好似好耐無寫blog了, 其實我日日都有巡blog, 不過係對手唔係太得閒打字呀!!
呢幾日兔寶寶食多咗奶, 仲要係自動自覺起身, 夠鐘就醒, 甚至乎, 未夠鐘都曉嘈要食奶喇!! 而家我遇到嘅另一個問題, 就係掃風喇!!
兔寶寶出世頭10日, 因為食得少, 再加埋醫院入面有個姑娘同我講, 話食人奶嘅B係未必次次响掃風時都會""err"", 所以初時我都係掃幾掃就算, 兔寶寶又無嘔奶喎~
而家食多咗, 掃得唔好, 放低佢一陣, D奶就會响口邊嘔番出嚟. 於是我一再加長每次掃風嘅時間...我又參考網上面坊間流傳嘅掃風方法:
一. 最standard果種, 即係放BB响大脾, 一隻手嘅虎口托住BB嘅下巴位, 一隻手掃;
二. 將BB打直抱, BB頭放上大人肩膀位置, 大人一隻手托住BB pet pet, 一隻手掃.
以上呢兩種方法, 重點係要保持BB個身體廷直.
三. 放BB坐响大睥, 大人一隻手托住BB後尾枕, 一隻手輕輕膀住BB心口, 慢慢轉BB.
第三個方法, 兔寶寶唔太鍾意, 初初轉佢佢會喊, 知道喊係無用之後佢而家識得縮起個身, 撐衡對腳, 總之令你轉佢唔到. 而且我唔見正規D嘅機構網站有介紹呢個方法去掃風, 所以轉得幾次就放棄了...
除咗鑽研掃風方法, 我仲研究掃風嘅力度同位置..... 我嘅努力, 暫時嚟講, 係白費嫁
!!
連大少嘅掃風技巧都比我好! 大少仲好得意咁抱住兔寶寶掃風, 之後左一句:"err咗喇" , 右一句:"又err 多一次!" 真係激死我喇!
因為我掃極都err唔到!! 直至目前為止, 我掃風兔寶寶只係err過兩三次, 每次err唔出我抱低佢嘅時候都好驚佢會嘔奶呀!!
兔寶寶又未曉自己坐....就係咁, 每次我幫佢掃完風, 我都會做人肉椅子, 半抱住兔寶寶起碼15分鐘.....半夜起身餵奶加掃風再加埋抱, 真係極級挑戰我嘅耐力呀.....
母親萬歲!!
而啱啱過去嘅母親節, 我媽同我哥就响我毫不知情嘅情況下買埋蛋糕上咗嚟, 不過兔寶寶果日唔知點解好好瞓, 令到大家都好失望呢!! 兔寶寶, 出年要叫婆婆喇!!
又係大少至鐘意嘅藍梅cheese cake ar!!
*******************************************************************
沒有留言:
張貼留言