本來諗住今日焗朱古力蛋糕,
大少又叫我焗蛋糕俾佢放工做消夜.
朱古力蛋糕好肥架喎!
為咗我米飯班主嘅健康著想,
都係焗比較輕怡嘅清蛋糕算啦!
唔好睇清蛋糕好簡單, 要做得好其實不易,
從網上睇咗好多資料, 有全蛋法同分蛋法;
由於我仲未摸清部打蛋器嘅性能,
今次我用全蛋法, 雖然明知會無咁鬆軟,
但唔洗分開蛋黃同蛋白打, 準備功夫無咁多!
起初諗住等兔寶寶瞓咗先開工,
大少臨時臨急打來話返屋企食飯,
仲問我有無蛋糕食....
所以成個過程沖沖忙忙都無影相,
事實上都唔方便影相,
因為做蛋糕其中一個秘訣係要"快手"!!!
我用咗韋太所教嘅"2 44 2" 法則,
先將2隻蛋同糖打到可以寫到個"8"字,
然後快手加入40克低根粉, 要用cut & fold因嘅手法去攪,
又唔可以過份攪拌令到D空氣打返出嚟,
到麵粉完全溶入蛋漿後,
快手加入20克溶咗嘅牛油,
要由底摷上嚟咁攪勻唔好俾D油份沈底...
由於D蛋係剛從雪櫃攞出嚟,
所以我隔水溶牛油嘅時候, 同時間用D熱水浸暖兩隻蛋...
用180度焗20分鐘...
之後成個蛋糕連模倒轉,
待涼脫模.
好似電飯煲焗出來咁呀!
係咪覺得個蛋糕好矮呢?
唔係因為發唔夠呀,
係因為呢個份量嘅蛋糕漿應該用6吋模,
而我只得8吋模...
所以個蛋糕咁矮囉!!
大少一返嚟就快快手手食咗一半,
食完飯(我求其煮個米粉佢食...)又即刻食多四份一,
剩底果四份一我咬咗一啖試味,
大少已經話: 你唔想食唔好食呀, 我放工返嚟食埋佢....
吓, 我無話唔想食喎!
說實話, 呢個清蛋糕我覺得不及平時响街買的鬆軟,
可能就係佢比較矮,
相對底面層較硬嘅地方會較多,
但至少係軟綿綿的.
不過對我而言, 40克糖都好似甜咗D,
唔知減糖會唔會令到個蛋糕發唔起呢?
*************************************************************
踏入星期日, 兔寶寶已經四個月大了!!
佢坐得愈來愈直,
近呢兩日仲好鍾意玩口水,
係專登"bu" D 口水泡出嚟,
攪到件衫嘅領位濕晒!
我終於明白"口水肩"對BB係幾咁重要...
可惜兔寶寶遺傳咗我同大少嘅為食基因,
以為個口水肩係食得嘅, 好鍾意扯落嚟放入口咬!!
好鍾意兔寶寶笑到個口一個窿咁樣....
四個月大生日快樂呀!!!
沒有留言:
張貼留言