乳香燒雞

5月19日  星期六  晴天

今朝起身終於見到陽光喇,
希望嚟緊會繼續放晴啦!
日日落雨我同兔寶寶真係邊度都唔洗去喇!!


尋日晏晝焗咗一隻乳香雞,
「乳」係腐乳個「乳」.
見到好多blog友都係剪開隻雞用焗盤焗,
我都來試吓, 咁樣就順手焗埋配菜.

由於落咗成日雨, 無走落街買餸,
响冰箱摷盒現成薯條放响底就算數.
薯條索咗腐乳汁, 即刻變咗唔洗shake嘅shake shake薯條,
來一個中國芝士味!!!

可能我個焗爐火力太猛, 反轉雞皮向上焗一陣層皮已經燶咗,
最後要用錫箔紙蓋面.
而且我落咗成七磚腐乳,
再加豉油同埋雞粉去醃咗兩日都仲唔係好夠味,
又唔夠咸又唔夠腐乳味,
都唔知係咪我落得太多糖中和咗D鹽份呢?!
我覺得下次可以整得更好.