兔寶寶五個月大 * Focaccia with garlic and onion

9月14日  星期三  晴天

祝兔寶寶五個月大生日快樂!!

今日一起身發現兔寶寶"C"字型咁瞓响度,
對腳幾乎掂到個頭咁滯,
BB仔D骨真係軟,
拗腰拗得好勁!!!

今日我地仲發現佢下唇出緊隻牙仔添!
好快多一個月就可以同我地一齊食飯喇!!

咁開心嘅日子, 其實應該焗個蛋糕高興下,
不過晏晝又出咗街飲茶,
無時間焗又無時間食.
咁就用五分鐘時間焗個Focaccia,
反正屋企無晒麵包,
而且前幾日已經準備好個麵糰,
一焗起好香,
雖然我啱啱食飽咗,
但都忍唔住食咗1/3呀!!

今次我詳細記錄咗個做法.
材料:
高筋粉 260克, 鹽 小半湯匙, 依士 半湯匙, 水 220ml, 油 2湯匙
將以上材料攪勻直至見唔到粉粒為止.
仲可以加入芝麻, 亞麻子, 果仁碎呢D一齊攪...
如果覺得用木匙好難攪得勻,
可以落手攪兩野.

之後分兩盒,

蓋上盒蓋, 擺响廚房等兩個鐘

就可以可入雪櫃.
放入雪櫃前, 影幅相, 麵糰已經發得好大了.

12日內隨時攞出嚟, 整包又得,
整pizza又得.
前一晚預備好麵糰,
第二朝就焗得.

今次整Focaccia, 我就咁攞一盒麵糰出來,
稍為整一整形,
就可以刷上少少溶牛油,
(我貪方便用雪印牛油就算)
放上洋蔥同蒜片,
(因為無時間挅蒜蓉, 所以用蒜片)　
最後發酵20分鐘.

同時預熱焗爐200度左右,
就可以焗20分鐘.
今次我無放一盤熱水响底製造蒸汽,
改為焗焗下途中打開門噴水,
(成個焗嘅過程我噴咗兩次水)
咁嘅做法唔正宗,
但我覺得較為方便之餘,
麵包底部會香D,

本來咁樣已經食得, 但我又忍唔住加咗芝士,
仲要係加三種不同嘅芝士添...

再多焗兩三分鐘至芝士溶溶地就得...

攪到好似一個無肉嘅pizza咁添!
 一出爐食咗1/3,
剩餘嘅留返聽朝食....

要睇意大利蒜蓉香草包正宗做法,
請看:　五分鐘免搓包之義大利蒜蓉香草包

過火的燉蛋與燉奶

9月11日  星期日  晴天

中秋節快樂呀!!

有無人認得呢隻公仔呀?
佢係我守護神嚟嫁...
已經有20+歷史了,
本身佢係一個燈籠,
唔知點解我又好鍾意喎,
所以搬過咁多次屋都仲留得响度.
有無人記得....佢叫"呀班"呀!
如果你都記得, 咁即係話你應該同我差唔多大啦!!


等咗好耐, 聽晚我又有機會親自下廚,
煮我同大少的中秋節大餐了.
聽日仲係兔寶寶同我地過第一個中秋節呢!
好開心呀!
希望唔好落雨, 食完飯仲要去賞月呢!
雖然我唔鍾意食月餅,
但自細就好喜歡中秋節,
因為中秋前後都可以攞正牌夜瞓!
仲可以出街玩蠟燭!

已經諗好聽日煮乜餸,
希望成功啦!
夜媽媽得閒, 見到網上有一蛋兩焗嘅方法,
好似好簡單,
材料只係一隻蛋, 三匙糖以及200ml牛奶,
就可以整出燉蛋燉奶各一杯.
整定放入雪櫃聽晚食都好喎~

但係, 我失敗咗,
應該係火力太猛,
臨急臨忙間又忘記了加水响盤底焗,
所以個面無上次做蛋撻咁靚.
嗚嗚嗚, 早知跟返上次焗蛋撻個食譜啦...
見到咁嘅樣, 都未試食呀,
成盤俾我放落雪櫃,
聽日先算喇!

