跑人仔

11月16日  星期五  陰天

大少今日要返工LU...
玩咗幾日, 我地又要過返D由朝忙到晚嘅生活喇!

星期三呢一日, 大少本來想去屋企對面嘅酒樓飲茶,
不過我知果幾間酒樓都唔慌平, 所以"夾硬"炆大少去第二度飲...
我愈來愈覺得我似N年前果套<家有喜事>入面吳君如扮果個黃面婆呀!


呢一度, 叫一碟福建炒飯, 只需廿八蚊...

鮑汁炆伊麵, 又係廿八蚊...

唔知D炒粉麵飯咁鬼大碟,
仲一叫叫兩碟添!
雖然賣相麻麻地, 但又幾好食喎!!!


仲有其他點心都有特價,
呢餐有成盒伊麵攞走, 都係百幾蚊埋單...

兔寶寶宜家已經自己食飯喇!
你幫佢"畢"...佢唔制添呀~
因為餐餐都自己食, 宜家唔係食得好"論盡"咋!!!

食完野, 我地返屋企放低盒伊麵,
就出去行吓...
新搬嚟灣仔呢區唔知"訂",
原來由我家穿過隊道,
行大約十分鐘就會到快活谷...
於是, 我地去睇吓馬仔先!!

馬場中間, 有好多女仔响度練踢足球呀!!!
兔寶寶你唔好走入去....俾人當波踢呀!!!

大少話佢以前都有份俾錢鋪呢塊草皮喎!!

佢仲話既然有份出錢, 就可以帶兔寶寶上去踩兩下...
真係...唔好大教壞細,
好彩兔寶寶乖乖,
唔肯同DADDY一齊作姦犯科咋!

呀B要行返出條大馬路,
好似拍"一個人在途上"咁...

佢又點會全程都咁順灘吖~
兔寶寶本色, 行兩行, 要扭吓"C忽花"先舒服嘅...
大少又攞鎖匙又攞呀B件外套起勢fing,
想話引呀B過來...

你估呀B仲係幾個月大咩?!
媽咪一句: "就嚟到遊樂場喇!",
呀B咪即刻開turbo闖過來囉!

*************************************

到遊樂場喇!
兔寶寶話嚟到快活谷, 點都要跑吓馬仔喎~~

呀B本來想話爬上條梯度玩sir滑梯,
點知尚未爬到上去,
就求上不得求落不能, 被困添...
兔寶寶, 洗唔洗幫你call消防呀?!

有咁多野唔玩,
兔寶寶偏偏要响個架度騰出騰入, 轉來轉去,
望實佢玩的我真係俾佢轉到頭都暈眼都花了...

之後我地就搭兩個站叮叮返屋企喇...
兔寶寶一上車就扶到碌柱實一實.第一次搭電車, 影返幅相留念先!