Veritas's Blog: 深圳野生動物園之旅(二)

2月24日星期日晴天

續: 深圳野生動物園之旅(一) ----- HEA + 食

呢篇BLOG很長, 內文都是圍繞動物園的...

第二朝十點幾, 我地就執野check-out,
準備去動物園喇!
兔寶寶紥起了前額頭髮,
不過佢對呢個新LOOK很不滿, 扭計扭到面容扭曲呀!
bb3

呀B, 你紥起條辨仔會無啦啦高咗兩吋架!
兔寶寶: 咁又係啵~ 嘻嘻~~

問過酒店職員, 行去動物園要二十分鐘,
佢地可以安排酒店車輛送我地去, 廿蚊,
不過要等...
行出去便利店買野食時咁啱見到的士(果度無乜的士架!),
唔洗煩, 坐的士去, 都係十零蚊.

去到門口, 好空曠, 好曬呀!!!

行多兩步, 見到有馬車,
以為佢係裝飾, 原來係俾遊客坐嘅,
帶你遊勻成個動物園一週, 200蚊人仔.
俾賣票果個人誤導, 佢話你想响邊度停就停,
俾你落車玩下, 再帶我地去睇表演.
我問咗佢好多次係咪跟足全日, 佢都無答我,
只係話成個動物園都行勻晒架!
真係誤上賊車, 成個馬車行程只有三十分鐘,
行到去見到D動物, 個司機(即係控制隻馬果個人, 又謂馬伕)只係同我地講"前面還有很多(動物)"
真係走馬看花, 我連相都影唔切!!!

在馬車上影的相很多都是鬆郁朦, 只餘下幾張,
不過呢個行程就俾我地有個概念個動物園有D咩, 同大約有幾大.
係好大架! 佢有D觀光車, 廿蚊一張飛, 可以用足全日,
可以任上任落, 由一景點去另一景點都唔洗行餐C.
即係坐馬車果二百蚊, 絕對可以慳返!

馬車上, 見到不同鳥類...

袋鼠, 條路剛剛塞馬車,
個馬伕先迫於無奈停低咋!

長頸鹿、另一匹馬和駝鳥.

犀牛.

見到大象時, 個馬伕終於肯停低俾我地落車了.

原來有生意做...餵大象,
廿蚊, 可以有兩三隻蕉和一些甘荀條,
仲可以俾你行埋些少, 近距離接觸大象.

不過我見到有D人自備紅蘿蔔, D職員都唔理.
N年前我都响荔園餵過大象架!

大象隔離有一D小馬俾人影相,
個女人好熱情地一抱就抱咗兔寶寶上隻小馬度,
"咔嚓"---多謝廿蚊啦!

係呀, 原來熱情嘅背後, 係要收錢架!

反正都係, 我都企埋去影相LU!

仲有大少都唔執輸, 影埋一份.

小馬隔離仲有駱駝、大象等俾遊客騎上去影相架,
夠膽仲可以好似呢位呀叔咁掛住條蛇影相添!
都係廿蚊, 不過我地就唔洗客氣喇!

話咁快行完一週,
個馬伕放低我地响獅虎表演館前, 就同我地講"沙喲啦啦"咯,
搵另一個水魚去...
離表演時間仲有成十五分鐘, 去吓洗手間, 買吓爆谷,
咁就走入去霸個靚位等睇表演.
等候期間, 我發現大陸D人好健康,
好多人都吃橙吃柑吃蘋果做零食,
完全不怕弄髒雙手和地下...

第一個環節, 大黑熊表演站立、請請、拍手等...

之後到老虎、北美虎出場.

表演玩滑輪、請請、舉手等等...

兔寶寶睇得好開心.

6

之後仲有老虎過橋、空中飛虎等等.
睇呢D表演, 我留意到那些馴獸師一臉嚴肅和佢地手上的鞭子,
還有表演嘅獅子老虎都被脫去了牙齒...
我地睇呢D表演睇得好開心,
開心嘅背後, 呢D猛獸都唔知捱咗幾多鞭先有咁嘅表現.
人類站在表演台就話光榮姐,
呢D老虎獅子, 難道又會享受人類嘅掌聲?!
想到自己買飛入嚟睇都間接鼓勵虐待動物, 心裡就不安起來.

