朱古力芝士忌廉卷蛋

9月10日  星期二  晴天

朱古力和芝士忌廉都快到期了,
上星期用它們做了一條卷蛋..

檸檬椰絲戚風蛋糕 * 自己玩一餐

2011年11月26日下午11:26

11月26日  星期六  晴天

尋晚焗咗個檸檬椰絲戚風呀!
大少同我都唔係十八廿二,
成日用六七隻蛋整蛋糕始終對健康都唔係咁好...
但係我唔整又唔代表唔會食,
出街買嚟食咪仲衰!
反正大少係咪都係食半個,
今次用咗4隻蛋咋!!

材料:
A. 蛋黃4隻 + 10克糖
B. 蛋白4隻 + 50克糖

A料遂少加入30克油, 拌勻;
加入45克橙汁及1湯匙檸檬汁後,
加約三至四湯匙椰絲;
加入55克低筋粉;
再加B料.

180度焗約20分鐘.
我見佢面頭金黃色用筷子測試過熟就取出了.
用橙汁代替水出嚟D顏色真係靚D架!
今次落得太少檸檬汁,
俾D椰絲味遮住晒, 完全食唔到檸檬味...

**************************************************************

兔寶寶食牙仔餅愈食愈叻,
今日俾一條佢, 好快就食晒,
而且唔係食得好污糟咋!!




不過我都唔敢俾太多佢食,
都係食兩塊咋,
費事佢無胃口食正餐啦!!

加插一段兔寶寶自己同自己玩一餐記:

薑汁南瓜天使蛋糕

10月7日 星期五  秋涼

又係戚風蛋糕...
整戚風真係會上癮嫁!!

今次加咗差不多一杯南瓜落去,
焗出來好金黃, 表面裂得幾靚...

由於加多咗南瓜, 材料足夠整多兩個蛋糕仔...


唔知係咪南瓜多得滯,
所以個蛋糕一出爐後就唔夠力支撐,
收縮咗好多, 攪到樣衰衰咁...

連細嘅蛋糕仔都下陷埋....

不過呢個蛋糕質地帶濕,
幾好食喎, 因為之前焗嘅戚風都無加油,
會有少少旱, 但呢個加多咗南瓜,
又完全唔覺得旱...
雪凍食都幾好食...

又係焗New York Cheese Cake

10月3日  星期一  秋涼

尋日除咗整"難忘的心太軟",
仲整多一次New York Cheese Cake,
因為上個禮拜整果個呀媽無份食!!
我好鐘意整野俾屋企人食嫁!
所以呀媽都精咗,
嚟我屋企前盡量唔食野!!
哈哈, 兔寶寶舅父, 你都好耐無嚟探兔寶寶喇!!


今次用埋剩餘嘅250克cream cheese,
同上次唔同嘅係用咗黃糖同埋加多咗檸檬汁,
酸多少少感覺無咁滯呀!

整兩次都OK我就當成功架喇!
咁下次可以加忌廉做其他款式嘅蛋糕,
又或者加埋sour cream...
不過材料愈多亦都代表愈肥呀!!

為咗大少有多少少quota繼續做白老鼠,
今朝佢放假都俾我迫咗去做gym...
唔係, 係响我鼓勵之下去咗做gym先真...哈哈!

我切到個蛋糕好肉酸呀!
切完一下又無抺下把刀先!
同埋我屋企無蛋糕刀嫁,
之前用買蛋糕送果D膠刀洗返乾淨再用,
不過上次整爛咗,
下次去開烘焙店要買返一把先得!

椰絲雪芳 & 薑汁肉桂雪芳

10月1日  星期六  晴天

上次焗嘅蜂蜜雪芳, 三兩下手勢就俾大少KO咗,
尋晚襯有時間焗咗個椰絲雪芳...
同上次個食譜差不多,不過就無咗蜂蜜,
又將白糖換成黃糖,
並加入大約兩三湯匙椰絲.

因為用咗黃糖, 今次深色D...


蛋糕仔好似人地用來拜山果D鬆糕...

剝咗殼又有D似孖寶蛋糕...

至於6吋果個, 今次甩模衰咗,
唔記得界開煙囪果個位先,
樣衰衰咁砌返影張相...

不過咁, 大少都無嫌棄呢個醜陋嘅蛋糕,
連埋蛋糕仔差不多食晒,
醒起未影相先留返一忽仔俾我試味同影吓內部組織.

呢個蛋糕食得出黃糖嘅香, 亦食得出有少少椰子味,
有少少椰絲增強口感, 不過落得唔夠多,
大少都話下次可以落多D!

