大尾魷年夜飯

1月30日  星期四  晴天

尋日大少放假, 

一起身就走去街市買年花.

街市係無花市咁多選擇, 

但就無咁迫囉~

呢一晚本來打算三仔毑去潮燒食就當自家團年.

點知哥哥仔個爸爸釣咗七隻大尾魷返來, 

有咁新鮮嘅野食, 最後我地選擇自己煮!

我覺得魷魚雙眼好似兩粒大電池咁, 

好得意!

嘻嘻, 我係第一次劏魷魚咋!

好彩都唔係好難, 係墨汁多D, 

                                    洗得耐少少囉. 

劏完, 剩肉都一大盆.

留返四隻肉放冰箱, 

其他就分翼、鬚同魷魚咀;

滾水灼一灼, 食得!

劏洗魷魚嘅期間叫大少去阿信屋買豉油同日本芥辣,

雖然只係滾水灼一灼加豉油, 

但D魷魚真係好鮮甜呢!

 

 第二碟魷魚肉!

不過我地係食唔晒嘅!

大少又帶埋兔寶寶去街市買呢D大頭蝦返嚟,

又係灼! 慳水慳力!

因為有新鮮魷魚做比較, 呢隻蝦麻麻地好食.

佢仲買埋豉油雞, 全部都係肉!

我整咗兜西蘭花打算一齊灼架, 

但最後掛住食魷魚, 一棵菜都無食到.

兔寶寶最唔識食, 

只係食最唔好食嘅雞, 同埋出奇蛋!

食完飯洗埋碗, 

我地出咗去維園行年宵.

多人到爆!

行咗唔夠五分鐘已經想走!

全部都係D後生仔, 

我諗行埋今年, 出年我都未必行了.

襯熱鬧, 買咗兩個氣球,

加一對拖鞋, 仲有兔寶寶嘅吹波波玩具.

返到灣仔, 食埋個招財福堡同雪糕先返屋企.

祝大家馬年快樂, 

身體健康, 步步高陞!!!