原味八吋戚風蛋糕 及 亞麻子雲呢拿戚風蛋糕

8月16日  星期四  晴天

星期日焗咗一個八吋大嘅原味戚風,
俾呀媽星期一來湊兔寶寶時吃.
不過屋企太多點心零食,
個蛋糕呀媽只係試食咗少少,
最後俾大少影完相(仲要係食完晚飯返嚟)之後食鬼晒呀!

簡單食譜:

(A) 蛋白5隻 + 40克糖 + 1/2茶匙檸檬汁 -----> 打起

(B) 蛋黃5隻 + 20克糖

(B)料打勻後加20克橄欖油拌勻, 再加入40克鮮奶(或豆漿/水)
分3次拌入(A)
170度焗30分鐘



脫模脫得麻麻地, 岩岩蠶蠶咁,
不過個蛋糕真係好鬆軟架!

影完婚紗相嘅大少, 呢個星期好似放監咁,
每日放工返嚟就猛咁摷個雪櫃...
食完涼伴菜食蛋糕, 食完蛋糕食涼粉, 食完涼粉再食雪糕,
食到個肚腩好似箕筲咁大...
佢每食一樣野食到咁上下我就喝停佢,
喂, 你咁食法, 真係要加家用先掂喎!

尋日我地去咗朗豪坊,
回程時大少主動問我, 要唔要去二德惠買野呀?!
又問我幾時再整"雞蛋糕"俾佢食..
於是返到屋企又再整多次8吋戚風,
今次加咗亞麻子同雲呢拿油,
大少放工返嚟一食就食咗大半個,
要喝住佢: 夠喇! 成個蛋糕有5隻蛋架!
你已經食咗2隻半蛋喇!!

睇嚟下次真係要整蛋白蛋糕先得了...