育兒雜記。。。戒片

10月15日 星期二  晴天

星期日這天,

替兔寶寶紥頭髮後心血來潮把前蔭大刀一揮剪短...

由於夠快手, 呀B零知覺, 自然無投訴啦!

和姐姐下午茶

10月12日 星期六  晴天

前日大少好早就返咗工, 

為免整日在家成為宅婦與宅B,

於是就約樓下Office姐姐一起吃午餐.

姐姐提議去Delifrance吃,

怕呀B去到呢樣唔食果樣唔食, 

就早少少煮D野俾佢食咗先, 

咁就可以叫甜品食喇~

坐底無幾耐, 姐姐出去買野,

兔寶寶以為俾人賣甩, 

無晒心機..

悠閒一天

10月11日  星期五  晴天

星期三大少放假, 

因為佢生咗D濕疹要睇醫生, 

加上痕痒, 都無去D乜野特別地方.

在家吃過簡單午餐後, 

我帶兔寶寶去公園玩等大少睇醫生...

呢個時候個個都返晒學, 公園得一兩個小朋友...

 

分享

10月10日  星期四  晴天

星期二去了稻香飲下午茶, 

兔寶寶手裡拿著一隻出奇蛋, 

是幾天前吃早餐時婆婆贈送的,

一直放在身邊當寶的看管著...(當然是因為無大人幫佢開先keep得咁好啦!)

在酒樓遇上一位大佢一天的哥哥仔, 

兔寶寶竟然把那隻出奇蛋轉送, 

又幾大方喎~

食拉麵 @ 魂

10月8日  星期二  晴天

尋晚舅父提早放工睇完醫生過來整野, 

先去食晚飯.

揀咗去食拉麵, 因為兩母女都喜愛.

大少揸車去奶奶家時都會經過呢間"魂"拉麵店,

門外常會出現長龍, 所以想試吃很久了.

要食又唔想排隧, 唯有早D去等佢開門.

全間店主要賣四款麵, 

應該話係四種不同嘅湯底先啱...

除了辣的沒試, 其餘三種我們都試了.

對呀, 兔寶寶一個人差不多吃了一碗,

離開時那唯一的一個侍應+收銀+知客靚姐姐都笑她肚皮大了...

又係雜記

10月7日  星期一  晴天

早幾日响價真棧買咗筒聰明豆,
請兔寶寶食四粒後, 
懶安全咁放咗响櫃頂, 以免小童誤服...
前日天氣涼熄咗幾個鐘頭冷氣, 
咁就放咗隻蚊入來, 我同兔寶寶都被咬了幾口...
臨出街前就打算點個蚊香放上櫃頂驅蚊.

點知一時睇唔到筒聰明豆,
成筒倒晒落地, 週圍都係朱古力豆.
這下兔寶寶可樂了,
雖然我猛咁叫佢唔好執來食,
佢又點會聽呢?

估唔到一向慢吞吞嘅兔寶寶都有極其敏捷的一面,
我執起一粒, 佢已經把三粒塞入口了.
那一刻我想到電影中經常出現的走難場面: 個主角跌了一袋錢, 不斷叫人唔好執, 而D途人又不斷執入自己個袋...
幸好那時呀B剛吃完飯, 肚子並不餓,
才大大減低了戰鬥力. 
執完倒返入個筒, 原來佢已經食咗半筒了....

雜記

10月5日  星期六  晴天

今日好忙呀!
一早就去咗一間幼稚園參觀,
我估呢間係名校掛?! 
响三十分鐘嘅講座入面, 
個校長花咗差不多十分鐘時間去同家長做定落選嘅心理輔導...
又話基本上唔出聲內向嘅小朋友機會都唔大..
即係兔寶寶都無乜機會入圍啦!
平時除咗say hello同講bye bye之外,
佢都唔多同陌生人講野嘅...

不過兔寶寶算乖喇~
成個talk都安安靜靜坐响度, 
參觀時又斯斯文文咁...

參觀完學校, 
返屋企休息一個鐘, 食D野,
兔寶寶又要上堂喇~
第一次參加跳舞班,
其實都係唱吓歌做吓動作.
呢個班係唔俾家長陪同嘅,
俾我有時間去買吓餸.
放學時老師話有一刻兔寶寶想喊,
但都無喊到出來, 
評語係話佢好乖, 好聽話...
咁我個心都安樂D.

