退燒了, 出紅點

12月4日 星期日  晴天

尋日早上(剛起床還未吃藥時)兔寶寶都仲係有D燒(38.5度),
可能食咗藥, 成日都瞓, 同佢啱啱出世嘅時候一樣.

D藥好勁, 食完即瞓(星期六下午)...

不過就成日都扎醒, 一醒就大哭.
同埋可能日頭瞓得多,
到晚上不用食藥時反而瞓一瞓又醒一醒...

瞓醒吽吽豆豆(星期六下午)...

好彩撩吓佢都識笑姐(星期六下午)...

不過就瞓到眼皮都腫腫地(星期六下午)....

******************************************************************
個醫生同我講話開咗三日藥(星期五, 六, 日),
我仲諗住夠今日食,
點知今朝先發現樽藥水係唔夠今日食嘅,
最多得果兩次.
每次餵藥都好辛苦,
兔寶寶係咁掙扎大叫,
唔食藥又唔得;
我不得不恨下心腸"LIN"住佢個口用針筒唧D藥落去.
兔寶寶之前都無响我懷中咁劇烈掙扎過架!
一方面怕太大力整親佢,
又怕佢頂返D藥出來,
另一方面要顧住佢唔好哽親;
加埋聽住BB掙扎嘅喊聲,
攪到我都幾乎喊埋一份.
上次支氣管炎入醫院雖然都要"質"兔寶寶吸藥,
但就無今次咁感觸良多.
我真係覺得, 媽媽係好偉大架!

     兔寶寶: 媽咪唔好再質我食藥啦!


唔知係咪我質佢食藥令兔寶寶驚咗?
除咗母乳, 呢兩日佢咩都唔食,
(豆腐同餅仔都試過, 佢都唔擘大口, 星期五果日都肯食架!)
之前佢喜愛用飲管杯吸水,
即使佢唔吞落肚, 都會吸起D水再噴出來,
但係今日佢最多都係含住支管唔吸;
連大少都覺得我質佢食藥令佢嚇驚咗...


兔寶寶: 你質我食藥, 我閃, 我避, 我BU!!

今晚兔寶寶雖然不停扭計,
但都算比昨日精神;
正當我以為佢差不多好返時,
又俾我發現佢耳仔後面同肚子都有紅點.
呢D紅點唔係平時食野敏感果D紅點來...
上網check吓,
BB退燒時出嘅紅點有可能係玫瑰疹,
但又唔知係未...
上星期五睇醫生時個醫生提過BB嘅甲狀腺都有可能影響佢發燒,
 後日(星期二)我地都要返QE見醫生睇BB嘅甲狀腺報告,
希望兔寶寶捱埋聽日,
最好聽日就已經無晒事啦!

兔寶寶: 多謝大家嘅關心呀, 唔洗驚我餓親架,
             我會飲多D奶奶, 吸收多D抵抗力架喇!!