改名記

4月2日 星期六  2:00a.m.

改名記

兔寶寶踏入37週, 本來仲有3個星期先出世, 而家可能要催生, 分分鐘由金牛座兔B變成白羊座兔B tim~ 真係愈嚟愈緊張呀....

大少對於兔寶寶叫咩名, 真係幾用心機嫁! 响知道有兔寶寶後不久，大少就提出過不少提議... 未知道兔寶寶性別時, 大少諗親, 都係一個男仔名, 一個女仔名...

兔寶寶, 原諒媽咪呀! 係媽咪無心裝載, 唔記得你爹D嘅杰作...

知道係女仔後, 我最記得大少想BB叫"青青", 或者"晶晶"; 老實講我覺得好"娘", 好大陸feel....不過見到大少咁興奮, 就費事掃佢興啦!

之後, 我有心定無意咁响網上search一d關於改名嘅資料, 話用疊字唔係咁好喎...當然, 信則有不信則無啦...

平時我個人都唔係太迷信, 始終係讀science嘅; 但係自己個女嘅名, 唔知就好地地, 知道就有D野咁. 既然我本身都唔鐘意自己個女叫晶晶, 就大條道理同大少講, 叫佢諗過啦...

大少又再興緻勃勃咁, 一得閒就諗...可惜, 每一次佢提出嘅, 都係D普通到唔普通嘅名, 例如叫淑芬呀, 麗華呀, 美琪呀, 美詩呀呢D...咁我又唔係要求兔寶寶個名好特別, 不過唔好咁"行"囉...仲有就係, 呢D名同我D呀姨, 表姐表妹嘅名撞晒呀...

大少俾我否決得多, 唔份氣, 就問我點解唔諗....
但係我覺得, 改名呢D野, 傳統上唔係女人諗囉... 一句就將個責任推得一乾二淨...

見到大少咁苦惱, 我仲好似驚大少唔夠煩咁...
大少姓"Yuen", 我就話: 不如叫"Yuen琳琳", 又或者"Yuen棉棉", 又或者索性叫"Yuen兔寶寶"啦!

所以兔寶寶, 你呀媽我, 唔係無幫過手嫁...係你爹D話我玩野唔俾我參與咋!

後來兔寶寶爺爺亦都參與提議, 因為大少個大女叫X兒, 所以62就提出咗兩個最尾個字係"兒"字嘅名...其中一個係"樂兒", 本來我地都覺得幾好, 但因為"樂"同"落"同音, 落兒就好似唔係太老嚟喇!

不過62嘅提議, 令我地有個共識, 兔寶寶個名, 會係"X兒"...

當 然, 我地改名都係為好聽, 順耳, 吉利之餘又可以帶出自己少少對兔寶寶嘅期望; 參考過一D改名嘅書同網頁,  最後我地決定尊從一D簡單嘅改名法則, 例如總筆劃加埋嘅數目係吉定凶, 如果凶嘅就否決...至於複雜到要計父母時辰八字, 我地唔識, 大少亦都唔會有時間慢慢去研究了...

為咗求正d名嘅正確筆劃, 我地又'突登'去查字典! 原來我地一直數錯大少個姓氏! 左計右計, 之前諗好嘅名又唔用得!

要送俾兔寶寶一個好名字, 大少真係auu爆頭！！

哈哈~

*************************************************************************