週日深水灣。煎豬扒

8月13日  星期二  陰天

剛剛過去嘅週日, 我地去咗深水灣游水呀!
不, 根據的士司機嘅描述, 應該係去深水灣煎豬扒先至啱!

睇下, 烈日當空, 一隻隻豬扒就响度乾煎緊!

本來係打算去較遠, 亦較少人的龜背灣的,
但怕一老一少難頂舟居勞動, 臨出門口才改去深水灣.
亦因為咁, 時間上就預早咗好多,
去到沙灘時, 正正係最曬嘅兩點鐘.

雖然好鬼曬, 依然好多人,
其中不少係賓賓印印姐姐...


去更衣室換上泳衣.
我都一向易黑怕曬, 在家裡早已塗上一層厚厚的防曬;
來到沙灘再加多一層, 厚到好似搽咗層mask咁..
舅父話我個樣好怪喎!
唔好理我啦舅父, 人人都睇D比基尼女郎啦,
鬼有人會留意我呢個師奶咩~
怪就怪一日半日, 萬一曬黑咗,
可能我有半年被錯認為賓賓都唔定!

呀婆整蠱兔寶寶, 著住件泳衣揹著個水壺,
仲怪過我!

我同舅父帶兔寶寶落水,
可能太曬啦, 而且D海水有些"毑"眼;
 加上在海水中我也自身難保,
照顧兔寶寶嘅責任落在舅父身上.
呀B因為咁唔鍾意掛?!
玩咗半個鐘就上水.
好彩媽媽預備了些食物, 唔游水都可以野餐姐!

咁大條粟米, 兔寶寶當然係食唔晒啦!

問咗佢幾次落唔落水, 佢都攦手擰頭,
索性幫佢脫掉泳衣.
食完粟米, 搣雞蛋...

佢只喜歡搣蛋殼嘅過程,
唔係好LIKE食烚熟蛋的.
咬了一小口後, 把一隻給我, 另一隻給呀婆.

自己食蕃薯之餘又餵呀婆食!

之後三個大人輪住落水,
我都算係咁喇, 咁耐無真真正正游水,
都可以來回咗浮台三次! 當然中間是有休息啦~
而兔寶寶呢, 就盡返佢本份, 細路仔玩泥沙囉~

兩婆孫留在沙灘都很悶,
兩個都趕住走咁款.
五點幾就嚷著要離去了...
試過沖身室的水壓很大, 怕兔寶寶承受不了,
連身也不沖用毛巾抺抺就笠件衫走人.
臨走前舅父影多一張沙灘相~

我就同兔寶寶分享一人一支冰凍嘅雪益存多~

上了巴士唔夠兩分鐘,
呀B就瞓著覺喇~