兔寶寶: 呢個蛋糕太樣衰, 唔多滿意....

心有不甘臨門一腳甩模失敗,
今日再焗多一個,
聽日呀媽應該會嚟喇掛?!
焗一個啱D佢口味嘅,
薑....佢大概會覺得"正氣"吧!
加埋肉桂....

出爐喇!! 又係用咗黃糖, 深色D...

加多一個蛋糕仔...

今次甩模好小心...

幾靚...

仲好香添呀!!

兔寶寶: 算你啦!

蜂蜜雪芳蛋糕

9月28日  星期三  陰天

上個星期响二德惠買咗個6吋戚風模,
原來網上唔係好多6吋戚風食譜,
搵咗好耐,
响車厘子烘焙部屋搵到,
於是今日整咗蜂蜜雪芳蛋糕.

好鬆, 好軟~~

材料:

(A)

蛋白 2個

原蔗糖 15g

(B)

蛋黃  2個

鮮奶  60g

菜油  (芥花籽油)   少許

原蔗糖 10g

低粉 60g

發粉 1 tsp

鹽  少許

蜜糖 1 tbsp

 

做法:

(1) 先將(A)的蛋白打至起泡,加少許鹽,分2-3次加入糖打至企身

(2) 低粉及泡打粉過篩3次

(3) 菜油加鮮奶用溫水座暖

(4) 蛋黄打勻，加入糖打至淡黃色杰身

(5) 慢慢加入座暖的鮮奶液體,輕力攪匀

(6) 將1/3份量蛋白放入蛋黃漿攪匀,加入1半份量麵粉輕力攪匀,再加入1/3蛋白混合,再加入餘下麵粉攪匀

(7) 最後加入剩餘的1/3蛋白直至完全混合

(8) 將麵糊倒入已掃油的模内,將模輕放枱上拍打2-3次,待空氣拍出

(9) 用170度焗25-30分鐘,出爐倒扣待涼脫模即可

因為屋企無晒油, 食譜話要用少少...
少少即係幾多呢?!
我諗少過1茶匙佢先至會話少少,
我唔想為咗1茶匙都無嘅油走落街買,
又懶得溶牛油,
所以我完全無落!!
焗出來都唔係好旱喎!!

而食譜又無講幾時落蜂蜜,
所以我做完step(4)之後落.
我個模個煙囪太細, 出爐之後咁樣倒扣:

之後用刀仔沿邊插入, 起模,
心急得滯把刀仔整咗兩個小孔...

不過都唔緊要嘅,
我覺得幾好食,
唔會好滯好甜又有蛋香,
下次可以試下唔落發粉.

個6吋模太細,
有剩餘材料夠整多一個蛋糕仔,
好似紙包蛋糕咁!
不過呢個蛋糕仔體積細比較受火,
無大嘅咁鬆軟!

輕乳酪蛋糕(乳酪片)

9月21日  星期三  陰天

今日整咗呢個輕乳酪蛋糕呀~~

食譜係跟[Carol自在生活]嘅.

一直都唔知可以用芝士片來代替cream cheese做蛋糕,
咁就好喇, 唔洗專登買盒cream cheese返嚟...
網上流傳嘅有用自發粉同用cake flour嘅方法,
我跟Carol呢個方法呢, 就係唔洗用牛油,
比較上輕怡D嘅,
一路焗, 一路聞到好香, 好香呀~~

輕乳酪蛋糕(乳酪片)
6吋分離式圓模一個 (我用咗8吋模)

材料:
a.蛋黃麵糊部份:
牛奶50cc,玉米粉(cornstarch)20g,低筋麵粉20g,蛋黃3個,檸檬汁1茶匙,
(鬼"暗"眼! 我睇錯咗, 用咗cornstarch 同cake flour各32g....)


b.牛奶乳酪部份:
牛奶70cc,乳酪片4片(約84g),細砂糖10g,

c.蛋白霜部份:
冰蛋白2個(不可以沾到蛋黃),細砂糖30g,檸檬汁1/2茶匙

準備工作:
1.乳酪片用手剝成小塊
2.檸檬榨出汁液取1茶匙 (我無用檸檬汁)
3.玉米粉-低筋麵粉混合均勻使用濾網過篩
4.將烤模塗抹上一層薄薄的奶油(我無做到呢一步, 十級後悔!!! 切記切記!!!)
5.烤焙白報紙剪出同底部大的圓形及烤模周圍一圈
6.將剪好的白報紙鋪入烤模中
7.若使用分離式烤模,底部務必包覆3層鋁箔紙避免進水
   (不分離烤模此步驟可省)

