Veritas's Blog: 兔寶寶聽日37週足月了 --- 產檢

3月31日星期四晴天

兔寶寶聽日就37週足月了, 尋晚佢係咁响我個肚度, 郁完手又郁腳, 成晚無覺好瞓...今朝一早鬧鐘响, 非常之不願意起身呢~

今日係要返去QE照超聲波, 度胎水, 臍帶血容量同埋聽胎心. 大少無陪我去, 响屋企瞓晏D返工. 尋晚佢叫我搭的士去, 不過我見仲有時間, 都係選擇咗慢慢行去, 慳番18蚊.

去到完成入院登記手續, 等都唔洗等, 即刻可以去聽胎心.

今日間房得我一個, 我影咗相做記錄呢!!

聽心室內的梳化, 躺上去後, 連腳部都可以"浪"起, 好舒服呢~

就係呢部機接駁聽筒用來聽和記錄兔寶寶的心跳.....

响個聽筒搽呢支 gel....唔知係咪KY嚟呢?!

姑娘將兩個聽筒用魔術貼cool响我個肚度....呢幅相可以見到我個肚唔係圓菇look嘅, 而係三尖八角嘅....

成個聽胎心過程都要細心留意胎兒郁動, 一郁就要按製, 以作記錄...

兔寶寶幅"心電圖"呀~

由於兔寶寶响開頭掛住瞓無咩郁, 所以我有好多時間影相呀~~
好在佢之後醒返, 狂踢我, 呢次聽胎心先pass呀~~

聽完胎心, 好快又可以超Ultrasound 了. 今次醫生無幫我再度BB體重, 佢話相隔一個星期, 度嚟無意思喎~

但係今次度到胎水竟然少過上次!!!!!

幸好臍帶血容量正常, 但都係要見多次醫生睇吓點安排....因為胎水太少, 極有可能影響bb營養吸收同成長!

超緊 Ultrasound 嘅時候, 大少打俾我....佢話瞓唔著呀~ 佢知我未走得, 要等見醫生, 就話過嚟陪我....

大少飛的過嚟....佢連頭都未梳/洗呀~

等咗大約半個鐘...可以入房見醫生lu...

個醫生見議我, check吓子宮頸成熟未, 如果子宮頸ok ready, 反正BB聽日都足月, 即時就可以安排我入院催生....

實在覺得太不可思議了!

上個月仲話俾我知樣樣野都正常, 等我仲諗, 我呢個高危妊娠都係浪得虛名姐~ 亦幻想自己可能同老媽一樣, 個多小時就生下BB呢? 點估到臨生前一個月, 會有咁多問題呢?!

我望吓大少, 佢表情比我更加不知所措...好似見到兔寶寶同緊佢揮手咁驚青....

我知道, 我要好冷靜好冷靜; 於是我問醫生, 點樣check, 幾時check??

個醫生call姑娘入嚟, 叫我瞓上床, 好在好在.....子宮頸仲係好窄...

個醫生跟住話, 好在血容量都ok, 暫時唔會有大危險, 可以拖到下星期, 再check, 如果子宮頸ok, 就可以催生...

呢個時候大少好似恢復番D神智, 問醫生: 催生係咪要開刀??

坦白講, 當時我都好混淆...好在醫生解釋, 催生即係吊催生藥, 令子宮頸打開, 除非有阻滯, 否則都唔洗開刀嘅...不過生嘅過程會耐少少....

大少跟住問: 咁咪好痛囉??

點解唔開刀呀?

難得個醫生咁好耐性, 慢慢同大少解釋, 即使順產, 過程都可以好痛... 我亦同大少講: 唔緊要啦, BB安全最重要...而且開刀會較難復元.

就咁決定了....反正, 痛, 我預咗. 無論生仔點痛, 都應該好過D俾火燒傷嘅人, 忍受住永無休止嘅痛....同埋, 呢個世界又唔係得我一個生仔要催生...人地得, 我都得, 而且痛極耐極, 當痛三日好吧!!

離開醫院時, 我同大少講, 我知好多人, 生BB時都會好痛, 例如痛到坎頭埋牆, 語無論次, 甚至大小便失禁...呢D, 我都可能會, 同埋我預咗.... 我相信我頂得順...因為我一早知, 生BB唔係玩吓玩吓的.... 開刀唔單止影響我照顧BB, 可能要人照顧番我轉頭, 又有可能影響我餵人奶, 而且開刀個傷口仲痛/痛得耐!! 咁多唔好處!

當然, 我最想緊係自自然然作動,穿羊水咁生啦~ 既然唔許可, 唯有接受啦...我仲安慰大少, 我嘅情況, 總好過BB過期居留, 唔肯出世, 最後要催生嘅case...因為BB size大, 要生仲難...

仲有就係, 而家個肚唔係好大, 要收身好容易呢~ 對腳又唔洗經過水腫階段; 襯肚皮未有妊娠紋, 塊面未有斑, 渣渣臨生兔寶寶出來呢!!

哈哈~ 其實我都唔知安慰大少, 定安慰自己, 我可以一口氣作咁多個催生嘅好處出嚟~~
大少聽到我咁講, 好似鬆一口氣, 回復番佢大少本色, 開始諗去邊度食飯同埋生BB之前去邊到玩....