到香港動植物公園遊玩

11月23日  星期五  陰天

仲係寫緊星期一!
食完LUNCH之後, 我地發覺兔寶寶條褲濕咗!
於是要返屋企換過之後, 就去動植物公園行吓.
都唔知有幾耐無嚟過,
印象中, 以前都係由爸爸帶我嚟架!
如果唔係兔寶寶, 我想我都唔會有咁好閒情嚟!

人工小河嘅水好清澈呀!!!
清澈到連一條小魚毛仔都睇得清清楚楚.


兔寶寶初時仲肯拖住行, 行多兩步佢已經撇甩我地隻手,
要自己行!

潔淨嘅荷花.

呢個公園管理得很好, 每個角落都是乾乾淨淨,
花花草草都修剪得整整齊齊.

我地決定入溫室行一行, 一入去就見到漂亮嘅紫羅蘭.

花海同唔多肯影相嘅小朋友...

兔寶寶: DADDY, 咪捉實我阻住晒我四圍走啦!


呀B對花花草草無乜興趣,
反而對呢三隻同佢差不多size嘅熊熊跓足觀賞.

又不忘"襟"吓電腦...係得個襟架咋!
 

之後我地上去睇熱帶植物, 首先有仙人掌...

5

兔寶寶你睇路呀, 唔係仆落D仙人掌度....
就大件事鳥...

睇到呢種仙人掌, 就一定會聯想到Snoopy入面嘅卡通人物...

影呢幅相, 唔係話俾大家知兔寶寶跑得有幾快,
只係想影吓呢個仙人掌垃圾桶咋!

愈行愈快嘅兔寶寶, 橫衝直撞,
要佢向前行佢偏偏向後走...

想話捉住佢呢?!
佢即刻蹲低"典"地下, 等你無佢符...

*****************************

行出溫室, 我地打算去睇雀仔先.
因為見溫室17:00關門, 估計睇雀仔嘅地方都係差不多時間閂閘.
沿途有不少幾得意嘅植物, 加上天氣好,
行得好舒服.

首先我地睇咗睇D俾個籠包圍嘅禽鳥先...
呢隻鳥忘記係乜名, 但佢個咀好硬, 俾佢啄一下都幾係野,
難怪佢可以食蝙蝠、青蛙、甚至蛇啦!

之後行去大雀籠睇, D鳥响我地身邊飛來飛去..

雖然呢度好多雀烏, 但好多都飛得好快,
一係就太遠我部傻瓜機影唔倒,
可以影到嘅係得兩種比較唔怕人嘅...

呢隻我行到好近影佢食栗米, 佢都唔驚喎!

話去睇鳥, 不過我都係鍾意影兔寶寶多D,
因為...我並唔鍾意睇雀仔嘅...
對一D捉唔到抱唔到摸唔到嘅動物, 好似鳥呀魚呀咁,
我就無乜興趣喇, 純粹係陪大少同兔寶寶架姐!

兔寶寶圍住張枱轉來轉去,
呢隻雀好似想玩埋一份咁,
飛落去兔寶寶度...

*********************************

睇到咁上下, 個觀鳥園都差不多閂門,
我地就行去遊樂場玩.
一見呢條長滑梯,
我就叫大少抱住兔寶寶玩一次...
佢竟然話: sir到咁上下塞住咗唔上唔落咁點算呀?!

乜大少你唔係成日都話你自己好窈宨架咩?!

我又同兔寶寶玩咗一次...
原來...好好玩!
不過真係唔太啱咁細嘅BB玩, 所以每人都玩咗一次就算了.

去公園少不免玩鞦韆,
宜家BB好大膽, 就算打到好高都仲格格笑...

玩到日落了, 我地响pp行咗一陣,
補充返D糧水, 就搭叮叮返屋企LU...
呢幅相, 除咗証明兔寶寶好八掛之外,
如果佢望實一個人而果個人唔俾反應佢(即係唔對返佢笑, 唔同佢玩)的話,
呀B係絕不罷休的, 一定會啤到你俾反應佢為止.
有D睇落唔太鍾意BB嘅人都會忍唔住笑笑口問佢做乜望到實一實...
所以呢, 兔寶寶個面皮都幾厚架!