步驟:
1.過篩的粉類放入工作盆中,加入50cc牛奶攪拌均勻
2.將3個蛋黃及檸檬汁加入混合均勻
3.乳酪片放入盆中,加入70cc牛奶及細砂糖,放到爐上用小火加熱
   到乳酪片完全融化就關火.(一邊煮一邊用打蛋器攪拌)
4.然後將蛋黃麵糊加入混合均勻

5.蛋白先用打蛋器打出一些泡沫,然後加入檸檬汁及細砂糖(分2次加入)
   打成尾端彎曲的蛋白霜(濕性發泡)
6.舀1/3份量的蛋白霜混入蛋黃麵糊中用橡皮括刀延著盆邊翻轉及劃圈圈的
   方式攪拌均勻
7.然後再將拌勻的麵糊倒入剩下的蛋白霜中混合均勻
8.倒入鋪好白報紙的烤模中,在桌上輕敲幾下讓麵糊均勻,若有氣泡用手指
   抹平整 ----> 我無做到呢一步
9.將烤模放置到烤盤上,烤盤上倒入一杯沸水
   (一定要儘量倒滿,避免中途加水而開烤箱讓蛋糕消泡)
10.放入已經預熱到180度C的烤箱中烘烤15分鐘到表面上色之後就將烤
   箱溫度調整到120度C繼續烤40分鐘
11.出爐後馬上倒扣到一個大盤子,再用另一個盤子倒扣回正.然後撕去外圈
   白報紙放涼
12.最後刷上一層鏡面果膠放冰箱冷藏(我又無搽果膠)

食譜有一點兒長,
不過實際整响上來都唔係咁複雜.
記錄在這裡是因為有一些步驟我做得唔好,
希望提醒一下自己.
Carol果邊有詳細嘅插圖, 可以去看看,
當然她做的美得多了!!

輕乳酪蛋糕(乳酪片), by Carol.


我有將"烤焙白報紙剪出同底部大的圓形及烤模周圍一圈,
將剪好的白報紙鋪入烤模中",
不過我就無做到食譜上寫嘅一步,
就係搽D油上去等張烘焙紙痴實個烤模!
我之前焗蛋糕, 都係懶得就懶,
次次唔搽油都"側側膊"過關!但今次個蛋糕漿較稀,
倒入去個模果度時, 張烘焙紙歪咗,
所以一焗出來, 個蛋糕好核突呀!
有D烘焙紙插咗入個蛋糕上面..


而個面有一個泡泡就係我倒完蛋糕漿入模時無"櫈"吓佢先了....

Cut 開佢, 靚仔D, 呃下人啦!
由於麵粉量多咗,
個蛋糕實咗少少, 不過都好軟.

希望下一次會整得好D!!

酸忌廉蛋糕 & 酸忌廉鬆餅

9月9日  星期五  晴天

睇完"潛行狙擊"大結局,
又有時間寫吓blog, 焗吓野~

星期一果日焗咗一個sour cream cake,
用咗咩食譜真係唔記得咗,
因為係網上抄返來再自己減咗D牛油同糖嘅份量!
過咗咁多日張貓紙唔知飛咗去邊!
焗起顏色偏深黃唔係焗燶咗,
係因為我用咗黃糖....

一焗起的樣子, 升得都好高...

焗完之後同大少分食,
都幾好味喎~
有少少似清蛋糕但又有獨特的香味.
剩餘嘅因為兔寶寶入咗醫院而無咗件事,
到尋日先記得摷返出來吃...
擺咗兩日我覺得好似仲好食過新鮮出爐喎~

反轉待涼時, 蛋糕壓平了...

今日焗呢個鬆餅完全係為咗用埋盒sour cream!
响D外國食譜網頁得知可以用yogurt代替sour cream,
咁掉返轉用sour cream來代替yogurt都應該得掛?!
抄返之前焗"健怡南瓜香蕉燕麥鬆餅"嘅食譜,
唔用乳酪改為用sour cream.

以下為今次我用的份量:
A:
120克 低筋粉
1 茶匙 梳打粉
60克 燕麥
50克 黃糖

B:
1 隻蛋
半盒  牛奶公司酸忌廉
1.5湯匙 橄欖油

C:
約1杯 南瓜蓉

做法:
分別攪拌A料及B料,
把B料倒入A料中,
攪勻, 再加入C料,
拌勻後用200度焗22分鐘.

今次剩係用南瓜唔落香蕉, 顏色好靚!!
而且落少一隻蛋,
個鬆餅外層比上次較香脆!!

好鍾意呢個星星形鬆餅!!
聽日早餐有著落!!