晴天

為慶祝呀婆生日, 

蛋糕是早廿四小時前就開始預備的~

 

山寨版pancake。雪耳杞子綠豆煲腐竹

6月3日  星期二  晴天

一年一度端午節, 

估唔到我搭船尾都有份參予類似划艇活動...

尋日成個灣仔都無廁所水, 

到半夜三四點起身去廁所, 

發現成個廁所變成水塘, 

咸水又試谷爆水箱!

即時要用個地拖划呀划, 

嘈醒埋兔寶寶.

做完大輪劇烈運動, 

眼瞓都變唔眼瞓,

咁啱大少又收工返嚟.

襯人齊, 好快手整咗個山寨版pancake.

超簡易朱古力布甸實驗

5月25日  星期日  晴天

小時候呀媽教啫喱和布甸的分別, 

前者無加奶, 後者就有..

咁呢碟就係朱古力布甸!

超簡易芧屋芝士凍餅

5月4日  星期日  雨天

婆婆和舅父來之前一晚, 

臨時臨急, 才想起做個蛋糕出來.

剛巧那天芧屋芝士做特價, 

買了一盒, 

又趕忙去超市買了盒最小裝的忌廉, 

做了一個凍餅.

真是太趕忙, 

餅底也來不及做.

家裡只有甩底模, 

怕未凝固前蛋糕漿會從隙縫中漏出來, 

用手指拈碎了一條即食小蛋卷, 

塞在模底的邊邊, 形成一個圈~

睇過網上幾個芧屋芝士蛋糕都是要焗的.

其實早在兔寶寶生日時我已經在心裡想了一個做法.

宗旨是要有小小公仔吸引呀B, 

又不能畫上去(畫功太差),

又不想嘥一百幾十買個大卡通蛋糕模, 

可能整果一次半次~

最後在烘焙店買了一隻兔仔矽膠模, 

只是十多元, 

倒在平滑的蛋糕上當裝飾, 

比買一塊現成的糖花更為經濟抵玩~

 

本來係無諗住發忌廉, 

就咁倒入去, 好似布甸咁嘅質地.

但到正式整時才發現啫喱水太多, 

怕會漏漿先打起D忌廉令佢杰少少.

所以蛋糕食落就有少少似梳乎厘了.

簡易自製芝麻糊

3月1日  星期六  晴天

早排買了一包芝麻粉, 

想話整吓芝麻蛋糕又或者芝麻糊俾大少吃.

但因為懶和怕麻煩, 

包芝麻粉反而俾我加在麥皮裡吃了大半.

麥皮加咗芝麻粉真的有點似食芝麻糊架!

於是我就試吓將麥皮磨成粉,

好似煮麥皮咁煮, 睇吓扮唔扮得成芝麻糊先, 

咁咪唔洗磨米咁大工程囉~

 

失敗了的"幻想芝麻糕"

10月1日  星期二  晴天

有時瞓唔著,
我會在腦中幻想很多離奇的煮意,
有些雖然是奇怪少許, 
但都是可行的, 
即使不屬於美味但都可以勉強吞落肚.
煮嘅過程中一直盼望、幻想味道是如何, 
那不是不好玩的...

週三雜記

9月11日 星期三  晴天

近呢幾日都是忙著報幼稚園,

無得讀N班嘅日子, 

唯有報多些幼兒課程讀住先..

唔係要兔寶寶學到D乜, 

但求佢同多D接觸小朋友.

以佢慢熱嘅性格, 單單去公園是不夠的.

芝士千層蛋糕

尋日兔寶寶11個月大生日,
早一晚急急忙忙預備咗呢個芝士千層蛋糕來慶祝.

又係芝士忌廉! 因為果1KG cream cheese 仲未用晒!
而且加咗cream cheese落甜忌廉度,
質地會實D, 唔會好似就嚟溶咁樣.


食譜記錄如下:

材料:
低筋麵粉  80克,
細沙糖  20克,
鹽  半茶匙,
蛋  2隻,
牛油  20克,
牛奶 220ml

做法:
1. 將過了篩的麵粉、砂糖和鹽一起混合均勻;
2. 再加入雞蛋拌勻;
3. 續加入融化了的牛油拌勻;
4. 再加入牛奶拌勻成麵糊.
5. 燒熱平底鑊, 在鑊中刷上一層薄牛油, 將約2湯匙的麵糊放入,
   擴開成薄薄一片, 先煎一面, 待呈金黃色即翻面, 再煎約五秒即可.


6. 重複步驟5直至麵糊煎完.

薄餅食譜參考 : <好想吃起司蛋糕>一書.

芝士忌廉做法:
1. 把約100克忌廉芝士打至軟化, 加入一隻蛋黃, 打勻.
2. 打起約200克甜忌廉.
3. 把1 加入2中, 打勻.

組合:

將拌好的芝士忌廉內餡抺在煎好的薄餅上, 再蓋上另一片薄餅,
重複動作數次即成千層蛋糕.

