MEGA BOX半日遊 * 芝麻天使蛋糕

11月2日  星期三 晴天

我地今日一早就去咗MEGA BOX喇!
MEGA BOX雖然地方唔就腳,
但係佢D鋪頭幾啱我行,
單單係"宜家"都夠我行成日!
又有荷花, 玩具反斗城同吉之島喎!
我就最鍾意行呢D賣家品同食物嘅商店喇!
反正我係一件衫唔著到佢穿窿都唔丟果D人,
所以有無衫賣反而係其次!

今次最主要係去宜家買煲, 一套五件都係百七蚊,

再買埋其他"立雜"野...
响Canteen食埋野, 又可以响果度餵埋奶,
宜家個哺乳室裝修到好似一間兒童睡房咁嘅呢!

求其坐响一張梳化度等DADDY去toilet出來...
有三隻狗仔襲擊兔寶寶呀!!


跟住我地仲去埋尖東買多部電腦呢!
今次我買咗部Net book,
反正我都係用嚟上吓網咁,
夠用就算喇!

忙咗成日,
大少就要返工,
兔寶寶就返屋企覺覺豬喇!

****************************************************
尋晚整嘅芝麻天使蛋糕...

跟返之前杯裝原味天使蛋糕嘅食譜,
加咗兩匙自己磨嘅芝麻粉...
低粉用晒仲未買, 改成用高粉;
今次因為用返之前整過嘅食譜,
有得比較之下,
我終於食得出用高筋粉整嘅蛋糕真係無咁鬆軟,
真係有少少似包喎!

第一次磨芝麻,
磨得耐得滯,
變咗芝麻醬添!
跟住磨短D時間先變返粉...

不過食完之後話覺得有沙喎!
俾佢激C!
我食過果D一粒粒明明係芝麻嚟架!
佢死都話係沙!
即係以後都唔洗磨芝麻做甜品俾佢食!

平淡的放假天

10月11日  星期二  陰天

尋日大少放假, 落雨濕濕,
都係留响屋企, 邊度都無去...

童軍總會果度間漢堡執咗,
開咗另一間"景逸軒",
下午茶時間走去試吓...

果度裝修都OK靚,
我諗都係預人擺酒掛?
下午茶時間好平, 平過聯邦,
兩個人叫八碟點心, 又食又拎都係一佰多一蚊...
有個午市餐好抵, 兩隻燒乳鴨加一碟炒粉麵都係八十幾蚊,
可惜我唔食/唔食得乳鴨(有說乳鴨收奶...),
陪唔倒大少試...
見其他人叫, D乳鴨都幾靚吓...

我係想post兔寶寶不同表情嘅相,
無可奈何之下要大家睇埋大少個樣!
我發現兔寶寶晏晝去飲茶比較乖D,
擺佢落BB車又得, 抱住又得,
夜晚去街比較扭計,
即使抱住佢都會响度尖叫!
但又唔係扭眼瞓喎~

呢幅相兔寶寶係企响度嫁,
而家識腳"young young"喇~~

之後途經一間食大尾魷嘅小店,
之前見過blog友介紹過,
於是走入去食咗碟灼魷魚!
影相嘅時候碟魷魚已經俾我地食咗好多!
食得出一定係好新鮮嘅魷魚,
好觧甜, 28蚊抵食!

返屋企時落雨, 我就一路响度EE鵝鵝;
因為上個禮拜我話幫買個BB車雨擋用,
大少話無咁嘅需要---落雨我唔會帶佢出街!
但好唔好彩我帶親佢出街都落雨!
每次都好狼狽, 每次我都鬧大少!
大少忍受唔倒我強勁嘅音波功,
送咗我地返屋企之後自己就走去永安買!
都話有D野唔慳得架啦!

除咗BB車雨擋,
大少仲買多半斤海蝦返來,
佢話經過街市見到D蝦平,
忍唔住買返半斤......
放落鍋灼之前都隻隻游水架!
呢度半斤40蚊,
大少話呢D海蝦一般都至少賣100蚊斤喎!

晚上又係去咗稻香打邊爐,
睇下,
兔寶寶有自己位子喇!!

婆婆餵糊仔--second round

10月10日 星期一  晴天

樓上由九點幾就鑽呀鑽,
不過兔寶寶就好似聽唔到咁,
繼續大覺瞓!
你話佢尋日同舅父玩到幾疲累呢!

婆婆雖然只係嚟咗一陣,
但依然身懷艱鉅任務!
兔寶寶等佢嚟開飯架!
應該話"開糊"至真...

一嚟就電一電婆婆,
等佢餵都餵得開心D...



做乜事"扁咀"?

兔寶寶:　係時候開餐喇，你仲影~~
婆婆: 你都變得幾快喎~

有野食, 即刻笑返...真係現實呀!!!

今次試"Holle"嘅有機米糊,
網上嘅comment都幾好,
至少係完全無添加先啦...
可能就係佢無添加, 咩味都無,
而我用返母乳嚟開, 奶味相對重D掛?!
兔寶寶食得比較好!!

兔寶寶: 媽咪, 係我醒咗至真...

食到"LUM LUM"脷~

除咗糊仔,
兔寶寶又自我發掘一兩味配菜,
例如"毑起"個口水肩嚟"賴兩賴",
又或者塞隻手入個口度,
都係想為平淡無奇嘅糊仔增加風味姐!!

