深圳野生動物園之旅(三)

2月25日  星期一  寒冷

續: 深圳野生動物園之旅(二)

動物園六點就關閉, 我地五點多就離開了,
由於大少不想再乘地鐵轉來轉去,
就直接在園外乘的士回深圳市中心,
找地方吃東西了.

全日只是吃餅乾雪糕等零食嘅大少,
瘋狂咁叫野食呀!
呢間菜館嚟過好多次, 所以我一坐底就叫碟炒豆苗先~

家鄉豆花, 都係我點的.
好像咸豆花一樣, 可以當湯喝,
清清的, 大陸D豆腐都幾好食架!

大少要嘅獅奄, 我只吃了兩隻,
今次灼得太生了.

花生芝麻手抓餅, 有師傅在配場即叫即拉,
以前好好食, 宜家換了師傅, 味道差了點.

不夠喉, 再叫多碟豆苗, 還強調要"加大",
來到, 一樣size, 大少話要埋佢啦,
再炒多碟"加大"來, 都食得晒...

大少餓鬼上身, 再叫多碟咖哩蛋手抓餅,
我講到明唔會幫手食架, 無問題, 佢一個都攪掂.

加大的豆苗來了, 好彩係菜,
食得晒, 食得晒!

大少幫我點了三隻燒蠔.

埋單百九蚊人仔,
大少話唔會再來呢間幫襯,
因為又貴咗招呼又差咗,
可能嫌我地食來食去都係菜都未定!


食完晚飯, 是次深圳野生動物園之旅理應結束,
本來我地都係PLAN咗去兩日, 我帶去嘅衫也只夠穿兩日.
不過大少好想去按摩,
前一晚我瞓得唔好, 都有少少瞓"嚟"頸.
近近地就在飯店附近找到一間我地從未去過的按摩院.
本來是很嘆的一件事,
我和大少都商議好, 我在大堂按腳時就佢入房按身,
之後就掉返轉, 總之就按腳的那個負責照顧兔寶寶.
其實次次都係咁架喇, 因為兩個大人都按身的話我根本就按唔倒,
兔寶寶一定會扭計(佢見我瞓响度一定會扭食奶, 所以我响屋企都唔可以蛇王瞓覺架!)
講好咗我入房按先, 因為我"病情"比較嚴重,
轉條頸都痛, 加上我按完可以在房間氹兔寶寶瞓,
咁大少按身時呀B就已經睡著了.
點知呢個大少見我入房又跟住入,
帶埋兔寶寶去另一間房, 呀B更係嘈啦!
佢就响我按按吓時塞兔寶寶俾我, 叫我餵佢飲奶喎!
就係咁, 基本上我係無按過摩的,
那個技師就在我餵奶時在我雙腳掃吓掃吓,
激C我喇~~~

按完身, 仲有一個大堂未按,
已經很夜了, 趕不切回香港, 於是我地又出去搵地方食宵夜,
食完再按過...
呢間酒樓第一次幫襯, 個部長話開咗廿幾年喇喎...
都唔知係咪, 平時行過都唔多覺眼嘅..
算啦, 聽大陸嘅人講野, 尤其係做你生意嘅人, 最多都係信三成比較好.

第一碟上桌係大少叫嘅椒鹽骨,
賣相同相片完全不同,
大少一咬就話: "凍嘅?!"
再咬仲發覺D肉未熟得晒, 中伏添!
即退即退!!

第二碟來嘅係炒菜心,
呢碟都正常嘅, 熱辣辣, 係油咗D姐,
不過呢隻菜心麻麻地好食.

蒜蓉粉絲蒸扇貝, 呢碟都正常, 係D粉絲淡咗少少,
好似無落豉油咁.

港式小炒, 呢碟係用之前退果碟"椒鹽骨"換架!
我地打算呢碟都唔好食呢, 就唔再叫野, 去過第二度食架喇,
點知呢碟又炒得OK好食喎! 仲引到我叫咗個白飯添!

於是我地再叫多碟豉椒炒蜆, 呢碟都好食, 而且D蜆無砂.

釀豆腐, 呢個都唔錯.

大胃王仲叫多個鐵板吊桶仔,
宵夜嚟架咋!
呢味都好吃.

呢度D野食終於啱我地口味, 雖然都係油淋淋,
但起碼不辣先啦!
兔寶寶都食得好開心, 吃了很多飯餸.

食完飯D侍應仲撩呀B玩...