蛋撻, 係我讀中一時, 第一堂家政堂嘅作品嚟嫁~~
(哈哈, 已經是十幾二十年前嘅事了...)
當時亦係我第一次接觸焗爐呢!
不過果時唔係由頭到尾都係我地整...
我地只係負責將家政老師一早預備好嘅牛油粉糰好似玩泥膠咁, 按入D撻模度;
再倒入又係一早開好嘅蛋漿, 由老師拎去焗....
焗起牛油蛋撻嘅香味, 至今還記得...
落堂後每人有三個成品可以攞走. 我就珍而重之咁拎返屋企俾我呀媽試食..
到而家我仲覺得, 可以讀到自己果間中學, 係好幸福嫁!
其他學校, 第一堂家政堂整jelly咋!!
呵呵~~ 又扯遠咗...總之, 蛋撻就係我心目中必整嘅items之一...
尋晚襯兔寶寶早瞓, 就整定個牛油皮放入雪櫃, 預備尋日晏晝焗.
點知晏晝出咗街, 呢D蛋撻係夜晚焗嫁~
一早買咗普通嘅金屬蛋撻模, 點知以為自己未買, 又走去買過.
幸好我再買嘅係矽膠撻模, 所以無重覆到.
今次新C坑, 試用晒兩種模.
可能舊撻皮粉糰放咗入雪櫃成晚, 攞出來果時好硬, 要搓好耐先柔軟.
而且搓搓吓, 好似濕得滯, 應該要加返D麵粉.
不過我雙手已經痴晒粉糰, 懶得洗手左摷右摷, 於是求其用手指壓入金屬撻模.
而矽膠撻模因為太軟, 同埋個粉糰開始溶溶地, 我係"抆"落去嫁!
食譜係跟blog友JO姐姐嘅...佢仲教咗我一D整蛋撻嘅心得添, 唔該晒!!!
後來先見到JO姐姐提醒我, 很難將塊皮按入去矽膠撻模, 因為太軟身唔就力...
睇睇吓, 矽膠果D模好似係蛋糕仔模咁, 唔係for蛋撻嫁喎~
死就死啦...唔整都整咗...咁就倒埋蛋漿攞去焗.
JO姐姐個食譜嘅份量, 係啱啱好嘅, 唔會話多緊D撻皮或者蛋漿,
用佢一半份量, 整六個.
手勢差, 成品核核突突咁.
灘凍諗住食, 先發現中間D蛋漿未熟.
又再預熱焗爐, 焗多五分鐘.
唔關個食譜事, 係我見過鬼怕黑, 早咗五分鐘拎D蛋撻出來, 實際上焗15-20分鐘啱啱好.
之後我好肯定, 橙色果幾個唔係蛋撻模, 係muffin模嚟嫁!
因為佢嘅容量較大較深, D蛋難於凝固;
到D蛋熟晒時, 上面D撻皮已經有少少燶燶地....
不過咁, 用muffin模有個好處, 可以放多D蛋漿;
再加上我係"抆"D撻皮上去, 個皮比較薄...
你睇吓! 個皮直頭薄到透光嫁!
所以用muffin模嘅係比較脆D薄D, 餡又多D.
下次可能响焗到尾段要蓋張錫紙先得.
用muffin模(矽膠果D)嘅蛋撻上面有少少燶, 不過好多蛋, 仲好滑...
而用金屬模果D就無焗燶到, 不過就有另一個問題....
我攞唔到個蛋撻出來呀!!
激死~~~~~~~
*********************************************************************
最近愈來愈多blog友升級了.
有說到今個月尾仲唔升級, 呀虎就會將舊有網誌內容封閉.
唔知佢"封閉"嘅定義係乜,
我估到時舊有網誌會變成read only,
即係唔可以再修改舊有網誌, 唔可以再俾人留言.
不過應該唔會delete晒舊果Dpost咁離譜掛?!
不過避免夜長夢多, 我都決定升級了.
正如blog友 5B媽提醒, 等佢到期自動升級可能會大塞車,
反正升級都係遲早嘅事, 我見已經升級嘅blog友都無唔見野, 所以都唔敢博.
擇定良晨吉日, 下星期二搬屋大吉!!!!
到時新blog見喇!!!
兔寶寶: 係咪搬大屋呀, 媽咪??
媽咪: 唔好開心住, 可能係搬爛屋!!!
後記: 多得JO姐姐再指點, 剩餘一個蛋撻, 給我用叉挑出來喇!!!
謝謝你啊~~
沒有留言:
張貼留言