大少生日

2月11日  星期二  寒冷

今日係大少正日生日, 

早在兩三個月前,

每次行過美心餅店見到Hello Kitty蛋糕, 

我就會指住同兔寶寶講,

爸爸生日就買喇!

結果今日一早, 

呀B第一句講嘅, 就係Hello Kitty蛋糕!

連一面著鞋出門都提住要買蛋糕...

攪到我買咗, 都唔敢拎返屋企住, 

怕大少未起身, 已經俾呀B扭要切來食!

大少同Hello Kitty大纜都扯唔埋, 

就係因為屋企有兩位女性, 

所以男人老9生日都要啃呢隻蛋糕!

當然最開心嘅, 

係兔寶寶.

今次終於夠氣吹熄枝爉燭!

一磅裝好睇但麻麻地好食嘅蛋糕, 

就俾我地三個人在LUNCH之前解決咗!

唔係因為應承咗兔寶寶都唔會買, 

自己整嘅仲好食.

晏晝去咗橋底辣蟹食套餐!

兔寶寶一早起身, 坐底已經中吓中吓.

 套餐包白飯和湯, 

今日係南瓜龍骨湯.

小菜選了栗米石斑塊

還有鎮江雞球

一個餐四十幾蚊, 

在銅鑼灣區雖然不算貴.

但這間名店現在主要是為國內自由行服務, 

人地食個LUNCH都又蟹又魚又海鮮咁, 

自問就算生日都無食得咁豐富...

伙計對我地呢班食套餐嘅港客愛理不理咁, 

問多句都"摺"一聲.

我地就見到有個掉枱嘅奇景, 

伙計以為入嚟食蟹嘅俾張圓枱人地, 

一叫套餐就叫人掉去搭枱;

而稍後有兩個講廣東話嘅走入嚟, 

伙計預佢搭枱呢?! 人地一散叫就幫人掉去第二張枱,

仲話"無枱就要搭姐, 有枱就唔洗搭啦"..

因為佢地講野都大大聲聲, 

我地先聽到咋!

仲有呢, 食貴野嘅客人就叫伙計嚟埋單, 

食套餐呀?! 唔該你出去自己埋啦!

Sorry, 咁嘅態度, 

學大少話齋, 下次有人請我食蟹都唔會嚟!

發完嚕囌..

呢日雖然係好凍, 

但在大少返工後我都有帶兔寶寶去公園玩.

著到成隻糉咁, 一定唔怕凍.

仲有對手襪架, 係去到公園除咗.. 

怕咗兔寶寶成日指住自己對手話著咗"臭"襪~

見我影相即刻走夾唔抖~

一係就望第二度~

仲要扮晒憂鬱果下先頂癒...

你有張良計, 我有sir滑梯!

做媽咪嘅, 實引到你笑嘅~