A貨鹹豆漿 * 兔寶寶變蛇寶寶

11月1日  星期二  晴天

尋晚我又再整多一次豆漿, 今次再整濃D,
同埋呢, 今次唔用兔寶寶件和尚袍嚟隔渣,
我"嚴"佢隔得太仔細喇!
我覺得有些少渣反而會濃D健康D!
尋晚<健康奇案錄>話好多營養,
包括鈣質係依然存在响豆渣入面呢!
所以我用咗一個買咗未用過嘅洗衣袋!

今日晏晝等大少起身食LUNCH時有D餓餓地,
用D豆漿整個A貨鹹豆漿嚟頂頂肚!



同麥皮一樣, 我鍾意食鹹的多個甜的!
以前屋企樓下有間上海鋪有鹹豆漿賣,
好鍾意叫一碗"走油炸鬼"嘅;
一來我唔鍾意浸到淋晒嘅油炸鬼,
二來走咗呢樣野之後成碗鹹豆漿感覺健康咗!
冬天食一碗感覺絕對溫暖!
仲以為身為正宗上海人嘅大少同我會有一樣喜好!
點知原來佢唔鍾意食鹹豆漿!

講開又講, 大少同佢屋企人竟然唔知道咩係"鱔糊",
"高力豆沙"呢D出名嘅上海野!
因為佢地從來唔會入香港嘅上海食肆!
係咪真正嘅上海老百姓唔食呢D野嘅呢?

A貨鹹豆漿好易整,
只係將蝦米碎, 炸菜碎, 蝦皮同豆漿煲滾,
碗底先放醋, 豉油(正宗要加埋油炸鬼);
倒入熱豆漿,
加幾滴麻油同蔥花就食得!

自己整嘅豆漿有層豆皮架!!

*****************************************************************************************
兔寶寶好似條蛇咁爬, 變咗蛇寶寶!!