檸檬椰絲戚風蛋糕 * 自己玩一餐

2011年11月26日下午11:26

11月26日  星期六  晴天

尋晚焗咗個檸檬椰絲戚風呀!
大少同我都唔係十八廿二,
成日用六七隻蛋整蛋糕始終對健康都唔係咁好...
但係我唔整又唔代表唔會食,
出街買嚟食咪仲衰!
反正大少係咪都係食半個,
今次用咗4隻蛋咋!!

材料:
A. 蛋黃4隻 + 10克糖
B. 蛋白4隻 + 50克糖

A料遂少加入30克油, 拌勻;
加入45克橙汁及1湯匙檸檬汁後,
加約三至四湯匙椰絲;
加入55克低筋粉;
再加B料.

180度焗約20分鐘.
我見佢面頭金黃色用筷子測試過熟就取出了.
用橙汁代替水出嚟D顏色真係靚D架!
今次落得太少檸檬汁,
俾D椰絲味遮住晒, 完全食唔到檸檬味...

**************************************************************

兔寶寶食牙仔餅愈食愈叻,
今日俾一條佢, 好快就食晒,
而且唔係食得好污糟咋!!




不過我都唔敢俾太多佢食,
都係食兩塊咋,
費事佢無胃口食正餐啦!!

加插一段兔寶寶自己同自己玩一餐記:

兔寶寶首個元宵節 * 入屯門

2012年2月7日下午4:47

尋日元宵佳節, 我地走咗入屯門,
問呀媽拎個腰封, 因為我整親條腰呀!!
順便返入去行吓啦!!

兔寶寶不耐煩地等西鐵中...

入到屯門竟然落毛毛雨喎!
不過我依然帶咗兔寶寶去食陪住我長大嘅車仔麵,
仲有牛腩鳳爪豬腸粉等等,
希望呢檔鋪頭仔可以一路做落去,
如果佢執笠我會好失落架!!

之後去行街街, 行到咁上下,
搵間茶餐廳食下午茶...

兔寶寶: Daddy我可唔可以試下你杯咖啡呀?!

呢間茶餐廳嘅炒野都幾好食,
叫咗碟泰式炒金邊粉同埋招牌炒粉皮都好夠鑊氣.

大少放假嘅日子, 我好多時侯會撓埋雙手俾佢親手照顧兔寶寶.
兔寶寶可以同爸爸有多D接觸,
大少亦可以感受下我平時湊兔寶寶係點嘅...
就好似佢同完BB著衫之後,
佢以後都唔敢話我幫兔寶寶著件衫都"姐手姐腳"喇!!


 行街嘅時候經過一間酒樓,
响門口見佢裝修幾靚,
價錢又唔貴, 夜晚就响果度食.
睇佢佈置都係做婚宴架喇!

叫咗個餐, 包一條魚同兩個小菜,
都係$168.

豉油熟油另上, 條魚兔寶寶就有份食啦!!

跟餐小菜選咗椒鹽蝦.


仲有宮保雞丁.

再散叫多兩個餸,
呢個係唔記得乜野炒格格肉,
即係炒豬頸肉,
見佢28蚊平平地,
大少叫來佢一個人食.

再叫多另一個都係28蚊嘅生菜煲,
一共五個餸, 送埋紅豆沙,
埋單都係二百幾蚊.
呢間酒樓叫做帝廷皇宴呀!!

我地行到十一點幾,
買到一袋二袋,
直至個商場打烊先搭返西鐵回家去.

情人節 + 兔寶寶10個月生日前夕

2月14日  情人節  和暖

祝大家情人節快樂!!!

尋日係情人節 + 兔寶寶10個月生日前夕,
我地無特別地方去.
大少一起身就落附近公園跑步,
我就帶埋兔寶寶响公園玩.

大少跑到咁上下就過埋嚟同兔寶寶打鞦韆.
跑到成身汗, 兔寶寶似乎有D抗拒喎~

兔寶寶: 咦~ Daddy好大陣味呀!!

玩完一大餐就返屋企沖涼洗頭,
之後出尖沙咀食LUNCH.
早前我响團購網站買咗張pizza卷,
用四十幾蚊就可以換到兩件pizza加兩罐汽水,
原價要一百一十蚊架!
間鋪叫Paisano's Pizzeria,
離遠已經聞到一陣芝士味,
店員都係外籍人仕,
Open kitchen可以見到廚師响度整餅.
最出名嘅係佢地有24吋pizza,
真係食一個就飽!
而我地張pizza卷可以任選兩款12吋pizza,
我就選咗招牌pizza同埋教父pizza,
貪佢最多材料!