*****************************************************************************************

睇吓手多多嘅兔寶寶又想攪個搖控,
以為佢想"禁"D制啦,
原來佢想擺入口咬呀!!

唔止咬搖控, 又捉住我隻手放入口,
坐坐吓唔知係無聊定肚餓,
擰轉面咬張梳化....
我係咪生咗個"小吉"出嚟??

祝大家秋節快樂, 人月兩團圓!!

錯有錯著 の 鹽焗花生

9月10日  星期六  晴天

做這個鹽焗花生,
是因為想學T&P咁整糖衣果仁;
初次做諗住慳皮用住花生先啦!
點知去街市南貨鋪買花生時俾個呀姐呃咗,
問佢係咪得連衣嘅買佢話係,
再問佢用來焗係買有衣嘅定無衣嘅,
佢話用來做乜都係買有衣嫁啦!
仲反問我無衣嘅點焗呢?!
咁叫佢稱半斤來睇吓有幾多,
半斤看上來好似好少喎~
咁就買夠一斤....

返到屋企愈諗愈唔對路,
紳士牌果D蜜糖花生好似係無衣嫁喎~
而且大少食花生唔食衣,
再上網睇吓其他焗花生嘅食譜,
如果係做甜嘅都係要用無衣嘅.
死唔順氣留言問吓T&P,
T&P好好人, 好快就覆返我,
糖衣花生真係要用無衣嫁!

咁就唔博喇, 費事整咗side料.
既然搵過食譜, 有衣花生通常用來鹽焗,
咁就錯有錯著整"鹽焗花生".

避免大少食嘅時候會攪到週圍都係花生衣,
所以我做多一步, 去埋層衣先....



食譜:
將花生先以150度焗12分鐘,
取出用木匙炒一炒,
再焗12分鐘.
取出待冷, 用手刷吓佢就可以去衣,
把花生入瓶, 加上少量幼鹽,
蓋上蓋子搖勻令每粒花生均沾上幼鹽.

D花生由焗爐取出後還會繼續烤,
所以應該响變金黃色前就取出.
我分咗兩盤焗,
第一盤燶咗少少,
第二盤好D,
所以真係要睇火呀~

另外屋企有盒豬肉就快過期,
整埋豬肉乾用來孝敬兔寶寶爺爺嫲嫲...
上次整果D原本大少話拎去俾人試食,
點知中途佢自己食吓一塊又一塊咁食鬼晒呀!

大晒冷:

大家掛唔掛住兔寶寶呀?
佢仲有兩聲咳,
不過依然好精神呀!
今日仲同我爭玩部電腦添!
佢要"禁"個keybroad呀!!

兔寶寶出院了~~

9 月8日  星期四  晴天

兔寶寶尋日出院喇,
响醫院時唔多覺累,
一返到屋企好似虛脫咁,
尋晚掛住休息都無updated個blog,
多謝大家的關心兔寶寶呀!

激死人喇,
用咗幾小時打咗一大篇,
就係唔記得响Note pad度打咗先,
唔知按錯咩制,
臨尾成篇無晒! 得返上文!
無心機再打!
有機會先補返!
睇住相先啦!


***********************************************************
9月9日  星期五 8:05a.m.
忍唔住一早起身打返,
怕耐咗唔記得!!

兔寶寶係星期日開始有兩聲咳,
見佢無發燒,
食慾同精神都幾好,
捱卟捱吓等到星期二返QE覆甲狀腺時先順便睇埋,
果時真係咳幾吓同流吓鼻水咁,
以為佢冷親呀~
諗住醫生開D藥水就OK...

個醫生一check,
就話佢有小小好輕微嘅支氣管炎,
本來開D藥水就得,
但咁細個BB呢, 就無合適嘅藥食,
要入醫院"聞氣"...
佢仲話醫院而家收咗好多類似徵狀嘅BB,
都係要入院聞氣,
通常住一兩日就好,
叫我唔洗擔心.

