北美鬆餅 Northern America Muffin

8月18日   星期四   晴天

點解呢個叫北美鬆餅呢?


食譜咁叫我就咁叫咋~~~

可能北美果邊D人鍾意食蕉同花生醬掛?!

我都好鍾意食花生醬, 鍾意嘅程度,
係搽面包果時, 都唔知係花生醬搽面包, 定面包搽花生醬....

連帶一切有花生醬嘅食物: 好似豬腸粉, 沙爹醬, 夾餅等, 都好鍾意嫁!!

人人都話"翠華"嘅奶油豬正, 其實佢嘅"奶醬豬", 仲正呀~~

愈扯愈遠添! 呢個係跟為食貓嘅食譜,
不過我改緊D, 有D野屋企無, 又唔想咁甜, 就加D減D咁...

反正鬆餅都唔係太過執著於份量嘅...


以下係我更改過嘅食譜:

A: 糖  80克
    花生醬  4湯匙
    油       1湯匙

B.  熟香蕉   2條(壓爛)
     蛋    1隻
    
C.  低根粉  90克
      發粉   2茶匙
       鹽      1/4茶匙

將A料, B料及C料分別攪勻後, 將B加入A中, 再篩C料入內.
用湯匙"畢"入四個中型蛋糕杯中, 面灑上芝麻.
用180度焗20分鐘.

幾簡單~ 唔計洗碗同焗嘅時間, 成個過程只係需要15分鐘,
我係襯大少游完水返嚟果少少時間焗嫁!!!

呢個食譜, 係好成功嫁!!!
好好味呀!!
有無食過以前kfc朝頭早賣果個粟米鬆餅呀?
好似蛋糕咁嫁呢!?
呢個北美鬆餅嘅質感就有少少似佢喇!

面層脆脆地, 入口係濕濕軟軟嘅, 有少少漿口嘅感覺...
又食到好濃郁香蕉味喎~
我唔明點解Mrs. Fields 果D鬆餅賣咁鬼貴囉...
我覺得我整嘅呢個好食過佢果D!!!


鬆餅真係好, 又易做又好食;
不過係肥D囉!
呢個食譜只係用咗一湯匙油, 不過花生醬都肥嫁嘛~


*****************************************************************

今日幫兔寶寶沖完涼, 體溫不跌反升, 用針筒餵佢食退燒藥,
食一半就"NUR" 一半, 好彩之後體溫回復正常,
希望今晚兔寶寶乖乖地瞓覺,
唔好再要我夜媽媽做歌舞表演啦~~

兔寶寶: 你睇我幾精神?!

*************************************************************************