第一次到遊樂場

11月22日  星期二 清涼

尋日大少放假, 我地去咗海港城行街街買野,
走嘅時候好多人都响商場外嘅聖誕裝飾影相,
我地都唔執輸影埋一份.


之後行星光大道, 大少慶之所致, 俾咗70蚊影咗幅相,
影得麻麻咋!!
反而响海旁有途人幫我地影全家幅, 影得仲唔錯喎~~

之後襯未天黑, 去咗中間道遊樂場;
我都好多年未去過呢D地方了.
兔寶寶第一次玩搖搖板,
睇佢表情, 佢應該係覺得好新奇呀!

七個月大瑞士卷

11月14日  星期一  晴天

今日係兔寶寶7個月大生日呀!!
一如以往, 佢每大一個月,
我都會整個蛋糕嚟慶賀一下!!
今次係整瑞士卷!!

呢個瑞士卷唔係一般貨仔嚟架!
雖然唔係太靚, 但誠意十足!
尋日我咪買咗磅栗子整糖煮栗子嘅...
大少見到一粒粒栗子係唔多食嘅,
要我一個人食晒, 我諗我胃痛都似!
所以我整糖煮栗子嘅時候,
只係留起1/3自己食,
其餘嘅就再加多少少水煮淋D,
打算將D栗子改頭換面,
做成粟子茸瑞士卷,
等大少無辦法唔食!!

粟子茸嘅做法我係亂咁來的...
D粟子大約煮咗40分鐘左右啦!
反正我要晚上兔寶寶瞓咗之後先有時間整蛋糕,
於是我將D粟子連埋糖水一齊倒入一個保溫瓶,
等夜晚攞出來嘅時候D粟子就會更淋架喇!!

之後我用攪拌機攪到變成粟子茸,
未加水之前嘅粟子茸黏性很重,
好似D泥咁漿住部攪拌機.
我部機又細部,
每次只可以三四粒粟子咁攪,
攪完一轉之後用匙羹清理部機關再攪第二轉.
攪晒之後就逐少遂少咁加返煮粟子嘅糖水去溝返稀佢!!
如果有忌廉, 加落去應該會仲滑!
溝到理想嘅杰度之後,
(我嘅定義係, 可以搽落去蛋糕片上唔會太濕又唔會話杰到搽都搽唔到!)
再過篩!! 過咗篩嘅栗子茸會滑好多!!

我覺得自己整嘅粟子茸比起出面買嘅更好食!
起碼真材實料, 而且又健康!
不過就少D心機都唔得!!

今次蛋糕片我係跟<好吃戚風蛋糕輕鬆上手>一書,
不過係用咗長方形模做! 效果都唔錯!
多謝JO姐姐幫我搵D video俾我睇清楚點樣cut & fold & turn!!
等我略略記一記個做法先!!

戚風蛋糕片材料:

A. 蛋黃3個 + 20克糖
B. 蛋白4個 + 40克糖 --> 打起

50ml油分次邊攪邊加入A料,
再加50ml水, 繼續攪拌
再加入80克低粉混合拌勻.
分兩次加入B料.

180度焗約10分鐘.

兔寶寶你幾時識得叫我媽咪呀??

忍無可忍換play mat

11月12日  星期六  晴天

兔寶寶出牙仔發牙痕都唔係最近嘅事,
咬人咬書咬紙咬玩具總之見都乜都放入口,
基本上俾得佢攞到放入口嘅都係洗乾淨嘅,
不過近期最得兔寶寶歡心嘅止牙痕恩物,
我就真係忍受唔到佢放入口咬...

就係用開嘅字母Play mat!
因為張play mat係一格格咁砌埋,
每一格都有四邊凹凸不平嘅接口位.
每日幫兔寶寶沖完涼之後大少都會攞起嚟抺,
又砌返D英文字...
兔寶寶隻手仲未夠靈活攞起D英文字嚟咬,
不過佢好醒唔醒,
爬去張play mat嘅邊位, 拎起塊膠嘅拼圖駁口位嚟咬!
雖然係每日都抺姐, 但點都係放响地下嘅,
我地雙腳每日沖涼都污糟架!

可能D發泡膠質感好咬掛?
雖然我一見到佢扒到去邊位都會抱返走佢,
但我始終得一個人, 一雙眼, 又有無數咁多野做,
行開行埋難免, 而兔寶寶就最鍾意响我望唔倒佢時極速咁爬!
真係激UN!!
無計, 唯有買過張一張過嘅Play mat,
舊果張留待佢大少少唔再亂咬野時俾佢玩砌圖吧!

今次買咗住場最貴果張,
心理上覺得就算咬咗都無咁有害!
同埋係Sanrio出嘅, 品質會好D掛?!
最主要係, 佢有KITTY圖案!!
不過兔寶寶睇嚟唔太鍾意囉!!