瑞士雞脾仔

10月5日  星期六  晴天

早兩日煮了午餐, 

有豉油王炒伊麵.

伊麵是前一天去飲茶食唔晒打包返來的,

打包的這些部份都沒有了汁, 所以加D老抽炒.

晚餐。嫲嫲煮

10月4日 星期五  晴天

續: 放假一天

兔寶寶果然不出所料抱住一陣就瞓著咗..
於是我地就改乘的士前往嫲嫲家...
比步行快了很多, 到達時餸菜仲未煮好.
本來想借頭借路入廚房偷下師,
點知俾嫲嫲趕了出來...
偷師無望, 就影吓兩父女.

放假一天

10月3日 星期四  晴天

尋日大少放假, 

兔寶寶前一日無午睡, 一早就瞓, 

四五點叫醒我話要食麵麵, 

食完野玩到成八點幾先再瞓..

瞓醒已經係下午十二點幾, 

快D起身, 我地約咗同爺爺嫲嫲飲茶呀!

簡單午餐

10月2日  星期三  晴天

呢排好多時都唔等埋大少一齊食午飯,

通常兔寶寶最先吃;

而我近排又好辣,

所以同呀B食唔同嘅食物.

呢日我就食鯪魚球米粉, 

加D辣椒醬就啱晒我口味了.

鯪魚球是奶奶自己打的.

失敗了的"幻想芝麻糕"

10月1日  星期二  晴天

有時瞓唔著,
我會在腦中幻想很多離奇的煮意,
有些雖然是奇怪少許, 
但都是可行的, 
即使不屬於美味但都可以勉強吞落肚.
煮嘅過程中一直盼望、幻想味道是如何, 
那不是不好玩的...

秋天的童話

9月30日 星期一  陰天

最近天氣無咁熱, 

久不久有陣風, 秋天到喇, 

好舒服呀!

猴頭菇花旗參湯

9月28日 星期六  晴天

今朝一早帶咗兔寶寶去第一間幼稚園面試呀!
呢間之前都做過N班interview,
收咗做waiting list架~
點名後好快就叫咗兔寶寶個名.
原來佢同另外幾位同學因為報過N班, 
所以有優先呢!
果位老師強調咗優先幾次, 
加上interview時兔寶寶又無乜大問題, 
估計呢間收呀B讀K1嘅機會好大呀!
一個月左右就會收到正式通知, 
希望到時唔好滑鐵爐啦!

下午留在家, 
兩母女大被同眠, 竟然一瞓瞓足三個鐘!
希望呀B今晚唔會失眠啦!
臨瞓前煲落湯, 瞓醒就有湯飲喇~
好彩有較鬧鐘熄火咋~

今次煲猴頭菇湯, 
惠康特價猴頭菇湯包, 
包括猴頭菇花旗參湯、猴頭菇花膠和猴頭菇螺片湯..
三包再送一小包舞茸乾都係八十八個幾.
我自己再另外加多三粒猴頭菇落去...

煲起唔係好多咋, 

留起兩碗俾大少之後, 自己都飲到唔夠喉.

大陸兩日一夜之旅

9月27日  星期五  晴天

去到深圳時間尚早, 
我地先去唱K, 順便食埋K LUNCH醫肚...
兔寶寶就對個咪好有興趣, 仲首次開金口唱歌贈慶添~
唱咩歌?! 咪ABC同Animal Song呢類兒歌囉..
我地呢間房應該係最清純同最有童真架喇~

野食都係D點心呀同炒小菜呢D, buffet形式, 
都幾好食.

呀B又要拎咪又要食雪糕, 好忙.

不過佢幾有K品, 

知道邊首歌係佢嘅, 

唔屬於佢嘅歌就立刻放低支咪, 唔會搶晒咪咁...

****************************

食完野, 就返按摩院..

預計兔寶寶咁早起身, 應該要瞓返覺...

點知佢仲精神過我! 四圍撩人玩,

無人同佢玩都可以自己笑一餐...

按咗兩個鐘頭腳, 就換返自己衫出去食飯.

呢幅相, 兩父女個樣都好正經...

但focus一定係呀兔小姐隻手, 放咗响邊?!

