煙鴨胸芝士辣根汁意粉 * 突然開竅的兔寶寶

10月28日 星期五  晴天

上次响宜家買咗瓶辣根汁,
整過一次麵包之後未用過,
驚佢開咗之後唔放得耐,
今日晏晝就用佢嚟整個<<煙鴨胸芝士辣根汁意粉>>.
做法係有少少抄carbonara, 都係熄火加蛋做汁.
亂做一通, 又幾好食喎!
襯有記憶就做個記錄吧!

材料:
意粉
芝士兩片
辣根汁 (horseradish sauce) 2湯匙
蒜頭(磨蓉) 1小粒
牛油 少許
蛋 1隻
煙鴨胸(去皮切粒) 1件

做法:
1. 烚熟意粉後瀝乾水, 我唔鍾意食淋之之嘅,
   所以烚到柔軟就算, 反正陣間會再煮...
2. 用牛油炒香蒜蓉, 加入鴨胸粒炒香.
3. 加入意粉炒, 如果有"痴底"就加入少少水
   加入鹽及黑椒調味.
4. 加入芝士, 不停炒至芝士溶.
5. 熄火, 加入一隻蛋, 拌勻, 再加入辣根汁.
6. 食得!!

***********************************************************************************

標題話兔寶寶突然開竅,
係因為佢今日食糊仔食得好好,
唔單止無BU出來, 仲食得好快,
吞完一匙, 立刻追住要食一匙.

孤寒嘅我起初只係開咗三滿茶匙嘅米粉俾佢,
怕佢唔食又或者食唔晒,
因為溝埋奶都有成三分一杯.
佢唔洗三分鐘就食晒!
仲要無乜點整污糟條口水肩喎!
好犀利呀!!

兔寶寶: 襯冬天未到, 著下三點式先!!

食完之後兔寶寶投訴唔夠食,
响兔寶寶大吵大鬧嘅情況下我都唧唔切奶,
所以第二個"三茶匙"米粉用水開就算.
兔寶寶又肯食喎! 仲食得好滋味添!
而最攪笑係到食剩少少嘅時候佢竟然响度釣魚!!
個咀仲响度"o答o答"吓!!
佢俾我嘅笑聲吵醒咗之後又試擘大個口想食野!!
呢個情影真係超級攪笑!!

見到兔寶寶食糊仔食得咁叻,
我即刻好開心呀!!

兔寶寶: 我唔食咁多點做米芝蓮人呀?!