呢個蛋糕製作簡單,
唔洗焗唔洗D乜野發蛋技巧,
係要小小心機慢慢煎薄餅.

整呢個蛋糕果晚大少突然收早,
整整下要煮宵夜俾佢;
食飽飯嘅佢又不斷問我攪完未, 催我早D瞓...
D餡係求其"抆"上去, 搽得唔平均囉.
忌廉抺得唔夠多, 層次唔係好分明,
不過就無咁漏囉!
下次可以夾D生果落去就perfect喇!

第二日, 大少一起身就問我係咪有千層蛋糕食喇!
响廚房切咗兩件出來, 其餘放返入雪櫃,
佢問我收埋果大半個做乜!
唉, 想收埋嚟做宵夜都唔得添!

簡易版南瓜布甸

2012年6月3日下午2:49

尋日玩完火龍果, 今日輪到南瓜,
不過係我玩, 唔係兔寶寶玩....

整咗個南瓜布甸.
呢個係簡易版嚟架, 做法非常簡單.


我無買日本南瓜, 只係見到街市有賣細細隻嘅,
叫做"香芋車瓜"喎!
熟咗之後真係有少少芋頭味架!
首先係要用沙布刷洗乾淨南瓜嘅外皮(個皮食得架),
然後切咗佢個頂, 蒸熟佢,
用筷子插得入去為之OK, 唔好蒸得太淋喎!
唔係個南瓜盅就太軟身就裝唔倒布甸.

蒸熟咗等佢稍為凍少少, 就可以挖乾淨D囊同核,
要仔細檢查清楚, 有無D核仲响入面.
而布甸嘅做法好簡單, 我只係用高鈣豆漿加魚膠片,
大約係500ml豆漿對12克魚膠咁上下啦!
要整出準確份量嘅布甸(即係啱啱好塡滿個布甸盅),
可以先用水倒入去個南瓜入面再倒返出來,
再量度水嘅容量, 咁就可以計到要用幾多豆漿同魚膠來整布甸啦!


為免南瓜布甸變成南瓜JELLY,
我就用少量淡忌廉代替等量豆漿,
等佢更滑同埋有布甸嘅口感.
唔同豆漿用鮮奶加糖都得;
再唔係, 想豐胸嘅就用益力多啦!!!
之後就可以倒D布甸水倒入去個南瓜盅入面,
放入雪櫃雪至凝固.

呢個當然唔係正宗方法啦!
勝在簡簡單單, 可以講話零失敗,
而且又唔係太肥嘅甜品,
唔食南瓜, 可以用蜜瓜, 又或者木瓜代替,
仲少咗蒸嘅步驟添!
大人同小朋友都啱食呢!

無添加的芒果布甸

2012年6月6日上午12:15

前幾日整咗芒果布甸.

黃昏時間同兔寶寶去完公園玩,
路經露天街市, 一份芒果4.5個(有一個特別細粒, 計半個)收工價十蚊.
買返來等佢熟, 心中盤算用來整芒果糯米糍.
等到芒果熟了, 我卻日日都忘記買糯米粉.
咁啱有日巡blog, 見到精選blog Reko's homemade嘅芒果布甸食譜,
家裡又咁啱有盒開咗嘅細盒裝淡忌廉.
就轉呔整呢個完全不含人造色素與香料嘅布甸.

我用咗兩倍材料份量, 以為可以整到一大兜.
點知我將4個芒果打成蓉, 還有半個芒果切粒粒後,
最後只能整到四小杯布甸;
換言之一杯含有一個再多DD芒果, 你話揼本到呢~~
加埋忌廉滑一滑, 如果咁都唔好食, 真係無野好講.


大少不嬲都話芒果濕, 芒果毒, 佢話佢唔食芒果.
我以為這四杯芒果布甸是完全屬於我的.
點知第二日起身, 見到廚房升盤有兩隻吉杯....
唔洗問呀貴, 一定係兔寶寶偷嚟食啦!!
係咪呀, 大少?!

杞子桂花糕

7月13日  星期五  炎熱

上星期整咗兩盒杞子桂花糕,
其中一盒用代糖做, 送俾我有糖尿病的家人吃.
亦因為咁, 我係用乾桂花做, 而唔係用桂花糖的.

桂花糕做法簡單, 而且健康有益.
在此記下食譜以便日後翻查.

材料:

乾桂花   大半湯匙
杞子       約一至兩湯匙
糖           適量
魚膠片   15克

做法
先用冰水浸軟魚膠片.
在小煲內放乾桂花(桂花不而放太多, 我做的第一盒放多了乾桂花, 使得那桂花水有少許苦味和澀味, 要多放糖去中和),
再放225ML大滾水入內,
可以細火滾半分鐘使之出味,
加入杞子, 蓋上煲蓋, 待10分鐘.
加入軟化了的魚膠, 攪拌至溶化,
加入糖(或蜜糖/代糖, 也可一早用冰糖水來煮桂花),
最後放入冰塊75克, 放入雪櫃凝固.

自己吃的一盒, 下了普通白糖就算了,
其實用冰糖會好吃些呢!