我最就驚就係好似初生嬰兒病房咁,
限時限刻去探病,
兔寶寶就唔知點食奶,
因為佢要埋身餵先肯食,
人肉奶瓶唔响度, 咁佢點開餐呢?

上到病房先知我嘅擔心係多餘嘅,
兔寶寶已經過咗初生BB嘅階段,
可以入普通嬰兒病房,
一間房有7張BB床,
每張BB床隔離都有張梳化床,
晚上容許父母其中一位"陪瞓";
24小時都可以貼身照顧兔寶寶...
而果間房係專收類似呼叫道病徵要"聞氣"嘅BB.

問過醫生, 佢話兔寶寶唔係酵喘,
亦都唔關冷親事,
係空氣四周都有病菌,
都無可避免會吸入果隻唔知咩"胞子"嘅菌.
大少話佢兒子細過都試過,
又係要入院聞氣,
聞完後就無事喎~

我見病房入面D BB又真係個個都龍精虎猛,
一D都唔似有病!!
一共五個BB,
其中一個BB得兩個多月大,
其餘嘅都大過一嵗,
所以兔寶寶一入到病房,
其他大BB就即刻好興奮咁話:"BB呀"...
兔寶寶睇定環境之後,
仲開心過响屋企,
有人撩佢玩佢咔咔笑,
無人同佢玩, 剩係睇人玩佢都笑埋一份,
D人話佢係開心BB呀!
我諗佢係見到差不多年紀嘅BB所以咁開心!!

其實响病房除咗聞氣之外,
都無咩攪作,
所以可以影好多相,
我仲有時間睇完一本書!
不過兔寶寶就掛住玩同八掛唔多肯瞓,
要晚上所有人瞓晒先瞓一陣,
一有聲又醒!

到第二日醫生話兔寶寶情況隱定,
(照我睇呢, 無好過無差過...)
如果我地自己買一個附助工具俾兔寶寶"聞氣",
就唔需要依賴醫院嘅大機器,
可以返屋企繼續聞!
可以走得就緊係買啦, 又唔係貴,
好過三個人都瞓唔倒!

咁就轉咗一隻噴藥,
個樣好似人地酵喘病人用果D咁,
而我地買嘅儀器就係一個chamber跟一個面罩,
等兔寶寶可以吸入D噴霧嘅,
醫院樓下復康店有得買, 二佰幾蚊.
姑娘教完我用一次,
又睇過我用一次之後, 觀察吓兔寶寶轉藥嘅情況,
就可以出院了!

返到屋企,
我同兔寶寶都即刻大昏迷呀!
一抱返隻爛玩豬去佢自己張床,
佢就好似食咗迷藥咁樣,
即刻陷入熟睡狀態,
你話佢响醫院捱咗幾耐眼瞓呢?!
而我都好累,
所以都瞓咗OVER 10個鐘...

兔寶寶返到屋企休息完後,
好似醒咗又大力咗咁,
對手仔有力咗同敏捷咗,
又好像聽得明我講野咁,
聞氣時合作咗好多!
唔知係咪近得多大bb多呢?!
尋晚佢仲爭d就自己翻倒身添!

今次入醫院對我嚟講都唔係無得著嫁,
我就熟練咗响公眾地方餵奶,
因為病房層嘅"母乳室"離bb床太遠,
而且所謂嘅"母乳室"只係醫院嘅文件室;
有媽媽餵奶就關上門(無鎖無廉)响門口掛上男仕不得進入嘅牌,
不過d姑娘就會出出入入咁攞野!
同埋果度只係一間房, 一張舒服d嘅椅都無,
全部枱櫈都硬掘掘, 整理衣衫時都唔知放兔寶寶响邊度好!

見到隔離床位外籍媽媽都係响病房毑起件衫就餵,
我都依樣畫葫蘆,
雖然房間裡有其他bb嘅爸爸都在,
但人地應該唔會故意"裝"我嘛!
同埋餵咁多次後,
我就練得技巧,
別人看來都係bb响懷裡瞓覺咋!

到宜家兔寶寶仲有兩聲咳,
鼻水就無喇,
"聞氣"療程仲有一日,
希望到時bb乜事都無啦!!