大少你點樣E起棚牙都係唔夠兔小姐隻手搶鏡架喇~

不久, 兔寶寶主動痴埋DADDY度, 仲錫咗佢一吓, 

氹得大少鬼咁開心...

原來...係另有企圖架~

兔寶寶: 咩姐?! 人地眼瞓吖嘛~

*********************

呢間食肆係以雞出名嘅, 

於是我地叫咗兩道雞嘅菜式.

分別係口水雞....

和白切雞...

由於雞隻新鮮, 我們都覺得白切雞更好吃.

雞皮爽而薄, 一點肥膏也沒有,

雖然我還是吐了出來...

還有茶樹菇釀豆腐煲.

豆腐都是這裡的拿手菜.

仲有涼粉, 

這個嫌它不夠辣, 而且那汁是和口水雞的相同, 

有點重複的味道, 就覺得不太好吃.

乳鴿特價十八蚊人仔, 

大少要了一隻, 食唔晒又迫我食咗舊...

喂, 留D quota俾我食雞好喎~

扇貝是我叫的, 

都係果句, 早知就留返D quota食雞..

咁多野兩個人食, 食到肚都漲了..

兔小姐呢?! 就由頭瞓到尾...

等佢長大睇到下面呢幅圖,

應該會講句: "世上只有爸爸好!"

埋單百多元...

在大陸食野, 還是便宜的.

到我地食剩幾舊雞, 兔小姐就起來了.

不過還是未瞓醒咁樣, 後來還扭計大哭呢!

******************************

食完晚飯經過一理髮店, 

洗剪吹只是三十蚊人仔.

和大少早就商議好今次一行要帶埋兔寶寶去剪髮了...

大少話大陸D師傅會比香港的細心...

係咪好期待兔寶寶剪成點呢?!

Sorry, 果位呀叔摸得兩摸兔寶寶把秀髮, 

而我還未同佢確認點剪前, 

兔小姐已經洞悉把秀髮有危機, 然後大哭大叫...

要大少帶佢出去出面玩機動車先肯收聲

(事後我懷疑, 她是早有預謀架囉~)

攪了人家一大輪, 覺得很不好意思, 

於是呀B唔剪, 我剪!

反正我D頭髮咁長, 佢剪得幾衰都有得補救嘅...

第一次在大陸洗頭...

感覺: 很舒服!

怪不得咁多男人要返大陸洗頭啦!

舒服到大少和呀B返入來時, 我叫大少都洗埋一份...

就係咁, 本來係幫BB剪頭髮, 

兔小姐返香港時仍然係頭髮篤篤, 

而我和大少就換上新髮型喇~

*****************************

第二朝我們還吃了早餐才返回香港...

這早餐包括皮蛋瘦肉粥, 和蟹粉豆腐煲.

呢兩樣野呀B都係唔食的, 擺明係大少叫架喇~

事實上呢兩日兔寶寶都掛住玩多過食, 

粥粉麵飯菜肉魚樣樣唔啱, 

只肯吃餅乾充飢, 還有西瓜解渴.

驚嚇

9月26日  星期四  晴天

尋日我地返咗大陸呀!

有一間响屋企附近嘅幼稚園講明係呢兩三日先會收報名表, 
唔想返嚟先至交, 
於是我一早就起身就去幼稚園交表喇!
去到都係八點三, 响門口出面貼住張告示話八點半先開始交表, 
於是我就跟响個男人前面等八點半...當然愈來愈多家長跟尾啦!
心諗好彩決定返大陸,  我先會咁神心一早排第二姐.
無幾耐有個校工開門並指示我地行去二樓禮堂報名.

原來已經有十幾名家長排緊!
有無咁誇呀!
我一路排, 後面就不斷有家長來..
以咁嘅速度計, 佢咪收埋收埋好多報名表?!
呢兩年咁多BB出世, 真係擔心究竟夠唔夠學額...

好, 攪掂晒D野, 
我就起身摷醒兩父女出發喇~
呀B瞓到成個八月十五向天都要起身喇~

今次只係去兩日, 唔早D起身出發唔夠時間用呢!
兔寶寶揹著水壺, 袋住包餅, 
好似準備去野餐咁...不過就明顯唔夠瞓, 
雙目浮腫...

