Veritas's Blog: 兔寶寶0-1個月

5月14日星期六滿月

5月14日星期六晴/雨

滿月

上個月嘅今日, 我好辛苦咁生咗兔寶寶, 開始咗我做媽媽嘅生涯;
一個月過去, 兔寶寶今日滿月, 而我亦都放監, 結束我坐月嘅日子喇!

今日我地下晝就帶埋兔寶寶去飲茶....
可能大家都唔多夠瞓, 心煩氣燥之下, 我同大少响酒樓為咗D雞毛蒜皮嘅事而嘈....

實則為咩嘈呢, 真係唔記得了...
好在大家都好了解, 只不過要一個下台階, 好快就無事了...

我真係要收歛一下, 唔可以响兔寶寶面前嘈嫁!!!

下午婆婆幫兔寶寶用碌柚葉沖涼...

兔寶寶: 影我露點嘅相影靚D呀~

兔寶寶, 唔洗驚.....你皮膚咁黑, 三點都睇唔倒, 係見到肚臍咋~~

沖完涼, 食一陣間奶又搵周公....

點整都唔醒....

失驚無神笑一笑, 問你死未?!

要拜神LU...

拜天....

兔寶寶: 我唔拜呀~~

拜土地同祖先啦~

婆婆極力協助兔寶寶做一個拜神嘅手勢, 不過兔寶寶就睬你都傻, 繼續搵周公....

直至拜完神, 攪掂晒...
抱番佢上床....慢慢瞓啦~~

眼仔look look.....唔瞓LU.....吹脹~~

****************************************************************

"呢hea"

5月12日星期四炎熱

今日同兔寶寶沖涼時超"呢hea"呀!

沖涼前, 瞓得好安寧...

熟睡定乍瞓?!

兔寶寶: 影完未呀?!

媽咪:　係都要整醒你呀～～

每次沖涼前我都會同佢剝光豬, 抱住佢洗咗頭先, 怕D水入咗佢耳仔....
雖然之前都試過洗洗吓頭佢痾尿响我身上, 今次佢係痾C呀!

真係左右為難囉, 都唔知等佢痾埋先沖涼定包條片等佢痾完先沖.....
仲要我件衫都有"黃金", 除出嚟洗果時都驚"high"落塊面度....

最後我地都係決定快手快腳沖埋先....

兔寶寶果然响我地差不多沖完時又再bu bu la~~

兔寶寶：　做咩咁快抱我上水喎~

兔寶寶: 唔制呀~ 我要响浴缸度bu bu 呀!

5月10日星期二佛誕

5月10日星期二佛誕

好似好耐無寫blog了, 其實我日日都有巡blog, 不過係對手唔係太得閒打字呀!!

呢幾日兔寶寶食多咗奶, 仲要係自動自覺起身, 夠鐘就醒, 甚至乎, 未夠鐘都曉嘈要食奶喇!! 而家我遇到嘅另一個問題, 就係掃風喇!!

兔寶寶出世頭10日, 因為食得少, 再加埋醫院入面有個姑娘同我講, 話食人奶嘅B係未必次次响掃風時都會""err"", 所以初時我都係掃幾掃就算, 兔寶寶又無嘔奶喎~

而家食多咗, 掃得唔好, 放低佢一陣, D奶就會响口邊嘔番出嚟. 於是我一再加長每次掃風嘅時間...我又參考網上面坊間流傳嘅掃風方法:

一. 最standard果種, 即係放BB响大脾, 一隻手嘅虎口托住BB嘅下巴位, 一隻手掃;

二. 將BB打直抱, BB頭放上大人肩膀位置, 大人一隻手托住BB pet pet, 一隻手掃.

以上呢兩種方法, 重點係要保持BB個身體廷直.