*************************

同場加影:

焗合桃

大少某天的宵夜: 外賣"事打筆"的素菜沙律...

我的第一個芝士蛋糕

2011年8月9日上午9:10

8月8日  星期一  炎熱

上個星期我有整野食嫁!!

上個星期日整咗老翻Carbonara,
點解係老翻?
屋企無煙肉(實情我地都唔多鍾意食煙肉),
就用火腿嚟頂當.

呢個大少好鍾意食, 材料又係雪櫃常裡有的, 簡單易煮,
不過下次再煮應該熄咗火先加蛋黃, 可以更滑....


星期三整咗烘火腿芝士蛋三文治...

整呢份三文治令我好有滿足感,
樓下茶餐廳响tea time賣呢份野都要廿幾蚊,
仲要無蛋喎~
自己整兩份再加埋蛋, 成本都係10蚊以內,
我覺得我慳咗好多錢呀!!!

星期四大少同兔寶寶哥哥姐姐游水唔响屋企,
我食咗我好"恨"食嘅合味道杯麵...
星期五煮咗魚片粉絲做晏晝無影相;

到星期六, 整咗兩份非常邪惡嘅早餐....

係邪惡芝士腸+炒蛋+吞拿魚方包pizza.
成份早餐(實質食嘅時候已經係下午14:00)最邪惡嘅係一粒豆一條菜都無.
怪只怪我買咗扎韮菜花唔記得咗烚熟加落去...
其實我煮嘅時候已經收咗手,
無加芝士落去炒蛋,
否則成份早餐都係芝士!!!

同日仲煲咗大少欽點嘅綠豆沙.
呢個糖水以前住hall嘅時候經常煮,
理應駕輕就熟, 可惜今次浸少咗綠豆,
煲完後發覺太稀, 唯有再煮熟D西米隔水加落去,
感覺無咁水汪汪.....

今日呀媽嚟探兔寶寶, 整咗呢個俾佢試食...

D魚蛋唔係普通料嚟架!
係兔寶寶嫲嫲買門鱔返嚟自己打自己唧自己炸架,
無溝粉外脆內軟...
我發誓自從第一次食過之後至今我都未食過街外D魚蛋...

終於到文章標題提及嘅芝士蛋糕喇!
以前都有焗個蛋糕仔, 中學上家政堂時整過菠蘿蛋糕,
但我從來未整過一個完整切得開嘅芝士蛋糕架!

打呢篇網誌前我掙扎咗好耐,
好無post蛋糕嘅原貌出來呢?
因為, 它的樣子實在太嚇人了!!
大少起初見到佢原貌,
佢個表情.....話俾我知佢唔相信呢個係蛋糕!!!!

首先係我"姑寒", 唔知下次仲整唔整,
所以無買蛋糕模, 我係用食完嘅雪糕盒做模的.
先天條件已經令個蛋糕嘅樣貌打了折.
其次係個餅底同外圍, 新手嘅我壓得厚薄不一,
同時亦都壓得太厚了....
因為我唔知雪完之後個皮有幾硬, 所以唔敢整太薄, 怕支撐唔起個蛋糕...

其三係我無買電動打蛋器,
本來我諗住响"二德惠"度買個一佰廿幾蚊嘅,
點知無貨, 剩返第二平嘅賣一佰六十幾蚊...
就係相差咗果四十幾蚊, 我又姑寒鬼上身,
走去買咗支十幾蚊嘅手動打蛋器,
結果發到我手軟呀.......................................

成個蛋糕最失敗嘅地方, 就係個面係凹凸不平嘅,
我以為放咗入雪櫃之後D cream cheese mixture係會自己沉吓沉吓"鄧"返平嘅,
所以當我第二日起身打開雪櫃見到個蛋糕時,
心裡面不奇言講咗聲大鑊呀!
個蛋糕好似月球表面呀!!!!

真係好感謝我屋企人, 無厭棄到呢個蛋糕,
大少話, 唔係睇表面嘅, 好食就得啦!!
我呀媽仲話用手發再加埋第一次整嘅話算係咁喇!
我仲同呢個蛋糕化咗妝, 加兩粒車厘子上去遮醜,
又插上蠟燭, 嘻嘻...
因為我係想預祝兔寶寶四個月大生日而整的,
大家見唔見兔寶寶都好俾面呀,
佢應該覺得個蛋糕好靚呀!
佢眼定定望住個蛋糕呢!
(其實佢係望住支蠟燭....)

除咗樣子衰D, D texture 比較軟之外, 其實食味都唔差架;
我諗有電動打蛋器會發得更好,
所以我已經決定買了.

第二時兔寶寶上幼稚園時, D家長要幫手預備生日會嘅食物,
我唔想到時剩係識得整三文治啫喱糖同埋菠蘿腸仔呀!
所以宜家要家人做白老鼠....
一步一步上, 先整好凍餅, 再學焗蛋糕...
反正兔寶寶瞓咗後我有大把時間整, 不過下次我會識就,
整細個D...