一個好爸爸
未生兔寶寶落嚟之前, 我都有擔心過, 大少會唔係咁鐘意兔寶寶......
話 說, 當初知道有咗兔寶寶嘅時候, 大少其實唔係太過開心, ....一來佢已經要養一對仔女; 二來係佢覺得自己年紀都唔細, 再要養多個人仔係加重咗金錢上同精神上嘅負擔; 三來佢父母已經揍住4個小孩(包括佢對仔女, 佢兩個家姐各一個嘅仔), 無閒再協助我地揍細路.....最重要嘅係佢唔係一個鐘意細路嘅人, 仲講過話只會响金錢上作做父親嘅責任, 其他一概不理....
而 我唔同, 一路以來我都好"恨"有自己嘅細路...因為自己荷爾蒙分泌一直有問題, 好難得先有BB; 而我又一直都好喜歡小孩子; 雖然我曾答應大少同佢前妻, 我會視佢地對仔女係自己親生嘅一樣. 但係, 問心果句, 親生出嚟就係親生出嚟, 十月懷胎係無人所能替代. 我簡直當咗兔寶寶係神賜俾我嘅禮物. 所以响大少反對嘅情況下, 我都堅持要生佢落嚟.....當時我已作出最壞打算, 最多自己一手一腳揍大兔寶寶....直至個肚一日一日大, 大少先接受到自己會有3個小孩.
可 能大少真係响產房睇住兔寶寶出世, 同埋佢見到我真係一腳踢, 迫於無奈要幫手...揍下揍下有感情...而家, 大少唔單止日日同我一齊幫兔寶寶沖涼; 兩個大人幫個BB沖涼一定會俾人笑, 但係我相信我到老咗都會好懷念呢段時光.....沖完涼又幫手拖地; 放工返嚟即使好攰都會抱吓兔寶寶, 有時會幫我餵吓夜奶, 等我可以瞓耐D...
大少抱B同餵B都好叻嫁!!
大少已經不再大少了....出街時一手咩住兔寶寶, 一手拎住架BB車....
至於點解唔放兔寶寶落架BB車度....大少話咁細個坐會櫈親條腰骨喎~~
佢話架車係去到目的地時要來俾兔寶寶瞓嫁!!
大少, 我錫晒你!!
沒有留言:
張貼留言