朗田日本料理吃放題

11月8日  星期四  晴天

剛剛過去嘅星期一, 雖然大少係放假,
但我同佢各有各忙,
到晚上先約埋一齊吃放題呀!

今次我地係用團購卷,
百幾蚊就可以食成六個鐘!
真係啱晒我地D大胃王呀!
平時我地都算大食架啦,
估唔到原來有好多人比我地更擦得,
我地走果時唔係好多枱埋咗單咋!
我見有D人真係由六點一路食到尾, 真係後生無敵呀!

百幾蚊食六個鐘嘅放題, 有咩食呢?

壽司手卷類, 明顯比其他地方少種類,
連花之戀都無...



刺身...就係咁多, 無我最愛嘅甜蝦...

質素亦麻麻, 果兩件吞拿魚嘅顏色嚇到我唔敢食.
可以食得過的只有三文魚和魷魚...

係咪好失望呢?
開頭真係架, 尤其一開始我地就係食刺身先,
我仲即刻劃兩碟炒雜菜....因為炒雜菜唔會難食得去邊嘛~

珍味小食我都劃多兩碟, 因為食佢好過食刺身好多...

飲品都要飲多兩罐,
佢都算多野飲揀架!
特別D嘅有"巴侖氏清熱飲"..

啤酒都有三款, 大少就要咗沖繩啤..

睇返野食先, 炸野都幾OK...

炸蝦天婦羅同埋芝麻雞翼都好食,
仲有個炸芝士年糕都幾特別.

戲玉嚟喇, 原來呢度最好食係串燒...
所有串燒都好食過其他放題店.

好食到呢, 我覺得用百幾蚊單單俾我任食串燒都非常抵呀!
特別推介霜降牛肉同羊扒(羊扒係大少話好食咋, 我唔食羊嘅...)

牛舌同其他雞類串燒都好好食, 試過去好多放題店,
D雞都燒到乾晒...多春魚大少食多六串;
右下圖圓形果兩塊係芝士豆腐, 左下係燒菠蘿,
兩樣都係特別得來幾好食的.

兔寶寶見到面前嘅燒牛舌,
二話不說攞起放入咀咬,
咬完之後仲....走埋來鍚我!
真係多謝晒!

見呢個"夏日推介", 我地又劃埋...

呢個睇樣就OK, 不過食落就埋埋,
無論蝦、蜆同青口都無晒鮮味架喇~

雪糕都係任食架!

可能大家都預咗係食六個鐘, 都盡量拖慢來食,
好多人都係六點幾就入座, 到我地走嘅時候八點幾九點,
都無乜人走, 有D見佢叫咗甜品吃, 以為佢走啦,
原來食完雪糕又再由刺身冷盤開始食過..

值得一讚嘅係侍應都幾友善,
有個類似經理嘅人物仲不停提醒客人可以食到23:30架!

叫我地努力加油慢慢吃添!

不過我家嘅兔寶寶又點會俾我地坐六個鐘吖!
佢一食飽, 我就開始唔得閒喇...
你睇, 佢要自己篤菜吃, 我見支竹簽真係牙煙...

玩完菜, 又扁咀黑埋口面,
心裡面梗係鬧我地坐咁耐都唔走啦!
俾Daddy氹兩氹, 又笑返...

跟住我地俾咗一匙仔雪糕佢自己"畢"來吃,
佢食到LAM完匙面, LAM匙底.

跟住仲成個氧氣罩咁cup落塊面度LAM...

雖然兔寶寶係就係無乜耐性,
不過佢就好易氹, 同大少玩吓"遞牙簽",
已經笑得一大餐, 所以呢,
我幾時都話我個女係最可愛嘅...