Tea @ La Bon’s Café

11月22日  星期四  陰天

星期一這天, 又是大少放假的日子,
醒來後佢又話去飲茶...
但我真是不想飲茶了!
平時帶兔寶寶去公園玩, 會經過一間意法菜,
望望門口的餐牌, 睇落去好吸引,而且下午茶餐都不是很貴,
咁我就提議去試下喇~

呢一日, 我發覺兔寶寶D頭髮可以俾我撥去耳仔後面喇!
似返個女仔多少少! 好開心!


我地先叫咗兩個下午茶餐,
大少要了什麼牛仔肉、野菌炒意粉, 跟凍檸茶,
這個餐好似是五十幾蚊.

份量不多, 男仔應該唔夠食,
但佢都講都明係tea set, 就算係咁了.
意粉唔會煮得太淋, 牛仔肉都幾好食,
不過就委屈咗大少, 因為兔寶寶好鍾意食,
咁大少就唯有食少D了...

而家每次出外食野, 好多人都會對自己食飯嘅兔寶寶進行注目禮,
一來佢D"架餐"幾大陣仗, 二來佢食野個樣又真係幾攪笑,
呢度差不多個個侍應都撩下兔寶寶...

我就叫了一個三文魚、野菌、牛仔肉腸奄列,
配生菜沙律和薄多士, 呢個餐好似係三十八蚊.

切開個奄列, 唔洗食都估到好無味啦!
與其去牛奶公司食佢個炒蛋仲要受D伙計氣,
咁我寧願俾多幾蚊坐得舒舒服服响度食奄列喇!

我叫嘅熱朱古力, 都好好飲架!

大少碟意粉俾我抽完水之後再分咗D俾兔寶寶,
以佢嘅食量, 邊會飽呀?!
見其他食客叫呢個煙三文魚沙律, 賣相不錯,
又跟住叫多碟, 呢個餐唔記得係咪四十幾蚊.

多咗一杯餐飲, 大少就試下呢度D咖啡,
飲完之後佢不停話一定會再嚟呢度, 因為杯咖啡夠濃郁喎!

有一個男人不停逗兔寶寶玩, 開頭我以為佢係侍應,
後來見佢埋數, 再加埋大少同佢吹一輪水之後先知佢係老細.
個老細同我地講整奄列用嘅蛋不是普通街市買嘅蛋來,
咖啡亦是自己買豆返嚟磨, 所以先有咁嘅水準.
佢又好好人咁教我地如果想整好似華星呀、牛奶公司果D炒蛋呢,
就要加D cream, 同埋加少少生粉水, 大火快炒, 就會有咁嘅效果.
佢仲話以前間鋪開响大街, 加租加得好犀利,
迫於無奈先般嚟呢D後街小巷, 如果再係咁加租法,
好似佢呢D無大集團撐腰嘅小店, 真係唔洗做了.