今日同兔寶寶去咗健康院打乙型肝炎針, 同埋做檢查.
宜家兔寶寶有3.75kg, 即係8.25lb; 相比起啱啱出世得果2.44kg(即5.3磅), 重咗2.88磅呢! 我好開心呀, 不論醫生, 姑娘, 大少同我都好滿意呢個成績, 不枉我晚晚走出嚟餵奶了....
不過今日檢查黃疸指數依然偏高, 有120幾, 下星期要去QE見醫科醫生, 抽血檢查會唔會係膽管閉塞, 不過醫生話機會好微, 只不過驗一驗血買個安心.....
打針嘅時候, 兔寶寶好似知道有血光之災咁, 未打針已經谷到塊面仔紅晒, 之後仲搾緊對拳頭仔, 樣子好趣怪呢! 我忍唔住格格大笑.......之後俾大少話我呢個呀媽好衰喎~
最衰打針果度唔可以影相啦, 哈哈!!
*********************************************************************
坐完月呢幾日我都有每日落吓街行吓, 當然只限大少在家而兔寶寶又瞓著嘅時候啦....
我地仲帶過兔寶寶去卡拉OK tim 呀....不過兔寶寶唔多鐘意果度嘅環境, 下次都唔會LU....
餵人奶之激氣事件
想 講嘅係, 話說星期一同埋兔寶寶爺爺去飲茶... 我地習慣性將兔寶寶包實, 如果佢扭計嘅話就攞支奶出嚟安撫佢... . 唔知果間酒樓D侍應係咪太得閒, 初初有一個半個侍應撩兔寶寶; 跟住愈嚟愈多, 當佢地知道兔寶寶係食人奶嘅時候, 好似好驚訝咁, 又話兔寶寶好細粒....之後群起叫我餵佢食奶粉, 唔食奶粉都用奶粉補奶啦云云...有個仲離譜, 叫我餵佢食葡萄糖水...
兔寶寶: 我肥咗好多喇! 你睇我個雙下巴...
當我表明我係唔會加奶粉, 佢地嘅語氣係覺得我刻薄緊個BB, 一個話食牛奶最好, 一個又話唔食奶粉緊係瘦啦...
又係群眾壓力, 迫住要俾個枕頭仔兔寶寶; 其實醫生唔見議嬰兒用枕頭的...
我當時都幾尷尬, 我好明白BB食人奶嘅好處, 但好怕同枱嘅老人家唔明白!! 真係好激氣, 佢地又唔知兔寶寶出世嘅時候幾細粒...如果餵奶粉, 我肯定唔會餵得咁密...
我又唔可以响D長輩面前出言頂撞, 只可以响個心入面講: 牛奶係俾牛仔食嫁!! 飲葡萄糖水?! 你以為而家打仗咩?! 究竟D人有無常識嫁!
兔寶寶: 我流鼻水呀~
真係好想香港政府加強D電視廣告, 唔好叫D人比D奶粉廣告洗晒腦, 以為配方奶粉係最好嘅! 唔係單單响健康院同醫院散播哺育母乳嘅好處, 所有人都應該受到教育, 因為阻礙媽媽餵母乳嘅好多時就係一D唔知頭唔知路嘅人!!
10分鍾唔洗, 兔寶寶"富被"富成咁, 連衫仔都毑高埋...
有圖為証, 呢件衫仔一個月前有鬆, 而家唔啱著了...
幸好, 大少係十分支持我餵母乳嘅. 家中亦無來自老一輩嘅壓力...雖然响某一刻我曾懷疑自己唔夠奶..但我相信愈吸愈有, 一補咗奶粉收唔返.....同埋母乳係最好嘅, 所以即使餵母乳比餵奶粉辛苦, 我都唔會放棄嫁!!
兔寶寶: 你估吓我响度做咩?!
