金源小館吃晚餐

11月17日  星期六  陰天

星期三晚上, 本來打算响屋企食就算,
大少話唔想我煮, 要出去食喎!
咁我就上網search吓呢區有乜又平又正嘅,
見呢間"金源小館"好似都幾得, 於是就同大少一齊去喇~

我地六點幾去到架喇, 不過都要等幾張枱.

等位期間, 大少帶咗兔寶寶去鄰近鋪位睇雀仔...

呢度格局好似大排檔,
甚至比大排檔更差---佢要搭枱架!
而且D呀姐...唔好話預佢好招呼,
應該話唔好預佢有招呼囉~~等咗一段時間後, 終於有位了,
坐一張大枱, 同其他四個, 應該係同事關係嘅人一齊搭枱.

睇咗一陣菜牌, 我地決定要一份精選推介C,
入面已經包含果度嘅招牌菜山東燒雞喇~

半隻山東燒雞, 散嗌都要九十蚊,
所以叫個餐好抵.
我地食咗好耐, 最後都係覺得唔係新鮮雞來,
我又唔覺得佢好好食, 點咗個蒜蓉汁,
係會好食D嘅...

宜家兔寶寶出街食飯, 佢咗圍兜仔之外,
底下再加條圍裙仔, 防止佢整污糟人地張櫈...

見搭枱果四個食客叫"人頭飯",
我又跟住嗌一碗;
嚟完個燒雞同白飯, 好耐都無餸再嚟,
兔寶寶就咁扒白飯,
我同大少講: D飯好淋好唔掂呀...
搭枱嘅其中一個女人聽到,
就搭咀話: 梗係啦, 佢知你有個女嘛, 咪特登煮D淋嘅你囉...
哈, 佢地四個攪笑得來都幾好玩,
串串貢咁啱我咀型呀!
因為真係好耐都無餸到,
我地就不斷吹水, 講話真係唔應該星期三嚟喇,
D廚房佬掛住睇馬, 唔得閒煮呀!!!

我地一路等, 一路再研究吓個menu,
唔抵得又叫多碟"煎蓮藕豬肉餅",
點知呢碟竟然最快上嚟!
搭枱個肥仔見到, 講笑話: 推(碟餸)過少少好喎~

呢碟煎得幾好食, 師傅梗係贏咗馬喇!

到幾乎食晒碟肉餅, 我地吹過呀姐好幾次之後,
兩碟星斑兩味同時上枱!
西蘭花炒球...
呢碟都OK架!

枝竹炆頭腩:

呢碟麻麻地, 整呢碟時果場馬梗係輸咗喇!

可能真係星期三D師傅掛住刨馬仔,
(我去toilet時經過廚房, 真係見到幾個師傅棟晒响度聽馬仔...)
我又唔覺得呢間野特別好食,
尤其個山東燒雞, 真係麻麻地咋啵~

兔寶寶: 又話帶我嚟食好野嘅?!



************************
嘻嘻, 我之所以咁堅持要試呢間野,
因為除咗炒小菜之外, 呢度仲有好多甜品供應!!



食晚飯都有甜品送, 果晚有南瓜露同豆腐花揀,
兔寶寶都有一份.
於是我要咗兩碗豆腐花加一碗南瓜露,
大少飲飽啤酒唔食糖水, 所以三碗我食晒!!

再額外叫多個焦糖雞蛋布甸, 呢個好正呀!!!

呢餐埋單"生發發"呀!