正冬火鍋

12月1日  星期六  陰天

呢個星期一、二、三大少都放假呀!
星期一去咗屯門慶祝呀公生日,
星期二大少自己去咗街,
星期三...大少瞓到下午五點幾!
梳洗得來, 都已經係時候食晚飯了!
全日只係食咗三片麵包的我, 超肚餓!
於是我地去附近嘅"正冬火鍋", 見佢任食全包都只係$148,
咁就去試下!

一坐底, 侍應就送上一盤調味品,
加完就攞走架喇!
加咗生蒜蓉嘅豉油用來點火鍋料就最正!


呢度都好多牛類選擇,
有肥牛、滑牛、雪花肥牛粒、牛展、黑牛肚等...
不過我覺得最好食嘅係炸魚皮, 好薄好脆!
當薯片食都得~

$148已經包晒所有醬芥加一架喇!
仲有獅威啤、涼茶(果日係五花茶, 有時係酸梅湯、銀菊露)、百事同橙汁汽水任飲.
我地嘅第一盤食物, 見到有出前一丁麵又叫咗個,
點知佢無跟埋包味粉同麻油...咁我就唔想食喇!



蔬菜放得幾靚,
不過D菜心洗得麻麻地乾淨, 仲痴住D發泡膠粒嘅...

不過其他野都大致上OK!
最開心係兔寶寶呢餐食咗好多野,
剪幾多俾佢食幾多,
連個伙計都望吓望吓, 差D想將呀B當小童計呀!!

打完邊爐只係八點幾, 返屋企沖一沖涼,
洗咗D邊爐味之後, 大少提議出銅鑼灣行下...

我地去咗希慎廣場,
我呢個大鄉里, 係第一次入去行咋!
見到聖誕馬車, 又影下相先!

兔寶寶四圍望, 可能諗緊點解架馬車唔識郁嘅?!

呀B好鍾意行商場, 遂間鋪頭走入去轉個圈,
好似巡鋪咁...
有D  sales姐姐見到BB會撩下佢玩,
有D甚至會請糖佢食(當然有大部份係完全唔SO呀B嘅...)
我同大少都懷疑, 兔寶寶咁鍾意走入人地鋪頭,
係博人地請糖糖佢食呀!!!

兔寶寶: 行十間有一間中都好吖...


佢呢隻兔仔走得好快, 攪到我同大少捉兔仔咁捉...
最攞命係我地遂層行得來時有D鋪頭已經落半閘,
兔寶寶就話可以彎低腰閃入去姐,
我地就唯有企响閘出面等人地sales姐姐拖返佢出來,
好彩已經接近放工時間, 個個sales姐姐心情都好好,
無話嫌麻煩咋!

好喇, 行出去空中花園,
等佢多D空間走走走...
見唔到鋪頭, 佢又唔肯行喇喎!
咁就...影幅相走人啦!

之後我地仲行咗去24小時惠康買野食,
先搭車返屋企呢!