自煮晚餐

11月18日  星期日  陰天

終於都寫到大少嘅最後一日假期,
拖慢來寫, 等我呃吓自己仲過住D悠悠閒閒嘅生活.

星期四呢一日, 大少約咗14:00到銅鑼灣做body check,
而我亦約咗16:00响同區幫兔寶寶打流感針.
點知我"朝早"俾兔寶寶嘈醒時, 望吓鐘已經係下午一點四十幾分...
真係, 究竟我地三個前一晚係咪齊齊夢遊做賊嚟呢?!

趕頭趕命仆出銅鑼灣, 大少遲咗十幾分鐘,
而我就拿拿林帶兔寶寶去食D野先.
食完野大少仲未走得,
於是我提早一個鐘上去診所幫兔寶寶打流感針.
原來嵗半嘅BB而又未打過流感針嘅話係要分兩次打,
每次打半針...
即係話過多一個月又要返去打多半針.

打完針, 大少剛好做完body check,
於是落去IKEA醫肚兼行吓...如果你認得呢隻橙色蛋蛋櫈...

証明你記性超好呀!
                                                               
                                                               
                                                               
                                                               
                                                               
                                                                                                                             
                                                   

當年今日, 你認得佢嗎?

***************************************

從IKEA出來, 天陰陰,
好似就想落雨咁, 我就提議不如今晚返屋企玩煮飯仔啦!
大少初頭唔肯架, 又話去呢度試又話去果度試,
之後我問多兩問佢點解咁唔鍾意我响屋企煮飯食呢?
佢先唯唯諾諾話好怕我煮親飯都發脾氣...

我諗一諗, 無錯, 好多時開飯食時我都會鬧人,
不過唔算係發睥氣...
我唔介意佢完全唔幫手執野洗碗, 只係好多時我煮好晒飯大少都仲要望實部電腦/電話,
同埋每次整好晒D餸坐底諗住食果陣佢又點我入廚房攞呢樣攞果樣...
我係你老婆唔係你工人呀!
好彩鬧得多大少宜家都醒水, 自動自覺埋位食飯,
有時仲識得主動幫下手開枱,
同埋食之前自己走入廚房攞啤酒汽水(都係攞佢自己飲果罐架咋~)


煮呢餐飯之前, 我承諾過唔會"發脾氣",
大少先俾我煮嘅...

咁想煮飯都係因為想食大閘蟹咋,
C奶心態, 蒸嘅野出去食唔抵吖嘛~
好彩食完果晚皮膚敏感無發作!

白灼蝦, 白灼, 又係响屋企食好D...

未落豉油嘅蒸魚...

行過魚檔見有手打魚蛋賣, 買咗十五蚊,
滾皇帝菜...不過後尾齋食菜食魚蛋, 無飲D湯,
因為好寡, 下次落D蝦米仔可能好D...

食完飯, 我問大少呢餐飯我有無發過脾氣,
佢話好似有喎!
咁我就問佢我幾時發脾氣嚟呀?
佢又諗極都唔記得, 仲話: "原來你會問返架? 咁我下次記住你做乜發脾氣先..."
大少, 我大聲唔代表我惡,
我說話唔溫柔唔代表我發脾氣呀!