老人家話BB仔唔讚得...
我開始信喇....
之前仲話兔寶寶好乖, 唔多喊; 大少又話兔寶寶即使喊都好, 都喊得好斯文喎~
當我無講過啦!!
就尋晚大約5點(定應該話今朝?!), 响我最眼瞓嘅一刻, 兔寶寶呢個大小姐, 聲嘶力竭咁喊; 我相信, 全層樓嘅人都會聽到...
好, 你肚餓嘛, 我餵你食.
兔寶寶乖乖咁食咗2分鐘, 定係一分鐘. 佢個樣又好似想瞓咁, 咁我快手快腳掃完風, 就抱番佢落床仔. 我就爬番上床, 繼續搵我嘅周公...
啱啱同周公傾緊計, 又聽到兔寶寶大喊....
大少成日同我講, BB喊唔洗次次都理佢, 等佢喊多D, 當鍊吓個肺囉. 佢又真係好好野, 好似借咗聾耳陳隻耳咁, 唔好話出嚟睇睇佢, 直情郁都唔郁吓.........
我 又點會捨得兔寶寶係咁响度喊呢! 爬出去餵奶... 真慶幸我係餵人奶, 除件衫就得, 唔洗沖水沖奶攪一輪... 兔寶寶又安靜咗一兩分鐘, 如是者, 由4:00a.m. 一直去到11點幾12點, 我成個行程就係爬落床, 除衫, 餵奶, 掃風, 著返衫, 爬上床; 當中仲要換咗N咁多塊片, 手腳一慢D, 一向好似好好脾氣嘅兔寶寶小姐就睇唔順眼, WEA一耳喊出嚟....
直到中午時份, 我放棄咗瞓覺呢個念頭, 兔寶寶小姐就大覺瞓LU...
以後都要叫佢做曳曳豬.........
呢個曳曳豬同我同大少一樣, 都係一邊面有酒凹嫁!! 想唔認佢都唔得...
曳曳豬: "媽咪! 有時間你就瞓啦, 有排你捱呀!!!"
沒有留言:
張貼留言