山寨版pancake。雪耳杞子綠豆煲腐竹

6月3日  星期二  晴天

一年一度端午節, 

估唔到我搭船尾都有份參予類似划艇活動...

尋日成個灣仔都無廁所水, 

到半夜三四點起身去廁所, 

發現成個廁所變成水塘, 

咸水又試谷爆水箱!

即時要用個地拖划呀划, 

嘈醒埋兔寶寶.

做完大輪劇烈運動, 

眼瞓都變唔眼瞓,

咁啱大少又收工返嚟.

襯人齊, 好快手整咗個山寨版pancake.

材料份量都係得個大概,
大約是六湯匙麵粉(包高粉開咗, 我就用高粉),
2湯匙薯粉(見有就加D落去),
2湯匙杏仁粉(用剩少少, 又加埋落去),
四湯匙椰C(又係見有, 加D落去),
仲有大約一茶匙泡打粉.

乾料加水攪至差不多杰度(好似人地整雞蛋仔D漿咁),
就可以加埋約少少溶牛油(20克, 約一格)和一隻細蛋.
之後等10分鐘左右,
等D泡打粉發揮作用.

 

亂咁嚟都OK好食,
最緊要係熱辣辣, 大少同兔寶寶都喜歡.
最尾一件夾火腿芝士也不錯.

見今個端午節無食過綠豆糉, 

於是尋日買咗五蚊去殼綠豆, 

加埋兩塊雪耳、杞子粟米粒一同煲腐竹, 

消一消暑, 解一解毒.