有關坐月...

4月28日  星期四  炎熱

"我瞓得型唔型呀?! 苗條嘅我出世三日已經識得自己打側瞓喇~~"

"我著咗表哥仔件舊衫,  再擺個型D嘅姿勢出嚟俾你睇吓~~"

**********************************************************************
愈臨近兔寶寶出世嘅日子, 大少就愈緊張我坐月嘅安排...

雖然好多人都話, 坐月對產婦好重要, 坐月坐得好, 可以由本來身體唔好, 變成身體好好云云....

仲有好多規矩要守tim~~

大少同我阿媽都叫我請個陪月, 不過我一早打算埋身餵人奶, 再加上我地荷包都猛猛緊, 真係想慳得就慳, 請陪月嘅計劃就擱置咗....

大少就請咗一個星期大假, 可以留响屋企幫吓手, 自己又乘機休息吓...

一早我就同大少聲明, 坐月期間, 你想我食咩唔做咩, 我都會盡量去配合; 唯一一樣我唔會妥協嘅, 係我一定唔會唔沖涼唔洗頭LAW.....

好多時我瞓覺都會出汗, 再加上生BB果時咁肉緊, 成身都係汗, 我真係忍唔到成個月唔沖涼LAW. 仲有個下身, 即使用個護康瓶嚟沖, 唔沖涼都係臭架!!

生完之後住咗兩日醫院, 我已經忍住, 唔好响醫院沖...

話生完之後唔濕得水, 都幾多餘. 我唔知响私家醫院生嘅情況係點, 公立醫院, 係要產婦自己照顧BB嘅. 換完片餵奶, 唔通唔洗手咩?! 洗得手, 唔爭在洗埋塊面啦!!

出咗院, 都唔理大少EE鵝鵝, 返屋企即時闖入廁所沖涼洗頭....一句"唔衛生呀!", 大少都無聲出...

我知我知, 入咗風第二時會風濕嘛! 後遺症將來先知嘛...不聽老人言, 吃虧在眼前嘛!!!

不過, 做奶媽湊BB已經唔夠時間瞓, 仲要瞓果時週身痕, 我會有產後抑鬱嫁!!

不 過咁, 我都聽聽話話, 除咗返醫院同去健康院, 我都乖乖留响屋企, 連屋企樓下都無落過, 對於我嚟講都幾難為嫁.....每日由大少負責每日嘅飲食....亦都因為咁, 每日我食過咩大少都瞭如指掌, 即係我要乖乖戒口啦!! 而响12朝後, 我都開始食D補身嘅野喇!!

至於家務, 大少都主動做, 呢一點不得不讚大少嘅... 雖然做完之後有唔少手尾俾我跟...

希望快D捱過呢個月, 我可以快D行吓街啦!!

兔寶寶D"的水"好似大少呀!!

**************************************************************************