有黑橄欖嘅係招牌pizza,
佢地D pizza 係薄底而邊厚,
但即使係個邊都好好食,
一件12吋pizza食完都唔會好飽好滯,
我見間鋪好多女仔食客都食得晒,
我地後面果枱果兩個女仔仲order咗一個14吋pizza添!
大少話呢間pizza店絕對有一次,
即使無團購優惠都值得食喎!


大人食完就輪到BB食喇!
去咗 THE ONE商場餵奶換片,
見到情人節裝飾又影吓相...

响商場行街, 大少又買咗件褸,
行完都差不多六點, 餵多次奶就返去屋企果頭食晚飯,
去2000yen食放題.

我地梗係唔止食咁少野啦!
不過掛住食加埋兔寶寶响度扭計,
都唔影得咁多,
佢都有份食壽司-----下面果舊飯架!!

食完晚飯返屋企洗白白,
我已經散散地了.......
呢個兔寶寶, 玩得開心得滯,
點都唔肯瞓, 我地放佢响BB床,
熄晒所有燈等佢瞓,
佢都爬返起身, 企响張BB床度,
又笑又叫咁引人抱佢.
真係無佢辦法,
結果成屋人三點鐘先瞓!
 

兩日網誌

2月10日  星期五 寒冷

尋日個modem壞咗, 今日黃昏先約到師傅上嚟換過個modem,
差不多兩日無上網...
平時最多瞓五分鐘晏覺嘅兔寶寶竟然兩日都瞓到兩個鐘晏覺,
真係激C我喇!! 攪到我勁無聊呀!

尋日晏晝去咗飲茶..
乜野事笑得咁開心??

去咗食任食點心, 每籠兩件...

呢間野最好就係任食同散叫嘅食物質素都一樣好,
而且食客唔係好多, 環境清淨.
炸豆腐同雞絲海哲都好好味, 叫咗兩轉;
仲有甜品無影...

臨走有人跳桌上舞...

尋晚整咗炆豬軟骨.
我發覺湊住個B最好就係整炆野,
洗乾淨D肉出水之後丟落煲滷水汁度,
得閒走入去廚房開火熄火燘,
開/關幾次火, D肉實夠淋..
跟住同大少詐嬌: 我整咗成日架喇!!
呵呵! 我無講大話架!!


大少起身刷牙洗面幫我睇住個B,
我就整多碟蔬菜.
D茄子無走油就咁搵滾水出水, 所以顏色唔係太靚囉,
好彩大少都肯食咋!
不過呢碟餸落咗鹽, 兔寶寶無份食囉~

兔寶寶: 都無我份食, 眼不見為乾淨!!

豉油雞餐 * 睇baby TV

2月8日  星期三  寒冷

尋晚浸定隻豉油雞,
今日晏晝淥D豆苗煮個麵,
咁就解決一餐喇!!

開頭大人掛住食,
兔寶寶望住我地幾無奈呢!
呵呵, D菜無落調味料,
你都食得架!!
唔好望住我地隻雞啦~~

下午搬返張high chair俾佢坐吓,
之前佢唔係好肯坐,
我估係佢唔鍾意俾條安全帶綁住.

之前諗住等BB夠一嵗先俾baby TV佢睇,
不過呢一排我腰骨痛,
無咁多精力同佢玩,
睇下播D迪迪尼卡通英語會唔會為我帶來15分鐘自由時間.
同埋坐响high chair餵佢食野, 我條腰唔洗咁攰.

咦! OK喎! 幾聚精會神喎!!

睇到拍枱拍櫈加埋拍手...

口渴呀?! 自己飲水啦!!
以後我呢個呀媽撓埋雙手就得, 爽呀!!

發夢無咁早呀!
開頭都坐得好過癮嘅,
唔洗15分鐘發現俾人綁住咗落唔到地,
發晒"爛渣"呀!
平時唔洗5分鐘就食晒半個牛油果,
坐响high chair 度, 左扭右扭唔肯食...

兔寶寶: 放我落地呀!!!