姑寒媽咪怕兔寶寶唔食,
嘥晒D野, 所以少少少少咁開俾佢食,
每次一兩茶匙咁,
兔寶寶第一輪話咁快食晒,
無得食, 即刻咸返...好可憐呀!

兔寶寶: 我未飽架!! 人地發緊育咁嘛...

媽咪再準備糊仔期間,
唯有俾舊牙膠兔寶寶吊住癮先...

我咬, 我咬...
你睇我幾肉緊...

兔寶寶: 呢舊乜東東嚟架呢?! 又幾好食喎!! 唔錯唔錯...

仲可以當超級無敵烽火輪咁玩...
開心到口水都噴晒出嚟添, 失禮晒!!

新解熱辣糊仔到!

兔寶寶: 我好有table manner架,
唔會一路食一路玩...


至多都係一路食, 一路電暈婆婆, 咁至夠"CHOK"

兔寶寶: 邊個唔識我個"朵"...佐敦"烏咀兔"呀?!

婆婆餵完食糊仔之後,
仲跟手餵埋飲水添~
兔寶寶第一次飲水咋...
都肯飲喎!
仲諗住佢又會"BU"出嚟添~

兔寶寶: 你估我唔到嘅...哈哈哈~~

雲呢拿雪芳杯裝蛋糕

10月8日 星期六  晴天

今日大少同我講, 話佢尋晚去咗<大家食>食宵夜,
食少少野都食咗五十幾蚊...
吓~ 五十幾蚊食宵夜, 好誇張喎!
你又食咗咩呀??
佢話食咗蕃茄炒蛋, 賽狗肉同埋牛𦟌麵加杯豆漿...

咁我知喇!
人地一個麵配一個餸,
大少去親食麵都問人可唔可以加錢加餸,
加下加下, 條數去翠華食都得喇~
於是我就襯有時間焗咗蛋糕,
叫佢拎埋返工做茶點啦!!

前兩日買咗心型模...

今朝帶埋兔寶寶去圖書館借兩本烹飪書...
兔寶寶第一次去圖書館呀~~

食譜來自<<加料甜品王>>書.

雲呢拿雪芳杯裝蛋糕

材料:

低筋麵粉50克
發粉 半茶匙
蛋黃兩隻
蛋白兩隻
砂糖 55克(Total我用咗45克糖, 都覺得甜...)
植物油 2湯匙
清水 3湯匙


做法:
1. 拌勻蛋黃和25克砂糖, 加入植物油和清水, 拌勻.
2. 篩入低筋麵粉和發粉, 拌勻成麵糊.
3. 蛋白打至呈奶白色, 加入30克砂糖, 打至企身.
4. 拌勻所有材料, 倒入模中至7成滿, 放入
     已預熱之焗爐, 用180度焗20分鐘即成.
    (因為貪心, 我放到差不多全滿, 同焗咗18分鐘)

本書叫呢個做"雲呢拿雪芳杯裝蛋糕",
但睇晒全個食譜, 都無加過雲呢拿油之類嘅野,
所以應該叫"原味雪芳心心蛋糕"

個心型模可製六個蛋糕仔,
有多餘材料用咗鍚紙杯,
呢個, 叫咗大少攞俾佢拍擋試味...

呢個食譜做出來嘅蛋糕都幾好食,
而且唔洗用奶,
好方便, 我覺得好食過嘉頓...

*******************************************************************************

尋晚終於影到兔寶寶翻身:

最難忘的心太軟 * 婆婆餵糊仔

10月2日  星期日  陰天

今日呀媽嚟, 整咗個心太軟俾佢試吓!
以前同呀媽呀哥食完飯, 出去搵甜品食,
如果甜品鋪有心太軟, 都會叫一個三個人share食.
呢個係我焗第四個心太軟,
由雪櫃取出, 220度, 焗足8分鐘.
攞出嚟, 好好樣呀!

重點唔係响個心太軟度...

俾咗把刀呀媽進行切餅儀式,
見到D朱古力漿湧出, 我同呀媽都好開心呀...

我當然不忘影吓相啦~~
呀媽都好開心, 倆母女好似心有靈犀咁,
由呀媽拎住碟心太軟放近兔寶寶,
我就影吓相,
諗住影返張"兔寶寶有得睇無得食照"....
我提呀媽, 小心把刀呀, 兔寶寶會一野"禁"落去....

我其實都一路望到實...
不過, 兔寶寶實在太快手,
定係佢都好想食心太軟呢?
我只係影咗一張相,
佢就一野拍咗落去舊心太軟度...
成隻手成條褲都係朱古力漿,
有半舊心太軟飛咗出嚟去咗張梳化度...
一手都係朱古力漿嘅兔寶寶就揩落其他地方...
我比較少見多怪,
見到咁嘅情景, 忍唔住尖叫咗一下,
兔寶寶就俾我嘅尖叫聲嚇親,
繼而大哭起來...
場面一片混亂呀!

就係响影呢幅相之後嘅0.01秒,
就發生"兔寶寶搶食心太軟"事件喇!!


我將呢件事話俾返咗工嘅大少聽,
佢聽完之後係咁笑,
仲話: 你地(指我同呀媽)真係兩母女, 一樣咁論盡呀!!
大少, 你知唔知你咁講後果好嚴重,
夾埋兔寶寶來一招"三娘教子"架!

兔寶寶: 媽咪, 我係咪做錯事呀???

媽咪: 你不如食返糊仔啦!!

發生"兔寶寶搶食心太軟事件"之前,
試下由呀媽餵吓兔寶寶食糊仔, 睇下會唔會好D...