2013年9月7日 星期六

爆谷DIY

6月27日  星期三  晴天


我好鍾意食爆谷架!
入親戲院, 最開心嘅唔係有戲睇, 而係有爆谷食,
如果無爆谷, 我根本就唔鍾意睇戲.

人地行經"宜家"傢私係買熱狗又或者軟雪糕,
我就只係鍾情於爆谷;
有幾次行經銅鑼灣宜家, 部爆谷機都係壞咗!
好失望呀!

一路都有諗自己整爆谷,
直到去完迪士尼, 更加催谷我DIY嘅意志.
上次去迪士尼, 因為我地食埋LUNCH先入去嘅關係,
我地响園內幾乎係零消費,
係到睇煙花嘅時候敗咗响一包爆谷手上.

一包細嘅紙杯裝, 廿八蚊, 仲要排餐死先有得食...

大家都知我係慳妹嚟架啦!
廿八蚊一杯仲要食到我到喉唔到肺,
如果我可以自己整, 九月再去迪士尼我一定唔會買!




咁啱我去咗二德惠買野, 俾我見到呢包"生爆谷",

簡直如獲至寶呀!
一返屋企就開爐試下整喇!



過程真係易過借火呀!
首先加適量嘅油(大約一湯匙左右)落一長柄煲內,
燒熱油, 加大約1/3杯"玉米粒", 馬上蓋蓋, 並用手按實蓋子.



由於怕"痴底", 一路燒我就一手按蓋, 一手拿著長柄"chok"個煲;
這時應該會聽到"啪嚦啪喇"咁嘅聲,
為咗觀察煲內情形, 我特登摷咗隻用玻璃蓋嘅煲添!
睇住D爆谷响煲入面跳舞, 好得意架!
到無晒聲時, 便可熄火.
 (可以等多一陣先開蓋, 避免有D爆谷"唔知訂"响呢個時候彈出來, 要執餐C)



之後簡單嘅可以就咁加砂糖, 亦可再煮焦糖淋落去.
今次由於係試驗性質, 我就咁加糖就算喇!
原來屋企無晒砂糖, 於是我落咗黑糖, 你見到有D黑色一點點,
唔係"鑊撈"嚟架! 係黑糖來!

不過就咁落黑糖效果並唔係咁好,
爆谷嘅餘熱不足以使黑糖溶化成一層糖衣(相信用砂糖亦然),
甜味亦唔夠出...
於是我支粟膠又出場, 哈哈!
邊個話粟膠淨係攞嚟整焦糖脆脆整棉花糖,
我又用來"點"糭吃又用來整拍青瓜(代替砂糖),
宜家仲整埋爆谷!
總之慳妹守則, 買咗返嚟嘅野就用到佢盡, 唔准嘥!


好開心呀! 下次開小朋友嘅迷你派對又多一樣食物喇!

沒有留言:

張貼留言