今日係六月十六日星期六, 好多個"六"呀!!
大家買咗六合彩未呀???
兔寶寶嫲嫲包來嘅第一批糉(6隻大糭+3隻BB糭),
已被我光榮解決晒!!
補返第四種糉嘅相先!
呀嫲以前包過嘅餡有很多,
有D我係比較意外嘅,
例如响糭入面發現花生呀、雞腎呀呢D,
由於呀嫲係咁多隻糭撈埋一齊唔分乜打乜,
因此每解開一隻糭嘅時候我都有一種好似拆禮物嘅心情...
呢隻比較特別, 係用棉繩來紥嘅,
往年嘅經驗, 呢隻糉嘅內容一定係特別豐富...
謎底解開! 係鹼水糭!
有一次同大少行經街市, 我見到有個婆仔賣鹼水糭,
我想買嘅時候大少阻止:
大少: "唔好買啦! 都唔知乾唔乾淨嘅! 你想食端午節我叫呀媽包俾你食啦!!"
我: "好呀! 我最鍾意食鹼水糭架喇!!"
(上次我話我最愛係綠豆糉, 係未計鹼水糭的)
過咗一段時間, 大少問我: "呀媽問你鹼水糭想要乜野餡喎?!"
我諗一諗, 答佢: "乜餡都唔少, 就咁一隻鹼水糭得喇!"
呢件事我都幾乎忘記咗, 係呢隻鹼水糭令我記返起!
好開心呀! 係呀嫲整俾我食架!!!
第一次有人特登整糉俾我吃!! 我真係好感動呢!!
呢份情意我會記住的!
切開隻糉, 真係如我所願, 係無餡的...
屋企D糖膠俾我食晒, 連砂糖都用光,
隻鹼水糭我是點栗膠來吃的.
反正上次整完焦糖脆脆後, 支栗膠都無乜大用途了....
唔係刷鞋, 估唔到兔寶寶嫲嫲整嘅鹼水糭,
仲好食過我以前响街外買果D!
我食過很多鹼水糭都會有陣苦味, 但呀嫲落鹼水落得啱啱好,
令糭子變得香甜煙韌, 又沒有咸肉糭咁滯 ...
到吃光了一整隻糭後,
我真係後悔: 點解我咁快就食晒隻糭, 唔慢慢食呢?!
好彩我唔係食神入面個薛家燕, 怕以後食唔返碗叉燒飯,
因為大少已經話會攞第二批糭俾我...
沒有留言:
張貼留言