偷閒半天

2月7日  星期五  晴天

今個星期三大少本來無假放, 

但想到我和兔寶寶呆坐家裡咁多日, 

於是佢都好識做咁"自放"半天假, 

帶我們去馬騮山睇馬騮...

餵完馬騮, 我地出咗九龍, 

去返以前我大肚時常到的小酒家去吃飯.

成年幾兩年無嚟, 個部長依然認得我地.

新春期間, 依然有好抵食嘅套餐.

我地兩大一小, 眼闊肚窄咁叫了個四人餐.

叫咁多餸, 係為咗補祝大少農曆生日呀~

 兔寶寶一坐底就不停夾花生.

叫完餸我地仲去咗對面惠康買橙汁飲, 

嚟呢度就好似去大排檔咁, 無話不准自攜飲料嘅~

龍蝦伊麵.

無燉湯又無蛇羹, 

改咗兩隻蒸鮑魚.

真係可惜喇, 呢度D燉湯好正架~

蒜茸粉絲蒸大扇貝

豉椒炒蜆,

D蜆雖然係細細隻, 但洗得很乾淨, 

食雞蛋都食到有沙嘅大少都話碟蜆一粒沙都無.

深圳向村辣雞煲就兔寶寶食改了做啫啫雞煲.

呢排呀B成日都話要食雞, 

點知佢唔太吼呢個雞煲, 

而我就覺得幾對胃口.

翡翠龍躉球反而麻麻.

魚片不太新鮮, 好大陣雪味, 

連鍾意食魚嘅兔寶寶都唔吼.

呢餐兩個大人食得很滋味, 

但小朋友就無乜好食, 

一早走去坐大少大脾.

生啫蝦膏芥蘭, 好正!

好多蝦乾和魷魚乾在內.

食到呢度, 大少已經停晒筷, 

呢煲菜幾乎係我食晒架~

沙薑雞腳, 同埋無影相嘅椒鹽狗肚魚, 

無食, 打包走.

最後有成三大盒打包.

又食又拎平靚正, 埋單都係五百五蚊.

呢度食野仲有個好處, 我地叫咗個套餐後, 

個部長寫晒D餸名落一張張飛仔度, 

要食邊碟先就落飛俾侍應.

 可以慢慢食, 

仲可以俾我地決定邊D餸食唔晒打包拎走.

呢晚大少唔隊啤, 對紅牛.

睇下兔寶寶個樣, 幾招積?!