果日如常地一條友返QE進行產檢, 無任何準備下, 醫生竟然叫我即時入院進行催生....
即時call大少幫我攞走佬袋.
之後去咗一個產前病房, 檢查過後, 醫生就幫我塞藥去擴張(整鬆)個子宮頸...
果個病房係俾D類似我咁要催生嘅產婦去等待穿水或者見紅, 痛楚不大, 所以無我幻想嘅尖叫場面...
醫生同我講, 有痛係正常, 要成個肚都要o拿住痛先好話俾姑娘知....
大少响探病時間, 竟然買咗粗菜館嘅豉油鴨舌, 白粥, 仲有兩支雪條嚟探病,....呢一點我一定要記低佢...
果晚瞓覺時, 個下腹就開始痛. 咁又唔係好痛嘅, 換吓姿勢就會好D咁, 呢D係塞藥嘅正常反應 (因為我見同房d女人住咗一, 兩日都無事, 心諗無咁快)....
4月14日 星期四 晴天
到早上醫生巡房前, 我去toilet, 有少少見紅; 見D姑娘忙到九彩咁, 就無出聲, 好快醫生就見我了.
話咗俾佢知, 佢幫我檢查過後, 覺得OK, 就叫姑娘安排我上產房吊藥催生...
咁快, 我仲未穿羊水喎?! 打俾大少, 我仲叫佢响屋企瞓多陣先唔好嚟住, 因為要好耐先生得, 好似係要差不多開到一定度數D姑娘先會俾丈夫陪同....點知到個姑娘推我上產房時, 佢先話我知丈夫係全程可以陪我嫁!! 我已經收埋咗個電話了....
上 到去, 二人房, 不過得我一個, 隻手已經駁好鹽水...果時12:00, 起碼有6個姑娘响間房入面, 都唔知攪咩, 但就令我好緊張...問D姑娘幾時可以通知大少嚟, 佢地話settle down好D野就可以俾電話我打... 之後有個姑娘俾咗個罩我, 叫我有痛就聞....
吓? 我唔痛喎~ 好似唔係好同其他產婦D steps 喎! 我整係想大少快D嚟...
之後有個醫生嚟, 話同我篤穿羊水, D姑娘叫我吸D笑氣....
篤穿羊水都唔係太痛... 之後個姑娘就俾個電話我叫大少嚟, 佢地仲叫我同佢講, 叫佢快手快腳食埋飯先好嚟...一邊姑娘幫我响隻手度落催生藥...
無 幾耐, 我覺得有D唔舒服, 個姑娘叫我唔好忍, 有痛就吸笑氣...遲鈍嘅我, 先知陣痛已經開始了....D姑娘離開間房, 我一個人响間產房度, 原來陣痛真的很難受呢! 我要好好記下果種感覺...將來兔寶寶唔聽話令我生氣, 我要提醒自己, 幾艱難先生吓兔寶寶....
响我痛到死去活來嘅時候, 大少來了...
個姑娘耐唔耐入幫我檢查, 一度都未開, 佢話催生過程至少8至10個鐘, 由一至三度係最痛, 佢問我打唔打止痛針, 同我解釋支針有媽啡成份, side effect 係BB可能出世之後兩日會掛住瞓, 但如果嚴重可以幫BB打解藥針....
止痛針?!
打! 死人都打! 而家一度都未開, 仲要痛多8個鐘, 我頂唔順喇~ 最好一野扑暈我tim ar~ 都唔理大少反對了(大少話支針影響BB唔好, 叫我死忍....)
最攪笑係有個姑娘問我睇唔睇電視, 一手開咗部42" plasma, 仲塞個 remote俾大少叫佢較台.....我仲聽到做緊都市閒情, 講緊點樣養狗....
唔知痛咗幾耐...d姑娘叫我嘗試吓"痾"呀~
咁快得?! 由始至終無人同我講開咗幾多度喎~
佢 地準備好腳架, 教我點樣下巴頂落心口吸氣, 又忍住...我之前睇人地D blog, 知道如果"痾"得唔暢順, 呀B會好危險同好辛苦, 所以無論點痛我都跟從D助產仕嘅指令...好快, 係我諗都無諗過咁快, 下體feel 到一陣舒服嘅感覺(我形容得核突少少, 就好似急咗好耐有得痾嘅感覺.), 兔寶寶就出咗世喇!! 果時只不過係大約兩點咋!!!
當我望到兔寶寶嘅時候, 第一個感覺係: 好細粒, 好黑咁呀! 之後我好心急, 想睇清楚佢個樣, 但係我除咗眼鏡睇唔倒, 要姑娘提大少俾返個眼鏡我...
跟住D姑娘抱咗兔寶寶出去打針同清潔, 又同我檢查會陰嘅傷口...
兔 寶寶真係好乖呀, 佢盡量唔整痛媽咪, 我下面係幾乎無傷口嫁!! D姑娘後尾講返, 因為BB size細, 個頭仔又啱啱好對正個子宮頸位, 所以我除咗一D好輕微嘅擦損外, 係完全無野, 不過係因為吸咗D笑氣, 仲有打咗支媽啡針, 所以覺得暈暈地同好眼瞓.... 亦都好好彩係我個人比較受藥, 所以生產過程先會咁快...
到姑娘抱返兔寶寶入嚟, 我立刻精神晒Lu...即刻有姑娘教我喂人奶....
成 個過程, 第一真係要多謝兔寶寶同我配合得好好; 第二真係要多謝大少, 飯都唔食仆過嚟醫院, 成隻手俾我捉到紅晒, 連件衫都'wear'埋...又同我講D爛gag分散我注意力, 令我無咁痛...仲有真係要多謝QE嘅姑娘, 成個過程對住我呢個係咁典吓典吓又尖叫嘅人, 一D唔耐煩都無, 仲不停讚我做得好, 講說話嚟安慰我, 仲好有禮貌呢!!
而最後, 我之所以有時間打呢編blog, 係因為兔寶寶尋日因為唔肯食奶, 我怕係黃疸所以抱咗佢睇急症, 醫生診斷為黃疸需要住醫院, 今日都未出得嚟, 希望兔寶寶早日康復, 返屋企食多D奶, 唔好掛住瞓, 食多D食好D, 咁就好了....
兔寶寶未入院前嘅相片, 當時已經有D黃:
"我唔肯食奶掛住瞓, 係黃疸嘅病徵嚟嫁!! Daddy仲話我面色好BB掛住瞓係正常; 好彩媽咪醒目堅持要帶我睇急症咋!! "
"我應該好快出院喇~ 媽咪你襯而家休息多D啦!!"
沒有留言:
張貼留言