有關餵人奶及兔寶寶的事....

2011年4月26日  星期二  晴

今日兔寶寶12日大LU....

加加埋埋, 唔計响醫院住咗兩日, 兔寶寶一共俾我照顧咗10日, 今日我地去咗健康院, BB重得好好呢! 21号果日磅得2.5KG, 今日26号已經有2.69KG了, 當然仲係輕磅B, 不過醫生話已經比標準每日重20克多咗, 平均每日重30克呢!!  另外, 黃疸都減退至100零幾度了...

直度 而家, 除咗兔寶寶住响加護病房時醫院方面安排BB食奶粉之外, 我都係餵佢食人奶. 未生之前, 擔心嘅係自己唔夠奶, 事實係: 兔寶寶掛住瞓唔肯食; 大少成日話BB好乖, 唔多喊, 其實我仲擔心, 因為有姑娘話輕磅BB係唔識餓唔肯食, 又話血糖低會令到BB更加ring 吓ring吓, 愈來愈瘦. 兔寶寶瞓著果時又真係點整佢都唔醒, 真係無晒辦法.

所以, 當其他奶媽每兩小時埋身餵一次, 我就要吼住兔寶寶清醒時刻, 一個鐘左右就要餵; 而醫院話每次要至少餵15分鐘, 兔寶寶又偷工減料, 每次食5分鐘左右就收工....結果每次餵奶都好似"質"佢食咁, 好怕兔寶寶會有厭食症呀~~

因為兔寶寶太細粒關係, 本來買咗個BB浴盆好似好大個, 相對兔寶寶來講好似個泳池咁(其實係我地怕危險唔敢用...), 所以暫時用住個用來洗菜嘅膠盆(圖中藍色盤)沖涼先, 委屈你喇兔寶寶!!

出院後每次都係由我同大少夾手夾脚去幫兔寶寶沖涼, 而我响大前日就嘗試一個人幫佢沖, 好驚呀! 所以好快沖完...

呢幅相係大少見我咁樣抱兔寶寶, 笑問我係咪因為陀住佢果陣成日去馬騮山餵馬騮, 所以兔寶寶咁UN呀!!


暫時來講兔寶寶除咗食得少之外, 都算好好湊, 好乖, 瞓醒都會自己响張床度玩, 唔會大喊騷擾人, 係乖BB呢!!

好難得响兔寶寶睜開眼咁精神而又可以包得佢咁實, 每次用包被包住佢放佢落床, 佢都會自己掙扎開, fing兩隻手出嚟係咁舞, 好彩而家天氣唔凍, 咁就由得佢伸展吓....

**********************************************************************