今早11:45要同BB一齊去QE睇兒科,
張預約紙只係寫住"新生兒科", 唔知睇乜野,
(平時返去睇甲狀腺會寫住內分泌科..)
心諗都係兔寶寶出世輕磅要返去做循例嘅例行檢查姐!
見大少瞓得咁甜,
費事叫醒佢喇! 就自己揹兔寶寶搭的士去醫院.
自從兔寶寶滿6個月之後, 我換咗條腰包揹帶,
我就日日都帶兔寶寶出街!
因為條揹帶可以做埋腰包, 俾我袋住銀包、環保袋等雜物;
而且條揹帶分緊D力落條腰度, 揹起上來無咁辛苦,
比起我以前用果條好好多!
兔寶寶可以四圍望之餘仲可以伸隻手仔出來摸野,
所以佢而家見到條揹帶都好開心!
通常我帶兔寶寶出街要搭的士嘅話都會袋定D錢响褲袋,
費事俾錢果陣搵來搵去..
去到QE排隊俾診金嘅時候先知自己無帶銀包呀!
今次係我呢個星期第二次唔記得帶銀包出街!
星期一果日同大少出去食放題,
諗住用埋一張月尾就夠期嘅coupon,
點知我留咗個銀包响條揹帶度無攞出來,
蝕咗我40蚊!
今日又要打俾大少, 嘈醒佢仆出來俾錢!
我D老人痴呆好嚴重呀!
其實最近仲有個笑話,
話說有一日我諗住洗衫,
將浴室D毛巾放落洗衣機之後,
摷埋睡房入面仲有無其他衫洗,
開咗機之後先發覺成袋衫未放入去!
怪不得我開機前仲奇怪點解得咁少衫要洗呢?
跟住要我連氣洗兩機衫!!
所以人嘅記憶真係好奇怪,
而家要我回想返幾個月前點樣湊剛出世嘅兔寶寶,
又或者要我諗返兔寶寶一出世個樣,
我都有D模糊了...
所以我更加要寫好我嘅blog,
俾兔寶寶睇返又好,
俾自己患上老人痴呆睇返都好吖!
今次見個醫生同我一樣"十吓十吓",
佢話唔知點解兔寶寶要返去睇喎!
佢係咁揭枱面D文件,
一路睇一路自言自語:
"BB出世時輕磅?! 無事啦而家...
之前有黃疸? 都6個幾月唔會有啦!
甲狀腺唔係今日睇架喎!"
跟住反問我返去做乜?
你俾張預約紙我咪返嚟囉!
跟住個醫生都幾尷尬,
求其問吓我兔寶寶食奶同食其他野就打發我走!
************************************************
個醫生聽到我話俾過蛋黃兔寶寶食都打咗個突,
佢話唔應該咁細個食蛋黃喎!
咁我話係睇D兒科書叫食嘅(因為母乳唔夠鐵質..)
個醫生聽完我講, 就話如果BB食完又無敏感,
都可以放心食嘅!
佢仲話我既然南瓜都俾得佢食,
不妨俾D橙汁佢飲喎!
但係我睇過幾本書都話BB無咁快可以食橙/飲橙汁喎!
算啦, 反正大把野等兔寶寶食,
我都係唔博喇,
等佢連蘋果蓉同香蕉蓉都食得好地地先俾橙佢食啦!
尋日食餅餅:
沒有留言:
張貼留言