***************************************************

尋晚焗咗一個八吋清蛋糕,
可能攪拌得唔係咁好,
升得唔高之餘高度仲唔係咁平均,
Cut開仲見到有少少油/粉沈澱!!
不過大少食唔出! 成個食晒!
大少呢個評判都唔係咁可靠!

甩模失敗的肉桂天使蛋糕 * 口痕友

11月9日  星期三  雨天

尋晚整咗肉桂天使蛋糕...

就咁睇無咩特別,
但係甩模甩得好樣衰,
甩皮甩骨咁...
我係倒轉個蛋糕等佢完全放涼晒之後,
用刀仔插入焗盤同蛋糕之間,
再用把刀借力炆佢出來,
但係咁樣個蛋糕起得唔完整,
究竟點做先至係正確嘅甩模方法呢??


*************************************************************
尋晚有位百厭嘅小朋友,
吼我做緊sit-up嘅時候想咬我,
當我想錄起佢嘅罪証時,
佢就响度整蠱做怪,
又扮咳又扮咬我,
跟住仲想搶我相機唔俾我影添呀!!

兔寶寶的三個"新轆"!

11月8日  星期二 雨天


兔寶寶: 我唔係扮學運領袖呀!

媽咪囉! 尋日買咗d絲帶同橡筋,
諗住學人做針子整d頭帶髮飾俾我扮靚靚!
又唔知自己以前家政科d針子都係請槍嘅!
結果望住d材料眼光光,
跟住攪成我咁,
仲夠膽問DADDY我靚唔靚!
啍! 太過份喇!
靚乜鬼喎!
整到我好似撞親個頭扎繃帶咁.....

你地睇吓我幾唔滿意!!
唔好影呀!!

換返運動衫醒神好多!!

表情都唔同d....

兔寶寶: 我都話唔露肉博出位咯, 媽咪!!

媽咪: 唔好意思呀, 你用杯飲親水都整濕晒,
          倒出來果d仲多過飲落口果d,
          抺都抺唔切,
          唯有襯你沖涼前除晒衫先訓練你用杯飲水啦!
          希望你醒少少快d學識,
          唔係遲d凍多少少連沖涼前用杯嘅機會都無架喇!!


兔寶寶: 攪到我好似豬肉佬咁樣...

兔寶寶食、食、食篇

11月7日  星期一  晴天

尋日婆婆嚟探兔寶寶,
餵咗兔寶寶食大半隻香蕉;
婆婆大讚兔寶寶叻叻,
唔洗五分鐘就食晒,
咀LAM LAM咁好似唔夠食咁呢!
我都覺得兔寶寶愈食愈叻,
愈食愈快添呀!!

婆婆見我試用條揹帶,
貪得意又要試,
仲唔捨得除底添!
因為婆婆手疼唔抱得兔寶寶耐,
所以用條揹帶來借力,
過足抱孫癮呢!!

跟住到大人開餐,
兔寶寶全程望到實,
驚死無咗佢果份咁....
唔好意思真係無預你喎!!
哈哈, 俾佢望實晒我都唔係咁好意思自己食,
於是開咗一包BB餅俾婆婆餵佢食,
兔寶寶食得好喉擒呀!!
有得食, 幾開心!!

****************************************************************************************

前日見惠康D牛油果有特價,
買咗兩個返嚟諗住自己食;
我媽問我點解唔俾D BB食呀?!
我仲話, 呢D咁肥, BB唔受得架!
點知我上網一check,
原來牛油果係BB仔理想嘅食物嚟架!
夠六個月就可以食!!

於是今朝刮咗D肉出來俾兔寶寶試吓!
自從佢食過上次果D鬼口水(菜蓉糊仔)之後,
我就知基本上兔寶寶大概都係乜都食嘅BB,
都無擔心佢唔食!
果然, 兔寶寶一食就食咗半個!!

***********************************************************************************

今朝瞓醒就見到大少送嘅禮物,
多謝大少!!

鬼口水

11月5日  星期六  晴天

兔寶寶自從食咗固體食物之後,
開始有少少便秘,
我覺得係佢飲水少囉!!
上次個醫生仲笑笑口咁話BB當咗我係水樽!
因為佢食食吓糊仔會炆住我嚟食奶解渴!
尋日俾過香蕉佢食,
今日用咗D飯 + 母乳 + 幾塊菜葉用攪拌機整咗D糊仔,
等佢可以食多D纖維!

好似鬼口水呀!!


D糊仔我都試咗啖,
連我呢個平日成斤成斤菜咁食嘅人都覺得好難食呀!
難怪兔寶寶第一啖食落口時喊晒口咁,
個樣慘過飲苦茶!

好在兔寶寶肚餓咋!
無選擇嘅情況吓唯有食啦!
之後愈食愈高興,
兔寶寶你真抵錫,
咁難食嘅野你都食咗半碗,
媽咪唔洗驚你將來唔食菜菜LU!!