兩天午餐

6月13日  星期四  晴天

呢個端午節我地食咗好多糉呢!
奶奶拎咗10隻過來,
朋友又送咗張富臨嘅糉卷俾我地.
端午節前一日, 我地就食糉做午餐.
眼闊肚窄(其實都唔太窄!)蒸熱咗三隻糉.

第一隻係瑤柱八寶糉,
即係加多咗八種豆同瑤柱嘅咸肉糉.
好在試咗味先姐, 本身已經夠咸,
唔洗加豉油點就食得!




除咗糉之外, 仲炒咗碟麵!
呢碟唔係伊麵嚟架!
早前响鏡記買咗半斤冷麵,
店員話搵凍滾水沖沖佢就可以食得!
試過之後覺得很油,
不知道係D麵炸過吖, 定係加咗油落去防止黏成一團喇~
但我發現用來炒就幾好食, 仲好方便添!
又唔洗好似伊麵咁揚散佢, 又唔洗點加油...
用埋鉅利醬園嘅老抽炒就好好食喇!
大少掛住食炒麵, 隻八寶糉食咗一半都無就唔食~

後尾仲拆開隻鹼水糭....我一個人食晒!
一隻半咋嘛, 對比起以前後生果陣,
一次過可以食三隻咸肉糉, 之後仲要正常咁食晚飯!
宜家就唔敢咁放肆喇, 夜晚果餐乖乖食烚菜咋!

端午節正日,
簡簡單單, 就食淥菜加雲吞麵.

******************

兔寶寶幾識嘆,
本來陪佢一齊睇電視嘅狗仔夾住做枕頭!
因住瞓黎頸呀!