表現很快就完結,
我地出返去睇國寶.
呢兩隻叫做"圓舟"和"嬌慶",
走來走去, 很活躍.

睇完熊貓, 大少見到有小攤檔賣雪糕,
吃完了一枝牛奶公司甜筒之後,
見我在另一檔買"意大利雪糕",
佢又再買一杯, 怪不得佢唔洗食午飯了.
所謂意大利雪糕, 一吃就知是國貨,
不過只是十蚊一杯, 又唔算好劏遊客.

吃完雪糕, 順路行去海洋區, 睇海洋表演.
瞓著覺嘅兔寶寶俾我地摷醒, 打晒喊路呀!

第一個環節, 由跳水員表演跳水.

跟住係海獅表演.

過場有花式跳水表演.

之後到海豚出場.
想同海豚/海獅影合照, 每位五十蚊;
同佢地在水中玩耍都得, 幾百蚊人仔,
甚至有月票發售, 二千幾蚊就可以每月同海豚玩幾次云云...
所有價目都一一列清.

睇完表演, 在快餐店吃過一碗很難吃的牛腩拉麵後,
我地就進入猛獸區.
真嘅熊人, 我都係第一次見咋!
仲可以買一D雞肉塊用魚竿釣落去俾佢地食添!

之後我地行去獅子老虎區,
天氣很熱, 兔寶寶都脫剩一件打底的"蛤蜊衣"了;
可憐的我穿著一件冷衫想脫都無得脫...

這兒的獅子老虎比起表演場上那些, 閒適自在得多了.
至少牠們有權利保留牙齒.

兔寶寶蹲下來睇老虎.

很多老虎都百無聊賴, 在睡晏覺.

我地每人俾多十蚊, 就可以行入去另一區域,
近D距離接觸老虎.
每人仲可以有一塊雞肉, 用叉"吉"住餵老虎.
就係因為有野食, 呢頭D老虎都很活躍,
也就顯得兇猛了.
佢地都好聰明, 一睇見有人進入呢區,
就抬起頭, 知道好快有野食...

呢度要好小心睇住小朋友,
只係一網之隔, 真係可以摸到隻老虎架!
連我都被佢地嘅咆哮聲嚇親...
不過兔寶寶竟然指著一隻, 話:"CAT!!"

兔寶寶, CAT係唔會連骨都LOAN埋架!
聽見佢地咬骨碎骨頭嘅聲音, 心都寒埋...

D老虎好似知我地嘅糧食不多,
食完, 就瞓返底等另外一D遊客,
都懶得應酬我地..
係呀, 呢個動物園唔係好多人架咋!
唔知係因為春節關係吖, 定係佢入場費比較貴吖, 定因為佢地方大所以唔覺佢逼喇.

不過好肯定一樣野, 佢嘅洗手間一定比香港嘅海洋公園乾淨, 同少人囉~

我地仲買多十蚊兩塊雞肉餵老虎,
其中一塊餵呢隻北美虎,
因為見佢單獨被困住响一個面積只有一百呎的地方...
點知隻老虎好似唔多肚餓咁, 可能食飽咗掛?!

行出猛獸區, 見到有用鸚鵡作招徠嘅影相點.
今次我地唔做水魚, 唔俾人掛D鸚鵡响手上面,
就咁離遠影幅相就算喇!

之後又見到孔雀、驢、駝鳥同牦牛等.
有一種叫羊駝嘅動物, 原來真係有架!
可惜我係响觀光車上見到, 影唔切相.

停底响兒童區, 俾兔寶寶玩吓直昇機.
玩一玩就廿蚊, 怪不得咁少人嚟,
樣樣計錢, 計返條數仲貴過海洋公園.

遊樂場過少少有羊仔同豬仔,
我地又花廿蚊買稻草餵佢地食.
有一隻羊好醒, 我一丟棵草去豬欄佢就即刻跳過去吃,
職員話只有牠一隻能跳咁高.
餵羊嘅過程都幾好玩, 連兔寶寶都爭住餵.
餵緊羊同豬嘅時候我又見到有人自備一袋紅蘿蔔來餵羊,
忍不住問職員, 點解可以嘅?!
場內明明寫著"切勿自行餵飼"架喎!
果職員就有D尷尬咁話佢地係職員,
之後又話佢地係呢個動物園嘅老細之一,
都唔知佢邊句先真喇!