 
我地搭過海巴士去紅磡轉火車.
落咗巴士之後, 通常我們向前行爬樓梯上上面火車站.
今次就意識到向後行係有扶手電梯的..
於是就乘扶手電梯.
當時人不多, 大少推著BB吉車,  
而我就拖著兔寶寶等大少先行.

當大少上了扶手電梯幾級, 
而我都準備踏步上前之際,
有一個老人(其實又唔係好老, 六七十嵗左右啦)竟然從扶手電梯跌下, 而且係頭先落地!
眼看那老人頭下腳上咁跌了幾級, 

我好驚咁倒後, 和後面準備上電梯的人都驚慌不已...
個呀伯由上面跌落地面的話, 唔C條腰都唔洗要喇~
由於只係好快嘅時間, 
都不知大少係鬆手有得架BB車向後跌頂係佢安置好架車先了
(後來大少都話自己唔記得)
只見佢飛快跑上托起呀伯雙肩等個頭唔洗受傷...

跟住嘅係大少話俾我知的,
因為條電梯升到去一個我睇唔到嘅位置.
佢話走上去托住呀伯時, 
其實都被佢嘅重力推了一下, 幾乎都仆埋落去, 
好彩佢夠大隻推返起個呀伯企直, 
而個呀伯都只係輕傷...如果真係咁跌落地面就大件事喇~

成個畫面很觸目驚心, 
但這件事發生後大少個頭馬上出現了一個光環, 
我還是第一次覺得大少很英雄呢!
但也令我深深體會到, 
扶手電梯真的很危險.

荒唐

9月25日  星期三  晴天

尋日大少無帶鑰匙, 
打來叫我一係放條鑰匙响門口地毯下面, 
一係等埋佢打完邊爐先瞓...
見唔係好夜就等埋佢先啦!
好彩咋, 原來樓下度大閘都鎖埋,
如果我瞓咗都唔知邊個開門俾佢!

呢樣都唔係重點.
大少响樓下打俾我, 
叫我响窗口同佢揮手,
確定我見到佢之後, 
佢竟然...叫我從窗口拋條鑰匙落條馬路等佢執!


果一刻我直頭覺得大少係short架!
咁荒唐嘅方法都俾佢想得出..
雖然我地只係住四樓條街又無乜人姐, 
丟咗落樓下馬路都可以執得返,
萬一跌落巴士頂呢? 萬一跌落樓下簷篷呢?
又萬一...我真係唔想為咗慳少少時間俾人拉咗去坐監LAW.

**************
為咗報答我等佢返屋企,
大少又拎咗盒三寶丸來....

呢盒野要百幾蚊,
我覺得唔值囉! 折現好過啦!

**************

第二日去咗飲茶, 
兔寶寶見到奶皇包好興奮,
不過今次醒目咗, 試下個籠熱唔熱先~

唔係好熱姐!

咁就可以篤吓佢喇~

噢, 原來真係好熱架!

 

天兔走後的午餐

9月24日  星期二  晴天

呢個天兔真係奇怪啊!
仲以為佢好強勁啦, 
點知大風大雨咗半晚就鬼咁好天...
等我買晒D餸諗住煮乜煮物俾呀大少食.
家下就真係焗住要我煮喇!

尋日晏晝就煲個湯, 煮個餸又一餐.
湯係大風大雨果時瞓唔著煲嘅, 
用湯包煲, 一包已包括晒姫松茸、茶樹菇、雲芝、女貞子、白芍沙參杞子等材料.
愈來愈發覺呢D湯包超方便, 
放塊肉加舊蘿蔔已經好好飲.
在飲食展時買又不貴喎!
一百蚊已經有四五包, 
計埋肉呀蘿蔔粟米呢D都不過三四十蚊,
仲抵過煲青紅蘿蔔湯...

咁早起身唔爭在炆多個餸,
唔係沙嗲, 唔係咖哩, 
係响鏡記麵店買嘅魷魚醬炆.
果樽魷魚醬本來係俾人撈麵食的,
辣辣地超惹味, 於是就想到用來炆餸.

兔寶寶之餐食剩的幾塊牛肉, 
都在汁料裡灼埋來吃了...

加多碟菜, 食返D纖維.

兔寶寶唔食, 要餵公仔,
仲自己拎條毛巾鋪著,
一面餵一面幫公仔抺咀...