星期日果晚呀媽接走咗兔寶寶,
等我可以清靜地收拾東西.
我就好安寧呀!
但就攪著呀婆同舅父了.
兔寶寶由出世至今都很少離開媽媽
(要說, 就是多得雙非孕婦, 兔寶寶出世後過咗24小時多D,
我地兩母女就被認為"情況良好"而俾人趕離醫院了,
就是在她出世後的第三天, 也即回家後的第二天,
因為黃疸病入急症住咗兩晚初生嬰兒病房,
响果度父母是不准留宿的, 果次係兔寶寶人生之中第一次離開我兩晚.)
朝頭早搬屋已經夠刺激了,
晚上還要離開媽媽, 多D哭鬧都是很正常的.
本來呀婆是打算留呀B在佢家過夜的,
不過呀公無乜耐性, 受不了BB的哭聲,
於是乎呀婆就帶埋兔寶寶過隔離舅父屋企瞓喇.
舅父屋企雖然都算大, 但床只得一張.
佢已經讓咗張床俾BB同婆婆瞓架喇~
不過兔寶寶唔肯入舅父間房....(莫非好大陣男人味?! 但舅父好整潔架喎!)
呀婆唯有同兔寶寶瞓梳化...
本來屈屈就就都叫兩婆孫有得瞓吓嘅,
但呀婆話兔寶寶瞓到半夜要搵媽媽, 又扭飲奶奶,
氹極都不肯躺下, 要坐起身瞓覺喎!
於是呀婆除咗"啤"一聲之外, 就係被迫罰坐住嚟瞓.
當然, 習慣間屋寧寧靜靜嘅舅父同樣係唔慌瞓得好~
我認!
我抵打!
我係衰女!
就响佢地家無寧日嘅晚上,
我同大少去咗渡船角嘅"隨變燒烤"食雞煲呀!!!
我地食宵夜咋!
大少同我都搬完一日野, 都無乜胃口,
加上趕住返屋企休息,
只係叫咗半隻雞嘅麻辣鍋底,
配料要了一份雲吞、一份魚腐,
呢兩樣野一份有三粒;
仲有一份(即係兩棵)娃娃菜,
同一份叫"隨變麵"的東西.
"隨變麵"很得意, 本來白色, 滾滾下會好似西米咁,
出面果層變透明, 食落煙煙韌韌咁,
同薯粉差不多.
不過要响佢仲有白色嘅時候就好食喇!
到佢完全變晒透明就淋pet pet, 唔好食架喇!
連埋一罐ZERO和一罐王老吉,
呢餐埋單百七蚊.
沒有留言:
張貼留言