二人團購午餐@ 新光潮州菜館

8月17日  星期六 晴天

回帶、再回帶、回到去星期一,
我地走咗去試一間菜館嘅團購二人餐.
大少抱住兔寶寶唔洗佢行, 呀B就舒服到打晒呵欠~

咁就大件事喇, 兔寶寶一坐低就開始中眼瞓,
宜家佢慣咗早睡早起, 連食飯同午睡時間都提早埋,
出門口前佢已經食飽飽了!
最後要我抱住瞓...同埋抱住食!

呢間菜館係老字号, 行到去門口時,
大少愕咗愕, 同我講:"呢間攪團購?! 唔係吖嘛?!"
佢食過兩三次, 晚間都幾貴吓.
打開菜牌, 真係有不少頁數係食魚翅、鮑魚、燕窩等貴價野.
但睇真D, 其他小菜同潮州打冷果D都只係一般酒樓收費, 唔係特別貴的.
午市有呢個精選套餐, 包埋茶芥加一, 都係$38,
比好多茶餐廳更抵食.


而我地買嘅團購二人餐, 就係上面個餐單嘅雙人份喇,
記得團購價係五十幾蚊, 即係平咗廿蚊左右.

湯, 睇個樣似茶餐廳例湯,
但幾好飲, 唔似落咗味精!

一人揀一樣餸, 大少要涼瓜炒牛肉.
碟頭係細咗D, 但佢收你幾錢先!?



我知大少想食埋青椒洋蔥炒排骨呢一味, 於是叫埋...
反正無什麼特別想吃的, 就吓佢一餐半餐無所謂啦!
呢一味, 我只吃洋蔥豆豉和青椒, 都送到飯.

食食下, 兔小姐就醒喇~

佢要食白飯! 夾乜俾佢都唔食..
係喎, 你唔係食咗野喇咩?!

仲愈食愈豪邁!

大少好滿意呢餐呀!
抵食固然係其一啦, 即使唔係團購都不貴;
其次係呢度幾清靜;
雖然係老店但伙計唔會似某些老C忽咁愛理不理串串貢,
相反仲好有禮貌, 態度親切.