自製豆漿

10月31日 星期一  晴天

尋日响永安買咗個攪拌機,
個售貨員教我點用嘅時候提及磨豆漿,
大少聽到話以後都唔洗出街飲豆漿LU!
收到!
喳喳臨買埋黃豆返屋企試吓先!

摷吓網上面嘅食譜,成個自製豆漿嘅過程就係:
浸豆--> 磨豆成豆漿 --> 過濾豆渣
--> 煮滾豆漿
好多blogger都提醒煮豆漿嘅時候要小心滾瀉,
同埋一定要確保D豆漿充分煮熟,
唔係飲咗就會又痾又嘔架喇!

為咗令到D豆快D淋,
我仲將D豆放入保溫瓶用熱水浸,
咁我晏晝浸, 夜晚就可以整喇掛?!
後尾先睇返說明書話其實浸四個鐘就得,
唔一定要過夜架!!

第一次整, 浸咗好少豆,
大約大半杯啦!
浸完嘅豆會大咗一倍架!

黃豆同水嘅比例係1:6至到1:8.

第一次用攪拌機(鄉下仔!),
用之前刨晒成本說明書;
(大少成日話我無說明書嘅野我就唔識用...)
先知原來每次淨係可以磨好少份量,
我浸果少少黃豆分咗四次磨!
我仲加咗一小舊薑落去, 聽人講話無咁寒喎!


磨完, 隔渣...我先醒起自己無魚湯袋...
但係我又好想整喎!
於是我用咗一個好環保嘅方法:
用兔寶寶一件唔啱著嘅棉質和尚袍嚟隔渣!
怕D洗衣液過唔乾淨, 用水沖洗佢一遍先!
只係隔咗一次就已經好滑喇!

扭呀扭, 一滴都唔好嘥!!

過濾完嘅豆漿(未煮滾!)

淨返嘅豆渣...
我留起咗少少, 睇吓第日整包餅時用唔用得著.

跟住成個煮豆漿嘅過程我都無離開過,
仲參照其他blogger所講, 滾足三次,
滾完都有得佢煲,
我驚滾唔透大少飲完中毒呀!
由於煲大而豆漿少, 同埋我無用煲蓋,
D豆漿又無話滾得很厲害喎!

為咗俾大少睇吓我整出嚟嘅豆漿原本嘅顏色,
今次我落咗白糖呀!
(屋企無晒冰糖, 唔係落冰糖仲好味!)
攪完一大餐死, 灘凍入瓶,
得果一枝零"DD"俾我試味!

唔! 自己整一定比出面一般鋪頭賣嘅好味嘅,
至少濃郁D, 又少D糖(咁多豆漿我只係落咗三茶匙糖!)
不過...唔係我飲過最好味嘅豆漿!
應該咁講, 我期望佢會好味D囉!
或者下次要買D靚D嘅黃豆!
大少如果知道支豆漿係我企咗响度超過一粒鐘嚟整嘅,
仲會唔會話以後唔出街買豆漿呢?!

********************************************************************

前幾日先知道,
"萬聖節"其實是十一月一日,
10月31日叫"萬聖節前夕".
海洋公園誤導咗我好多年呢!

兔寶寶: 除咗奶奶, 我最鍾意食南瓜...
                       

好橙呀!!