去動植物公園

2015年3月20日  星期五  晴天

又好耐無寫blog喇!

其實每日都有好多野想寫低, 

希望遲下兔寶寶再大少少, 會有多D回憶. 

可惜的是一日只能有廿四小時, 時間又走得太快~

兔寶寶返埋學, 就更加覺得嵗月唔等人!

出糧果日最開心, 會驚訝: 吓, 咁快又一個月喇!

 

 

返工返學...似乎都係咁嘅日子.

不過對兔寶寶而言, 每日都係新鮮的.

學校會安排不同的節目俾小朋友.

老師有時會帶小朋友出街去"體驗生活".

早排參觀過麵包鋪, 實地買麵包.

 

星期三, 

兔寶寶就同老師同學以及一些義工家長去咗動物公園...

 

無錯, 教極兔寶寶, 佢都堅持呢個係動物公園.

家長唔需要出席亦唔需要準備食物給小朋友,

只需在出發前一天帶定個食物"吉"盒, 

姐姐就會把去野餐的食物預備好.

十分感謝義工家長除照顧小朋友外, 

還拍了照片發給我們. 

兔寶寶把口就話果日整係食麵包,

但根據照片估計, 當日野餐的食物有麵包、小雞腿、栗米和西柚等.

而問佢見到D乜野動物呢?

佢就話去動物公園見到蝴蝶喎~

小朋友係好聽老師嘅說話架!

未去之前, 兔寶寶已不停講話: 

去動物園唔可以餵動物架~

(題外話: 由動植物公園簡化成動物公園, 

再簡稱為動物園, 

兔寶寶嘅化繁為簡能力, 實在很神奇!)

老師湊住咁多位小朋友, 想唔謝晒都難~

但小朋友肯手拖手, 乖乖咁聽老師講野, 

呢個場面又真係幾可愛!