食糖水

11月24日  星期六  陰天

兔寶寶: HELLO! 大家好! 又係我呀!
             著住同一套衫, 即係繼續寫DADDY放假果日!


真係唔好意思,
將平凡嘅放假天當咗一套連續劇咁分廿幾集來寫,
擺到明係呃blog, 大家唔好檢舉我呀!
無計啦, 我嘅生活基本上日日都係咁,
係大少放假果日叫做精彩少少,
所以想寫得詳盡D, 等自己留多D回憶嘛~

去完動植物公園,
我地諗緊去邊度食飯時,
路過一間樓上茶餐廳,
大大個招牌寫住鐵板雞扒只係三十幾蚊!
見咁抵食就闖咗上去喇~

上到去, 我地兩個...係無人叫雞扒嘅.
大少叫咗鐵板西冷, 無記錯的話係四十八蚊...

四十八蚊係唔包湯同野飲嘅, 每樣野要再係加5蚊,
不過就可以俾你揀跟飯、意粉定薯菜...

見到餐牌中加十蚊有頭盤,
咁就問吓伙記頭盤係乜?
原來係薯仔沙律, 咁就加10蚊試下啦!
10蚊雞...都唔錯喎!

我就瞟倒隔離枱碟餸好正,
於是問吓個伙計果碟係乜...
佢仲响度十下十下研究果碟係乜嘅時候,
果枱對夫婦就答我地: "係6號呀!"
原來係6號晚餐, 西蘭花炒鮮魷牛仔柳,
跟白飯同湯, 不過呢個餐都幾貴,
要六十幾蚊, 本來我想要返雞扒就算喇,
點知大少話想食就叫喎...咁...



跟餐嘅湯, 夠晒火喉好好飲,
怪不得一坐底就聽到隔離飲緊湯對夫婦每人加多五蚊要多碗(即每人飲兩碗...)
咁我都唔執輸, 飲完呢碗,
再叫大少跟餐加五蚊要多碗...



兔寶寶: 媽咪又長又噚, 大家睇我對擒拿手點練法好過...

************

食完晚飯, 時間仲係好早,
返屋企HEA咗陣, 我地就落街食糖水LU!
大少就順便帶一帶我路,
點樣由我家行去時代廣場...
响商場逛一陣, 兔寶寶又四圍走,
一閃, 走入人地攞免費報紙嘅紙盒入面,
點都唔肯走返出來...

兔寶寶...你係咪以為自己搭緊LIFT呀??

傻BB: 點解咁耐都未落到去下一層嘅?!

行完商場, 出返去松記食糖水.
不嬲都覺得松記D野好抵食,
但今次去...發覺D野貴咗好多呀!
樣樣野都再咁加落去, 就嚟食糖水都食唔起...

我嘅淨芒果布甸加椰汁糕...

响我威逼之下, 大少叫嘅"檸芝木槺布甸"...

狼吞虎嚥嘅兔寶寶...
食飯...佢食得斯文好多架!